— Wanhib'apito, 're isawi pese mono hã hâzé di.

4 Tawamhã Zezusi hã rowasu'u te te wapari wamhã, ma tô ãne tinha:

— Tane tô. Ihâzé hã idâ'âzéb u te te ãwisi dai õ di. Tazahã, 'Re ihâimana u'âsi mono hã tiwaihu'u pe te te ãma hâi'ré da, ma tô ãma tiromhâiba, duré 'Re ihâimana u'âsi mono 'ra ãma dawata za'ra da, i'u'âbâ.

5 Zezusi hã Marta ma tô te te 're sawi pese, duré isisãnawã Mariaha zama duré ihitébré zahuré Lazaruhu zama. 6 Tane nherẽ, Lazaru ihâzé na te te wasu'u wapari wamhã, ma tô duré maparane bâtâ na a'â tihâiba, tinhamrazéb ãma. 7 Taha pari, ma tô ãne tinha, isiré 're inomro mono norĩ ma:

— Oto apâ wasi'aba'réi wa'aba, Zudéa u.

8 Tane nherẽ, ma tô ta norĩ hã ãne tãma nharĩ za'ra:

— Rowahutu'wa, zahadu ãma ronomro õ di, tame a'uwẽ norĩ hã ẽtẽ na te te aré siwi i'aiwĩrĩzém na hã. E niha te ãne nherẽ, asima irob'madâ, apâ wasi'aba'ré da hã.

9 Tawamhã Zezusi hã ma sada'âbâ za'ra, ãne:

— E misi bâtâ 'remhã rowa'a ré hã 12 na bâtâ pibuzé hã za si'utõrĩ ã bâ. Ni'wa hã bâtâ na rowa'a ré morĩ wamhã, si'marõwĩrĩ õ di za, ti'ai ãma dama rowa'a'wa hã te te 'madâ'â wa. 10 Tazahã oto, barana morĩ wamhã, te za ai'morõwĩ. E marĩ wa. Rowa'a'wa hã hâimana õ wa.

11 Ãne Zezusi hã te te nharĩ parimhã, ma tô ãma uzusi, ãne:

— Wasiwaihu'u za'ra Lazaru hã ma tô nhono. Tane nherẽ, wa za itẽme mo, te utu da.

12 Tawamhã isiré 're inomro mono norĩ hã ma tô tãma nharĩ za'ra, ãne:

— Apito, sõtõ wamhã, te za séptârâ.

13 Zezusi hã Lazaru idâ'â na te te nharĩ nherẽ, isiré 're inomro mono norĩ hã ma tô ãma rosa'rata za'ra, tô isõtõ na te te nharĩ newa. 14 Tahawa sõ'awi ma tô oto tãma wasu'u za'ra, ãne:

— Lazaru hã ma tô dârâ. 15 Tane nherẽ, ĩma rowẽ di, i'rata ĩnhamra õ zém na hã. E marĩ wa. Ãne wamhã, te za isaze za'ra wa'wa. Oto itẽme wasi'aba'réi wa'aba.

16 Tawamhã Tome, “Isi'ubza na” isisi amo hã ma tô tisiré norĩ ma tinha, ãne:

— Oto Rowahutu'wa siré wasi'aba'réi wa'aba, isu wasi'utõrĩ da.

17 Tawamhã Zezusi hã Betãnia u wisi wamhã, ma tô waihu'u, Lazaru hã si'utõrĩ wa, da te ãma iti'a na hã, maparane si'uiwa na bâdâ oto ãma inem na hã. 18 Betãnia u hã Zeruzalẽ hawimhã, niwamhã si'ubdatõ na ti'ai pibuzé hã^a. 19 Tawamhã Marta norĩ Mariaha me, Zudeu norĩ hã te te siwi pẽ'ẽtété da, ma tô ahâ na itẽme ai'aba'ré. 20 Tawamhã Marta hã, Zezusi itẽme imorĩ na te te waihu'u wamhã, ma tô sina uzusi. Tane nherẽ, Maria hã ma tô isa'u nhamra, 'ri 're. 21 Tahawa, Marta hã ma tô Zezusihi ma tinha, ãne:

— Wanhib'apito, ãme asãmra 'wa'âhã, ĩhitébré hã aré dâ'â õ di. 22 Tane nherẽ, ĩma waihu'u pese di, dâ'â nherẽ, a hã 'Re ihâimana u'âsi mono wi, uburé tiha hã 're awaptẽrẽ mono wamhã, za te te aima 're i'anhomri mono na hã.

23 Tawamhã Zezusi hã ma tô ãne tãma tinha:

— Tane tô. Aihitébré hã apâ te za hâiwa'udu.

24 Tawamhã Marta hã ma duré sada'â, ãne:

— Tane tô. Ĩma waihu'u pese di, za ihâiwa'utu na hã, 'Re ihâimana u'âsi mono te te ida'ahâiwa'utuzéb ãma hã, rob'rãsutu ãma.

25 Tawamhã Zezusi hã ma tô tãma siwasu'u, ãne:

— Wa hã dahâiwa'utu'wa, duré dahâimanazém nhomri'wa. Ni'wa hã te te ĩzazei wamhã, dâ'â nherẽ, te za apâ 're hâimana u'âsi, dâ'â ãna. 26 Duré ni'wa hã ĩ'ãma 're ihâimana mono hã duré ĩzazei'wa hã, dâ'â u'âsi 're ihâimana mono da hã, mare di. E ãne na ma ĩzaze.

27 Tawamhã Marta hã ma sada'â, ãne:

— Ĩhe, Wanhib'apito. Wa tô asaze, a hã Danho'reptui'wa na, 'Re ihâimana u'âsi mono 'ra, ti'ai u we i'aimorĩ da hã.

28 Tawamhã Marta hã ãne na te te tãma nharĩ parimhã, ma tô mo 'ri u. Mariaha zô ma tô hâ. Hâiba pisutu te ãne tãma rowasu'u:

— Rowahutu'wa hã ma tô wei wi. Te we asô hâ.

29 Tawamhã Maria hã isisãnawã te te tãma irowasu'uzé te te wapari wamhã, si'aba'ré na ma tô wahudu, Zezusi hã te te sina uzusi da. 30 Tane nherẽ, Zezusi hã zahadu sébré õ di, 'ri wa'õtõ u hã. Zahadu te tihâimana u'âsi, Marta te te isõpẽtẽzéb ãma. 31 Tawamhã Zudeu norĩ hã te te siwi pẽ'ẽtété da i'rata isi'ubumro norĩ hã, Maria si'aba'ré na iwatobro na te te siwi 'madâ'â wamhã, ma tô isarina wairé, tihitébré 'ru u imorĩ na te te ãma rosa'rata za'ra wa, siwa'õ da.

32 Tawamhã Maria hã Zezusi ihâimanazéb u wisi wamhã, te te 'madâ'â wi, ma tô hi'rãtitõ ipapara aime. Ãne te tãma tinha:

— Wanhib'apito, ãme asãmra 'wa'âhã, ĩhitébré hã aré dâ'â õ di.

33 Tawamhã Zezusi hã Maria isiwa'õ na te te 'madâ'â wamhã, duré Zudeu norĩ isarina isi'aba'ré norĩ zama te te 'madâ'â za'ra wa, ma tô tiwi tirobzei'õ pese. Ma tô duré tipẽ'ẽzé pese. 34 Tahawa, ma tô ãne sadanharĩ za'ra:

— E mame ma tô asiwi isẽrẽ 'wa.

Ma siwi sada'â, ãne:

— Apito, pé wasiré aimorĩ, sabu da.

35 Tahawa Zezusi hã ma tô aiwa'õ.

36 Tawamhã te ãne dasima nharĩ za'ra ni:

— Ma'ãpé 'madâ'â za'ra wa'aba. Te te 're sawi pese uptabi mono wa, te aiwa'õ.

37 Tane nherẽ, ni'wam norĩ hã ma tô ãne nharĩ za'ra:

— Aibâ itob'a hã ma tô to pese. E niha bâ bété, te te 'manharĩ waihu'u õ di, Lazaru hã dâ'â tõ da hã.

38 Tawamhã Zezusihi wa, ma tô ipẽ'ẽzé uptabi hã apâ iwab ãzé. Tahawa ma tô mo, ab're u. Ab're siro hã ẽtẽ tõmo wawẽ na isito, dazasizéb ãma hã. 39 Tawamhã Zezusi hã ma tô ti'ru, ab're nhitobzé hã da te dasiwi sa'ré da, ãne:

— Ẽne hã asiwi sa'réi wa'aba!

Tahawa, Marta hã ma tô Zezusihi ma tinha, ãne:

— Wanhib'apito, 'roi uptabi di oto. Maparane si'uiwa na ma tô bâdâ hã ãma ne, da te dasiwi isẽrẽzém na hã!

40 Tane nherẽ, Zezusi hã ma tô tãma tinha, ãne:

— Oro te aima nharĩ za, sazei wamhã, 'Re ihâimana u'âsi mono waihu'u pese uptabi na, marĩ te te 're i'ab'manharĩ mono zé, za i'madâ'â na hã.

41 Tawamhã ẽne ab're nhitobzé hã ma tô oto dasiwi sa'ré ni. Taha pari, Zezusi hã ma tô hâimo rob'madâ. Ãne ma tô mre:

— Ĩmama, wa ai'ãma ĩwata, ĩwaparizém na hã. 42 Ĩma aiwaihu'u pese di, 're ĩwapari u'âsi mono na hã. Tane nherẽ, ãne hã wa tô tinha, ãme idahâimana za'ra norĩ u'âbâ, we ĩzatõrĩ na te te ĩzaze za'ra da.

43 Ãne mreme parimhã, Zezusi hã ma tô mreme 'rãihâ na hâ, ãne:

— Lazaru, rob u we aiwatobro.

44 Tawamhã idâ hã rob u ma tô watobro. Para ubu ré duré sib'rata ubu ré, zazahâ hâiwa ré na ãma iwapre na. Duré i'ubu zama ãma i'ubu wapre ré. Tawamhã Zezusi hã ma tô ti'ru, ãne:

— I'ubuzé hã tãma wasihui wa'aba, morĩ da.

45 Tawamhã Zudeu norĩ hã Mariaha u isi'aba'ré hã, Zezusi te te i'manharĩzé hã te te 'madâ'â za'ra wamhã, ma tô ahâ na saze za'ra. 46 Tane nherẽ, ni'wam norĩ hã ma tô apâ ai'aba'ré, farizeu norĩ ma, te te rowasu'u za'ra da, Zezusi te te i'manharĩzém na hã. 47 Tahawa farizeu norĩ hã duré sasedoti ipire norĩ me, ma tô si'rã'õtõ, Zudeu norĩ ma roti'wa norĩ siré. Ãne ma tô sima nharĩ za'ra:

— E marĩ, wa za wasiwi 'manharĩ ni. Ã hã aibâ hã, ahâ na te te 're ab'manharĩ, marĩ dama i'manharĩ waihu'u'õ hã. 48 Ãne hã marĩ te te 're ab'manharĩ u'âsi mono tõ da, marĩ, wa te wasiwi 'manharĩ õ wamhã, uburé te za saze za'ra ni. Tawamhã romanu na dawamri norĩ hã te za wei wazô ai'aba'ré, 'Re ihâimana u'âsi mono nhorõwa 'ri 'rãihâ hã te te wawi prub za'ra da, duré wanhipti'a nho'u hã te te siwi wamnarĩ da zama.

49 Tawamhã Caifasi na isisi hã taha wahub 'remhã, sasedoti tisiré norĩ nhipai u ipire uptabi na te tihâiba. Ta hã ma tô tãma nharĩ za'ra, ãne:

— E niha aima irosa'rese za'ra wa'aba õ! 50 E waihu'u za'ra wa'aba õ di, iwẽ hã tô aibâ misire idâ'â da hã, a'uwẽ norĩ nhibrob're, uburé pese da te wa'uprosi tõ da.

51 Caifas hã ãne te te nharĩ wamhã, sihawim na te te nharĩ õ di. Taha wahub 'remhã sasedoti ipire uptabi na 're hâimana mono wa, ma tô romhâ ré waihu'u siro, Zezusi hã za idâ'â na, uburé Zudeu norĩ zada. 52 Zudeu norĩ zada si õ di. Tazahã, 'Re ihâimana u'âsi mono 'ra, uburé ropâ ti'ai ãma 're ihâimana za'ra mono norĩ zada zama, misi haré iwamri na 're hâimana za'ra mono da.

53 Tawamhã taha bâtâ hawim haré, ma tô sima rowairébé za'ra, Zezusi hã te te siwi wĩrĩ da. 54 Tahawa, sõ'awi 're morĩ õ di oto, Zudéa ãma hã. Rop si 're irosa'wari mono u, ma tô mo, Efraĩ na 'ri wa'õtõ nhisi u. Tame ma tô nhamra, isiré 're inomro mono norĩ ré.

55 Tawamhã Zudeu norĩ te, Pascoa na dato nhisi ihâimanazéb da hã oto ro'rutu wa, da'ahâ na ma tô ai'aba'ré ni Zeruzalẽ u hã, dato hâimana wana ré, 'Re ihâimana u'âsi mono ma, dasihâiba pese za'ra da hã. 56 Tawamhã Zezusihi zô ma tô tarĩtĩ za'ra ni, 'Re ihâimana u'âsi mono nhorõwa 'ri 'rãihâ ãma hã. Ãne te nasi tasisadanharĩ za'ra ni:

— E niha te ãma irosa'rata za'ra wa'wa. E te za tô wei wi, datoi u hã.

57 Sasedoti ipire norĩ hã duré farizeu norĩ me, ma tô roti zahi hã siwi tihi, ni'wa hã Zezusi te te 'madâ'â wamhã, te te tãma wasu'u za'ra da, te te siwi âri da.