Yesusi aulkena pumbe purumu kinie mongo keri lierimu ye te molorumu kanorumu. Anumuni olona sukundu mongo keri lielimu merimu. 2 Pe yu lombili andoli yemane yu walsikulie ningendo: “Rapai,^a nawene ulu-pulu-keri terimumunge i yemonga anumuni yu olona sukundu mongo keri lielimu merimuye? Yemo yuyu terimu molo anumu-lapaselone teringiliye?” niringi.

3 Yesusini nimbendo: “Yemo yuni kepe anumu-lapaselone kepe ulu-pulu-keri te teringimunge yu mongo keri naa lierimu. ‘Pulu Yemonga ulu-tondolo te i yemo-kinie mona wendo opili yemboma pali kanangi!’ nimbe i yemo mongo keri lierimu. 4 I walemo pora naa nimbe ena ou naa pupili na lipe mundorumu yemonga kongonomo paa temolo. Ipu lemba kinie yembo tene manda kongono naa temba. 5 Na i ma-koleana molopolie, na ma-koleana yembomanga pa tendelimu molio.”^b nirimu.

6 Aku nimbelie yu mana lkambe topa mamo-kinie ambolopa topele-mapele topalie yemonga mongoselonga kandopalie nimbendo: 7 “Nu No-Mongo Silloamo puku kumbi-kerena no le-pou!” nirimu. (Silloamonga ungu-pulumu ‘lipe mundoli’.) Yu akune pupe kumbi-kerena no lierimu kinie mongoselo peanga lierimu, mélema kanolipe ulkendo purumu.

8 Kanu-kinie yunge kolea-yemboma kinie “Yu kou-mone siee!” nimbe ou aulkena mawa tepa molorumu kanoringi yemboma kinie yu aku-sipe orumu kanokolie enone enono anjo-yando kere-pale ningu walsikulie ningendo: “I yemo ou “Kou-mone siee!” nimbe mawa tepa molorumu kanu yemonje?” niringi.

9 Marene ningendo: “Sike, yu aku yemo mindi.” niringi.

Marene ningendo: “Mólo! Elo kumbi-kere telu-sipe nalo i yemo lupe.” niringi.

Nalo yemo yuyu tondolo-mundupelie nimbendo: “Ye kanumu na mindi.” nirimu.

10 Enone topondokolie ningendo: “Nunge mongoselo nambe-enu kinie peanga liemuye?” niringi kinie

11 yuni topondopa nimbendo: “Ye te ‘Yesusi’ nilimele kanumuni le-olí lipe mongoselonga ape kandopalie nimbendo: “No-mongo Silloamo puku kumbi-kerena no le-pou!” nimu kinie pupu kumbi-kerena no le-pondu kinie nanga mongoselo peanga liemu-ne kolea kanondu.” nirimu.

12 “Aku yemo tena molemoye?” niringi kinie

“Na naa kanondu.” nirimu.

13 Ye ou mongo keri lierimumu yembomane Parisi-yema^c moloringine mengo puringi. 14 Kanu-kinie, Yesusini le-olí lipe yemonga mongoselonga ape kandopalie yemonga mongoselo ‘altopa peanga liepili!’ nirimu kanu walemo ˻Juda-yemboma koro moloringi˼ Wale-Sambate kinie^d terimu, 15 akumunge Parisi-yemane kepe yu walsikulie ningendo: “Nunge mongoselo nambepa peanga liemuye?” niringi.

Yemone topondopa nimbendo: “Nanga mongoselonga oli ape kandomu kinie na kumbi-kerena no liendu, kinié na mongone kanokoro.” nirimu.

16 Parisi-ye marene ningendo: “I yemo Sambate-Walemo naa pilipe we andolemo, aku-sipe ulu-pulu-keri telemomonga Pulu Yemone yu naa lipe mundorumu lemo.”^e niringi.

Nalo marene ningendo: “Pulu Yemone lipe tapondomba kinie mindi yembo tene i ulu-tondoloma mele manda temba^f aku-sipe mele ye ulu-pulu-keri telemo tene manda telkaye?” niringi.

Akumunge eno anjo-yando kere-pale ningu konopu telune pupili naa moloringi.

17 Akumunge, mongo ou keri lierimu yemo altoko walsikulie ningendo: “Kanu yemone nunge mongomo tepa peanga tendemu akumunge yundu nu nambolka konopu lekenoye?” niringi.

Yemone topondopalie nimbendo: “Yu Pulu Yemone ungu-umbu tondolemoma pilipe yemboma nimbe silimo ye te.”^g nirimu.

18 Nalo Juda-ye-awilimene^h “ ‘I yemo ou yunge mongomo paa sike keri lierimu, pe kinié peanga liemu.’ nimbu ‘sike lemo.’ we naa nimolo. Yu olione kanopo imbi naa silimolo kene anumu-lapaselo walsipu piliemili wale!” niringi. 19 Kanu-kinie anumu-lapaselo oringili kinie walsikulie ningendo: “I yemo elonga marenaye? “Anumuni merimu kinie mongomo keri lierimu.” nilimbele kanu yemo imuye? Aku liemo kinié nambepa mongone kanolemoye?” niringi.

20 Anumu-lapaselone topondokolo ningelendo: “Yu sike oltonga malo. Anumuni merimu kinie yunge mongomo keri lielimu merimu yemo olto kanokombolo. 21 Nalo kinié yunge mongoselo peanga liemumu nambepa temunje olto naa kanombulu. Yu nawene mongoselo tepa peanga tendemunje akumu olto naa-la kanombulu. Yu ye-yumu molemo kene yu temu mele yuyu nimbe sipili yu walsiku piliee!” niringili. 22 Anumu-lapaselo Juda-ye-awilime pipili kolkololie aku-siku niringili. Juda-ye-awilimene ou ningu panjikulie ningendo: “Yembo tene ‘Yesusi yu sike Pulu Yemone lipe mundorumu ye-nomi Kirasimu.’ nimu liemo aku yembomo ulke máku topo Pulu Yemonga ungumu pilimolo ulkemanga naa opili kamu makoromolo.” niringimunge aku-siku niringili. 23 Ou ye-awilimene aku-siku ningu panjeringimu anumu-lapaselo pilkululie “Yu ye-yumu kene yuyu nipili walsiku piliee!” niringili.

24 Juda-ye-awilimene kelko wale talo-siku ou mongo keri lierimu yemo “Ou!” ningulie yundu ningendo: “Nuni ‘Pulu Yemo pilipe molemo.’ ningu kolo naa toko, nu temu mele sumbi-siku olio piliemili ningu si! ˻Olio Pulu Yemonga ungumu mimi-sipu pilimolo yemane pilkimulu,˼ ‘ ‘Nunge mongo tepa peanga tendemu.’ nikinu yemo yu ulu-pulu-keri teli yemo.’ nimbu pilkimulu.” niringi.ⁱ

25 Yuni enondo topondopa nimbendo: “Nanga mongoselo tepa peanga tendemu yemo ulu-pulu-keri teli yemo molo mólonje, na naa pilkiru. Nalo ulu te na paa sike pilkiru. Ou nanga mongoselo paa sike keri lierimu nalo kinié nanga mongoselo peanga liemu-ne kolea kanokoro, akumu na paa pilkiru.” nirimu.

26 Kanu-kinie enone yu walsiku pilkulie ningendo: “Yuni nu nambe-emuye? Nambolka uluri temu kinie nunge mongoselo peanga liemuye?” niringi.

27 Yuni topondopa nimbendo: “Nane eno ou nimbu sindu nalo naa pilingendo ungu nindumu liku su singi kanumu. Pe kinié nambolkare pilingendo altoko ‘ni!’ nikimiliye? Eno kepe yu lombili pungendo walsikimilinje?” nirimu.

28 Kanu-kinie enone yu-kinie mumindili kolkolie iri toko ningendo: “Nu aku ye-kerimunge lombili andolimu nalo olio Mosisinge lombili andolime.^j 29 ‘Pulu Yemone sike Mosisi-kinie ungu nirimu.’ nimbu pilipulie ˻‘Mosisi Pulu Yemonga ye-awilimu.’ nimbu pilipu molemolo˼^k nalo i ye-kerimu yu terenga molopa orumunje, olio naa pilkimulu.” niringi.

30 Yemone topondopa nimbendo: “I yemone nanga mongoselo tepa peanga tendemu nalo yu tena molopa orumunje eno Pulu Yemonga ungumu mimi-siku pilimele yemane naa pilimele akumu paa ulu te-lupe. 31 Olio pilimolo, ‘Ulu-pulu-keri telemele yemboma Pulu Yemo mawa teko “Liku tapondou!” nilimele ungume Pulu Yemo yuni naa pilimo. Yembo te ‘Pulu Yemonga imbimu olandopa molopili!’ nimbe ulume tepa molopa, yuni “Tei!” nilimo mele pilipe telemo yembomo Pulu Yemo mawa tepa “Liku tapondou!” nilimo ungume yuni pilimo.’ akumu olio pilimolo. 32 Ou Pulu Yemone mulú-maselo terimu kinie kepe yandopa kepe yembo te anumuni merimu kinie olona sukundu mongo keri lierimu yembomonga mongomo yembo tene tepa peanga tenderimu ningu temane telu kepe ou tene naa toringi pilierimulu kanumu. 33 Pulu Yemone i yemo lipe naa mundulkenje yuni aku-sipe ulu-tondolo te manda naa telka.” nirimu.

34 Yuni aku nirimu kulu pilkulie enone topondoko ningendo: “Nu aminiene merimu kinie ulu-pulu-keri awisili pepili merimu. Pe kinié nuni ‘olio mane siembo!’ konopu lekolie nikinuye?” niringi. Aku ningulie yu ˻Pulu Yemonga ungumu pilieringi ulkena kamu˼ makororingi.

35 Juda-ye-awilimene Yesusini mongo tepa peanga tenderimu yemo ˻Pulu Yemonga ungumu pilieringi ulkena˼ kamu makororingi kinie pilipelie Yesusi yu pupe kanopalie nimbendo: “Nu Manie Omba Mana-Ye A Lierimu Yemo ˻‘Yu sike Pulu Yemone lipe mundorumu˼’ ningu tondolo-munduku pilkinu^l molo móloye?” nirimu.

36 Yemone walsipelie nimbendo: “Ye Awilimu,^m i ye nikinumu yu naweye? Nane ‘yu sike aku yemo molemo.’ nimbu tondolo-mundupu piliembo kene ningu si!” nirimu.

37 Yesusini nimbendo: “Kanu yemo nu kinié kanoko moleno. Kinié nu-kinie ungu ningu molkombele akumu.” nirimu.

38 Kanu-kinie ye kanumuni nimbendo: “Awilimu, kinié ‘Nu aku yemo sike lepamo.’ nimbu tondolo-mundupu pilkiru.” nimbelie Yesusinge imbi lipe ola mundundupe yu kapi nirimu.

39 Yesusini nimbendo: “Na ‘yemboma ulu-pulu-keri teko molemele mele mona liepili piliengi!’ nimbu ma-koleana orundu. ‘Yembo mongo keri lemoma mongone mélema kanoko, mongo peanga lemoma mongone mélema naa kanangi!’ nimbu ma-koleana orundu.”ⁿ nirimu.

40 Parisi-ye^o yu pea moloringi marene yuni aku nirimu pilkulie ‘Yu ungu-iko te topa oliondo nikimunje?’ ningu yu walsikulie ningendo: “Nu nambolka ningu nikinuye? Olionga mongoma keri lemolaye?” niringi.

41 Yesusini nimbendo: “Enonga mongoma keri lelkanje enonga ‘konopune ulu-pulu-kerime pelemo.’ ningu pilkulie, ˻Pulu Yemondo˼ “ ‘Ulu-pulu-kerime manie pupe konopu peanga liepili!’ ni!” nilimela. Nalo “Mongone mélema kanolemolo.” nilimelemonga enonga ulu-pulu-kerime konopune we pepili molemele.”^p ˻nirimu.˼