Yemboma pali ulkendo bulu-balu ningu puringi;

2 Kanu-kinie kolea tangorumu kinie ipulueli-ou yu kelepa ˻Pulu Yemo popo toko kaloringi˼ ulke-tembelena purumu kinie yemboma yu molorumune ongo máku toko moloringi kinie eno ungu-mane simbendo yu manie molorumu.

3 Kanu-kinie Pulu Yemonga ungu-manemanga pulume pilku mane siringi yema kinie^a Parisi-yema kinie^b enone ambo ye puli te ye te kinie wa-ulu-kerinele teringilimu liku mengo ongo yemboma moloringi kumbi-kerena ongo anjikulie, 4 Yesusindu ningendo: “Ungu-Mane Silimu, i ambo ye púlimu ye te kinie wa-ulu-kerinele teko molongili yembomane kanongi-ne membo okomolo. 5 Mosisini ungu-mane te sipe panjipelie nimbendo: “Ambo aku tembamo kouni toko kondaa!” nirimu^c kene nuni nambolka niniye?” niringi. 6 Nalo enone sike pilingendo naa niringi. ‘Yuni nambolka nimbenje? Nimbe kenjimbe kinie kote tendemolo.’ ningu aku-siku walseringi.^d

Nalo Yesusi ma kanopa kimuni mana ˻we˼ imbi topa molorumu. 7 Kanu-kinie yu alieli walsi-pou-pou teringi kulu olando sipe kanopalie enondo nimbendo: “Enonga ye te ulu-pulu-keri te naa pelemo ye tene i ambomo kumbi-lepa kouni topili!”^e nirimu. 8 Aku nimbelie yu kelepa ma kanopa mana we imbi topa molorumu.

9 Aku nirimu-kulu pilkulie ye-awilime eno te talo ningu pena-pena puku Yesusi munduku siye-kolko eno puringi. Ye-awilimenga ye-nomime ou kumbi-leko puringi kinie we-ye-awilime akilku puringi kanu-kinie ye-awili te Yesusi-kinie naa molopa Yesusi-yuyu molopa, ambomo Yesusi molorumune we angilierimu. 10 Kanu-kinie Yesusi olando-sipe kanopalie ambomo walsipelie nimbendo: “Ambomo, yema tena molemeleye? Ye tene nu ‘Teko kenjenumunge kote tendambo!’ naa nimuye?” nirimu.

11 Ambomone nimbendo: “Awilimu, ye tene na kote naa tendemba tekemo.” nirimu.

Yesusini nimbendo: “Nane kepe ‘Nuni teko kenjenumunge mindili nani!’ naa nikiru kene nu pukulie ulu-pulu-keri teleno mele munduku siye kolko, kelko naa tei!” nirimu.

12 Yembo moloringimendo Yesusini kelepa nimbendo: “Na ma-koleamanga pali yembomanga pa tendelimu.^f Na andopo molombona lombili andoko molonge yemboma sumbulu toline naa andoko molonge. Konde mololi ulu-pulumu silimo pa telimu kinie molonge.” nirimu.

13 Aku nirimu-kulu ye-awili Parisimene^g pilkulie yu karaye tekolie ningendo: “Nu moleno mele nunu ningu silino kene nuni ungu nikinume pilipulie ‘Sike nikimu.’ nimbu pilimelanje manda naa telka.” niringi.^h

14 Yesusini topondopa nimbendo: “Na ou molopo orundu koleamo kinie kelepo pumbo tekero koleamo kinie pilipu moliomonga na molio mele sike nanu nilio nalo nane i ungu nikirumu sike ungumu. Nalo na molopo orundu koleamo kepe pe pumbo tekero koleamo kepe eno naa pilkimili. 15 Mana-yembomane pilku apuruku telemele mele eno Parisi-yemane aku-siku pilkulie apurulimele, nalo nane yembo te naa apurulio. 16 Nalo nane sike pilipu apurulkenje na-nanu manjipu naa apurulkemonga sumbi-sipu apurulke. Na lipe mundorumu ye Tata-kinie pea tapu topo molembolomonga sumbi-sipu pilipu apurulke. 17 Enonga ungu-mane te bokune molemo kanumu i-sipe: ‘Yembo talone ungu te ningu singili liemo ‘Aku ungumu sike.’ niengi!’ aku-sipe nimbe pelemo.ⁱ 18 Akumunge na molio mele nanu nimbu silio kepe; na lipe mundorumu ye Tatane na molio mele nimbe silimola.” nirimu.

19 Kanu-kinie enone walsikulie ningendo: “Lanie tena molemoye?”^j niringi.

Yesusini topondopa nimbendo: “Enone na kepe nanga Lapamo kepe naa kanoko imbi silimele. Enone na kanoko imbi silimelanje Tata kepe kanoko imbi silimela-la.” nirimu. 20 Yesusi ulke-tembelena sukundu, Pulu Yemonga ningu yembomane kou-mone siringi unjo-ketema lierimu koleana molopa yemboma ungu-mane sipe molopalie i ungume nirimu. Nalo yunge walemo^k wendo naa orumu kulu yembo tene yu ambolko liku ka naa siringi.

21 Yesusini altopa Juda-ye-awilimendo nimbendo: “Na kinié pumbo tekero, kanu-kinie enone na koroko kelkolie enonga ulu-pulu-kerime konopune pepili kolonge. Na pumbo koleana eno manda naa onge.” nirimu.

22 Aku nirimu-kulu pilkulie Juda-ye-awilimene enono kere-pale ningu walsikulie ningendo: “Aku nambemu-ne ‘Na pumbo koleana eno manda naa onge.’ nikimuye? Aku liemo yu-yuyu topa kondombanje?” niringi.

23 Yesusini kelepa nimbendo: “Eno manie-yemboma, na ola-yemo. Eno ma-kolea pulu-yemboma, na ma-kolea pulu-ye te mólo! 24 Nane enondo ou nimbondo: “Ulu-pulu-kerime konopune we pepili kolonge.” nindu kanumu. Akumu “Na kinié molio, ou-pulu-pulu molorundu, pe molopo mindi pumbo yemo.” nimbu silio mele enone ‘Sike akumu molemo.’^l ningu tondolo-munduku naa piliengi liemo pe eno kolonge kinie sike enonga ulu-pulu-kerime konopune we pepili kolonge.” nirimu.

25 Parisi-yemane yu walsikulie ningendo: “Nu naweye?” niringi.

Yesusini topondopa nimbendo: “Na molio mele eno alieli nimbu silio kanumu na mindi. 26 Nane eno molko ulu telemele mele pilipu apurupulie enone teko kenjilimele mele ungu awisili nimbu silke nalo nanu konopumuni pilipulie ungume naa nilio. Na lipe mundorumu yemo, yu ulu-sikema mindi tepa ungu-sikema mindi nilimo ye, kanumuni nilimo mele mindi pilipulie mana-yemboma nimbu silio.” nirimu.

27 Yuni Lapando nirimu nalo eno yuni nirimu mele pulumu naa pilieringi-kulu 28 Yesusini enondo nimbendo: “Pe enone Manie Omba Mana-Ye A Lierimu Yemo ola uku toko panjikulie^m ningemone, enone pilkulie “Na kinié molio, ou-pulu-pulu molorundu, pe molopo mindi pumbo yemo.” nimbu silio mele enone ‘Sike akumu molemo.’ⁿ ningu pilkulie kepe, “Na-nanu konopumuni pilipulie naa telio.^o Tatane na mane silimo mele mindi pilipulie nilio.” alieli nimbu silio ‘Akumu sike lemo.’ ningu pilinge. 29 Na lipe mundorumu-ne orundu yemo na-kinie pea tapu topo molembolo; alieli yu kanopa peanga kanolemo ulume mindi teliomonga yuni walsikele kepe na mundupe siye naa kolemo.” nirimu. 30 Yuni aku-sipe nimbe molopili kepe yembo awisili ‘Yesusi yu Pulu Yemone sike lipe mundorumu.’ ningu tondolo-munduku pilieringi.^p

31 ‘Yu sike.’ ningu pilieringi Juda-yembomando Yesusini nimbendo: “Nane ungu-mane silioma sike pilku liku tenge panjiku molongi liemo eno sike nanga lombili andolime molonge.^q 32 Aku tekolie, enone sike ungumu pilinge kinie eno ka silimo mélema sike ungumuni wendo lindipe ‘eno we molko kondangi!’ nimbé.” nirimu.

33 Enone topondoko yundu ningendo: “Olio Eporayamone kalopa lsimu yemboma molopo, yembo tenga ka-kongono te naa tendepo molorumulu.^r Aku liemo nuni ‘Ka silimo mélema wendo pumbe olio molko kondonge.’ nikinu kanumu nambeko pilkulie nikinuye?” niringi.

34 Yesusini topondopalie nimbendo: “Nane eno paa sike nimbu sikirumu: “Yembo ulu-pulu-keri telemelema ulu-pulu-kerimene ka silimo kinie aku ulu-pulu-kerimenga ka-kongono telemele. 35 Ka-kongono telemo kendemandemo ulke pulu yemboma kinie pea kamu naa molemo, nalo ambolango te yunge ulke pulu yemboma-kinie alieli telune tapú-toko molemele. 36 Akumunge ˻Ulke Pulu Yemonga˼ Malone ‘Eno ka silimo mélema mundupe siye kolopili, eno we molko kondangi!’ nimu liemo méltene sike ka naa simbe, we paa sike molko kondonge.” nikiru. 37 ‘Eno Eporayamone kalopa lsimu yemboma molemele.’ na pilipu molio nalo enonga konopune nanga ungumu naa pelemomonga na toko kondonge tekemele. 38 Nane Tata-kinie molopolie kanorundu mele eno nimbu silio. Enone enonga laniene nilimo mele pilkulie telemele.” nirimu.

39 Yesusini yembomando “Eno lanienga ungumu pilkulie telemele.” nirimu kinie pilkulie Juda-yembomane topondoko ningendo: “Olionga lapa kalopa lsimumu Eporayamo.”^s niringi.

Yesusini nimbendo: “Mólo! Eno sike Eporayamone kalopa lsimu yemboma molemelanje Eporayamone terimu mele eno aku-siku telemela. 40 Nalo aku naa telemele. Pulu Yemone na nimbe sirimu ungume na pilierindu ungu-sikema eno nimbu silio-yemo toko kondonge tekemele. Eporayamone aku-sipe naa terimu. 41 Eno enonga laniene telemo mele manda manjiku telemele.” nirimu.

Enone tondolo karaye tekolie ningendo: “Olionga anumu ye te-lupe-kinie wapora topalie olio naa merimu. Olionga lapa kanumu Pulu Yemo telu mindi.” niringi.

42 Yesusini enondo nimbendo: “Na Pulu Yemo-kinie molopolie orundu ya moliomonga Pulu Yemo yu sike enonga Lapa lelkanje enone na konopu mondolemela. Na-nanu konopumuni pilipulie naa orundu. Yuni na lipe mundorumu-ne orundu. 43 Nane ungu niliomanga pulumu nambemu-ne sumbi-siku naa pilimeleye? ‘Ungu-pulumu naa pilimolo.’ ningu naa pilku limele akumunge nanga ungumu eno naa pilimele. 44 Eno ˻kurumenga nomi˼ Depelemonga^t ambolangoma, Setene enonga lapamo. Laniene kanopa peanga kanolemo mele ‘teamili!’ ningulie yuni “Eno teaa!” nilimo mele ‘Paa teamili!’ nilimele. Ou-pulu-pulu mulú-maselo kokele wendo orumu kinie yu yembo topa kondoli yemo molorumu mele aku silimu yandopa kinié we molemo. Yu sike ungu-pulu te naa perimu-ne sike ungu te walsikele kepe paa naa nirimu. Yu kolo tolemo yemo; yu sike kolo toli ungumunge pulu-yemo molemomonga ou yu kolo torumu mele yandopa kinié-kepe pe-kepe kolo mindi tolemo tomba. 45 Nalo nane ungu-sikema nimbu siliomonga eno naa pilku ‘Kolo tolemo.’ ningu pilimele.

46 “Nawene nanga konopune ulu-pulu-keri telu kepe pelemo manda lipe ora simbeye? Te naa pelemo nalo nane ungu-sikemo nindu liemo ‘Sike nikimu.’ ningu eno nambemu-ne naa pilimeleye? 47 Pulu Yemonga ambolangomane Pulu Yemone nilimo ungumu pilku limele. Eno Pulu Yemonga ambolangoma naa molkolie^u yunge ungumu nane nimbu silioma “Naa pilimolo.” ningu naa pilku limele.” nirimu.

48 Juda-ye-awilimene^v yundu topondoko ningendo: “ “Nu Sameria-ye te moleno, nunge konopune kuru te molemo.” nilimolo kanumu sike nilimolo.” niringi. ˻Juda-yembomane Sameria-yemboma kinie konopu keri panjeringi kanumunge^w yu iri toko ungu-taka tondoko “Yu ye keri te.” ningendo “Nu Sameria ye te.” niringi.˼

49 Niringi mele pilipelie Yesusini topondopa enondo nimbendo: “Nanga konopune kuru te naa molemo. Nane Tatanga imbi lipu ola mundundulio, nalo enone nanga imbi teko kenjindilimele. 50 Nanu ‘Imbi ola molopili!’ naa nilio, nalo ye te molemo akumuni ‘Na imbi ola molopili!’ nimbe nanga imbi lipe ola mundundulimo. Kanu yemone nane nilio mele kepe enone nilimele mele kepe mimi-sipe pilipe apurupe tene ‘Sike nikimu.’ nimbe pilipe molemo. 51 Nane enondo paa sike nimbu sikirumu: “Yembo te nanga ungumu pilipe lipe tepa molomba yembomo paa kamu naa kolopa molopa mindi pumbe.” nikiru.” nirimu.

52 Juda-ye-awilimene yundu ningendo: “Kinié olio pilkimulu, kuru te paa sike nunge konopune molemo lemo. Anda-kolepa Eporayamo kolorumu;^x Pulu Yemone ungu-umbu tondorumume pilku yemboma ningu siringi yema^y koloringila. Nalo nuni ninindu: “Nanga ungumu pilipe lipe molomba yembomo kamu naa kolomba.” nikinu. 53 Eporayamonga imbi manie-mele molopa nunge imbi ola molemoye? Yunge imbi paa ola, nalo yu kepe kolorumula. Pulu Yemone ungu-umbu tondorumume pilku yemboma ningu siringi yemboma kepe imbi ola molorumu nalo koloringila. Nunge imbimu ola enonga imbime manieye? Paa molo! Nu koropamo.” niringi.

54 Yesusini topondopa nimbendo: “Nane nanga imbi nanu lipu ola mundulkenje na imbi paa sike ola naa molka, na we mindi nilke. Nalo akumu mólo! Tata, yundu enone “Olionga Pulu Yemo.” nilimele kanumuni nanga imbi lipe ola mundundulimo. 55 Enone yu naa kanoko naa pilimele nalo nane yu kanopo pilio. Nane “Yu naa kanopo naa pilio.” nilkenje eno kolo tolime molemele mele na aku-sipu molka. Nalo nane yu paa sike kanopo pilipu, yunge ungumu pilipu lipu tepo molio. 56 Enonga anda-kolepa Eporayamone ‘Na mana-manie ombá walemo kanombo.’ nimbe pilipelie konopu sipe molorumu. Kanu walemo kamu kanopalie konopu sirimu.” nirimu.

57 Kanu-kinie Juda-ye-awilimene yundu ningendo: “Nunge ponie tokapu talo ou naa pora nili. Nu kango-yemo mindi. Pe nu “Eporayamo kanorundu.” nikinuye? Nuni yu manda naa kanorunu. Kolo tokono.” niringi.

58 Yesusini enondo nimbendo: “Nane enondo paa sike nimbu sikirumu: Eporayamo sike paa koronga-ou molopa kolorumu nalo yu ou naa molopili na molorundu.”^z nikiru.” nirimu.

59 Aku nirimu kulu pilkulie “Yu Pulu Yemo marake tepa ‘Pulu Yemo molio.’ nimbe nirimu kinie pilkulie, enone ‘Yu topo kondamili!” ningu kou liku yu tonge teringi. Nalo Yesusi lopi tepalie, ulke-tembelena kiyengo nimbe omba ulsu purumu.