Ungu-pulu mare inie yakondo gomo 1 molemo. Ye LLuku yu doketa ye te molorumu (Boku Kollosi 4:14). ‘Yu Juda-ye te mólonje. Juda-yembomanga ulsukundu yerenje.’ ningu pilimele. Yu Pollo-kinie pea andoringili (Boku Lipe Mundorumu Yema 16:10-17, 20:5-15, Boku Pe-Timoti 4:11, Boku Pillimono 24).

LLuku yuni yuyu “I bokumu tokoro.” nimbe para sipe naa torumu nalo yuni Lipe Mundorumu Yemanga bokumu sike torumu liemo ya boku Temane Peangamo kepe yuni yuyu sike torumula. Boku LLuku 1:3-4 kinie Boku Lipe Mundorumu Yema 1:1-2 kinie molemo ungu mare paa telu-sipe mele. Mateyu, Mako, LLuku, Jono keme, enone boku toringimenga LLukuni torumu bokumu kamu sulu. Temane mare Mateyu, Mako, Jono kanu yemane naa toringi temane mare yuyu torumu.

‘Olio mana-yemboma lipe tapondopa, Pulu Yemo bulu-sipu ulu-pulu-keri telemolomonga mindili nomolo aulkena molemolomonga wendo lipe, Pulu Yemo ye-nomi-kingimu molopa yemboma nokopa kondolemo yembo-talapena sukundu pupu molomolo ulu pulumu liemili!’ nimbe Yesusi olionga nimbe kolo wangopa kolondorumu mele ‘Paa pilipu kondamili!’ nimbe LLukuni i bokumu torumu.

LLukuni pilipelie i bokumu torumu ungu-pengémo mele 19:10 molemo (boku ambolkonomonga alsena anjokondo GLO Ungu-Pulu Mare nili “21. kisim bek 21.2.”). Yesusini yuyu “Yembomanga nimbu kolondambo tangi!” nimbe alieli konopuni kimbú-sipe molorumu ungu-tondolo te 9:51 molemo (Boku Jono 3:14-18).

Ungu te kamu piliéni! Ye talo molo yepoko molo kisene ungu telumu molo temane telumu bokune toringi nalo wale awisili laye lupe-lupe toringi. Temane te molo ungu te ‘paa mimi-sipu piliembo!’ ningulie bokumenga yu-mele-mele molemo mele kanokolie boku gomoma wendo liku pali mimi-siku kanani! I-sipe mele: Boku Mako 1:12-13 ponjili, Boku Mateyu 4:1-11 pora nili kinie Boku LLuku 4:1-13 pora nili kinie sulu-tepa. Kanu temanemo Mateyu LLukuselone telu-siku mele bokune toringili molemo, nalo angelloma oringi mele Mateyuni mindi torumu (4:11), Setenene “Walse kelepo ombó.” nirimu ungumu LLukuni mindi torumu (4:13). Ungu te Boku LLuku 11:13 molemo akumu Boku Mateyu 7:11 naa molemo. Boku LLuku 22:62 Pita kola terimu temanemo Boku Mateyu Mako-selonga molemola nalo Boku Jono 18:27 naa molemo.

Ya ungu-pulumu pora nikimu.