Yesusini Kongi-Sipisipime Kinie Sipisipimenga Tapu Yemo Kinie Akumendo Nirimu Temanemo
Akumunge, Kongi-Sipisipi Palamonga Ungu-Ikomo
10
(Pulu Yemonga ungumu. Kolomongo-kanga wane.)˻Yesusini yembo moloringimendo nimbendo: “Nane enondo paa sike nimbu sikirumu: “Ye te kongi-sipisipi pala-kerepulune suku naa pupe, we tenga topa tangondopa pulimo yemo yu wa noli yemo.a 2 Nalo ye te kerepulune suku pulimo yemo yu sipisipi nokoli yemo.b” nikiru. 3 Kerepulu nokoli yemone yunge kune lindilimo. Sipisipimene nokoli yemonga ungumu pilimele, yunge sipisipimenga imbime lepa pala-kerepulune ulsu memba pulimo. 4 Yunge sipisipime wendo lipelie, yu kumbi-lepa pulimo kinie yunge ungumu pilkulie eno lombili pulimele. 5 Ye-lupe tenga ungu nilimomo naa pilkulie yu lombili naa puku talopa leko pulimele.” nirimu.
6 Yesusini aku ungu-ikomo topa sirimu nalo ungu-pulumu naa pilieringi.
Yesusi Yu “Kongi-Sipisipimenga Tápu-Ye Peangamo Molio.” Nirimu Temanemo
7 Yesusini ˻kongi-sipisipimenga ungu-ikomo topalie nirimumuni, ungu-pulumu naa pilieringi kulu˼ kelepa ungu te pea nimbendo: “Nane enondo paa sike nimbu sikirumu: “Na sipisipimenga pala-kerepulumu.c 8 Na naa wambo ye-lupe ou oringi yema wa noli yema mindi, nalo enonga ungume sipisipimene naa pilieringi. 9 Na pala-kerepulumu. Yemboma ‘Sukundu pamili!’ ningulie na molombona ongema mindili nolemela aulkena wendo ongo na-kinie kapola molko sukundu pukud pena ongo era nongo tengemo. 10 Wa noli yemone wa nomba topa kondopa tepa kenjimbendo mindi olemo. Nalo nane ‘Eno konde molko paa molko kondangi!’ nimbu orundu.” nikiru.
11 “Na-nanu kongi-sipisipi tápu-tepo kondolio yemo. Sipisipi tápu-tepa kondoli yemone yunge sipisipime ‘Mindili naa nongo, kolou naa kolangi!’ nimbelie eno lipe tapondopa enonga nimbe kolo wangopa kolondomba telemo.e 12 Ye te yu sipisipi pulu yemo mólo, yu we kou-kongono mindi tepa sipisipime we nokondolemo, kanu we tápu tendeli yemo owa-takera tef ‘Sipisipi te topo nambo!’ nimbe olemo kinie kanopalie, yu sipisipime mundupe siye kolopa talopa lepa pulimo. Kanu-kinie owa-takeramone sipisipime topa bulu-balu silimo. 13 Yemo yu kou-kongono teli yemo mindi molopalie, sipisipime kondo naa kolopa yu talopa mindi lemo.
14-15 “Na-nanu sipisipi pulu yemo molopolie eno tápu-tepo kondolio. Tatane na kanopa pilimo nane yu kanopo pilio mele aku-sipe melela, nane nanga sipisipime kanopo pilio enone na kanoko pilimelela. Nane sipisipime eno ‘Naa kolangi!’ nimbu enonga kolo wangopo kolondombo. 16 Nanga sipisipi mare lupe molemelela, i ˻Juda-˼koleana sipisipime mindi mólo!g Na kanu sipisipi-wema kepe paa membo ombóla. Membo ombó kinie kanume nanga ungume pilku linge kinie pe sipisipime pali talape telumu mindi molonge, sipisipi pulu ye telu mindi molopa eno tápu-tepa kondomba. Akumu na.
17 “ ‘Na toko kondangi kolambo!’ nikirumunge Tatane na konopu mondolemo. Nalo ‘ ‘Kolopolie ónomo óno-koleana kamu leambo!’ ni naa nimbu, ‘Lomboropo ola molambo!’ nimbo.’ nimbu pilipulie ‘Na kolambo toko kondangi!’ nikiru. 18 Yembo tene na ‘Kolopili topo kondambo!’ ni naa nikimu; nanu konopuni pilipulie ‘Kolambo toko kondangi!’ nikiru. ‘Na kolambo toko kondangi!’ nikirumu nanu ‘Kolambo toko kondangi!’ manda nimbo. Kolopolie nimbomone, ‘Na altopo konde molambo!’ nimbomo nanu manda nimbo. I tembomo Tatane “Aku-siku tei!” nirimu mele tembo.” nikiru.” nirimu.
19 Yesusini aku nirimu kulu Juda-yembomane pilkulie eno altoko konopu telune naa pupili yu-mele-mele konopu liku mundoringi.
20 Yembo awisilini ningendo: “Yunge konopune kuru te molemomongah yu kekelepa topa aku-sipe ungumu nimbe kenjilimo. Nambemune yunge ungumu pilkimiliye?” niringi.
21 Nalo marene ningendo: “I ungu nikimume kuru te konopune molomba ye tene aku-sipe mele manda naa nilke. Kuru tene nambepa yembo tenga mongo keri lielimu manda tepa peanga tendelkaye?” niringi.i
Juda-Ye Awilimene “Yesusi Pulu Yemonga Malo Mólo!” Niringi Temanemo
22 Kanu-kinie Juda-yembomanga ulu te wendo orumu wale te wendo orumu. Koronga-ou yembo marene Pulu Yemo popo toko kaloringi ulke-tembelena teko kake tenderingi walemoj ponie tenga-tenga pilingendo Jerusalleme máku toringi aku walemo wendo orumu. Aku walemo kolea ali tepa kalopera torumu walemanga wendo orumu. 23 Kanu walemo wendo orumu kinie Yesusi ulke-tembele kere-pulune ‘Sollomononga’ ningu takoko anjo lsinginek andopa molorumu 24 kanu kinie yu molorumune Juda-ye awilimel ongo máku toko angilkulie yundu ningendo: “Olio konopu talo-tepo naa lipu mundupu molamili kene Pulu Yemone “Olio nokopa kondomba ye te lipu mundumbo.” nimbe mako torumu ye-nomi Kirasimu nu liemo olio mongo-toko ningu si!” niringi.
25 Yesusini topondopa nimbendo: “Nane aku yemo molio ou nimbu sirindu nalo ‘Sike nikimu.’ ningu naa pilimele. Nanga Tatane na namba sipe yunge kongonomo “tende-pou!” nirimu-nem ulu-tondolo teliomane na molio mele lipe ora silimo, 26 nalo eno nanga kongi-sipisipime naa molemelemonga molio mele nilio akumu ‘Kolo tokomo.’ ningu pilimele. 27 Nanga sipisipime nanga ungume pilimele. Nane eno kanopo imbi silio, eno na lombili olemele.n 28 Nane eno ‘konde molko mindi pangi!’ nilio. Eno mindili nongo molko kenjinge koleana naa punge.o Eno nane nokopo molambo yembo tene manda wendo naa limbe. 29 Tata yuni kanu sipisipime na sirimu yemo yu mélemanga pali olandopamo, yuni kanume nokopa molopili yembo tene manda wendo naa limbe. 30 Na kinie Tata kinie olto telumu.” nirimu.p
31 Juda-ye awilimene altoko kou-mulú liku Yesusi toko kondonge teringi, 32 nalo yuni enondo nimbendo: “Nane Tatanga ulu-tondolo awisili peangama eno lipu ora sipu terindu, akumenga témo kanoko keri kanokolie na kouni toko kondonge tekemeleye?” nirimu.
33 Juda ye-awilimene topondoko ningendo: “Ulu-tondolo terinumenga nu kouni topo kondomolo naa tekemolo. Nu we-mana-yemone Pulu Yemo liku ungu-taka tondoko nuni ninindu: “Na Pulu Yemo.” nilino, akumunge nu kouni topo kondomolo tekemolo.” niringi.
34 Yesusini topondopa nimbendo: “Pulu Yemonga boku nosilimelemongaq Pulu Yemone ungu te nimbendo:
“Nane eno ou nimbondo:
‘Eno pulu yema.’ nirindu kanumu.”r Konana 82:6
nirimu, nimbe bokune molemo. 35 Pulu Yemonga bokune ungu molemomane kolo naa tolemo, ungu nilimoma pepa mindi pulimo kanumu. Pe Pulu Yemone yunge ungu pilieringi yembomando “pulu yema.” nirimu liemo 36 Tatane mako topa ‘nanga yemo molopili!’ nimbe ma-koleana lipe mundorumu-ne orumu yemone “yu Pulu Yemonga Malo.” manda naa nimbéye? Pe nane “Na Pulu Yemonga Malo.” niliomonga nando “Pulu Yemo liku ungu-taka tondokono.” nambemu-ne nikimiliye?s 37 Tatane ulume telemo mele nane aku-sipu ulume naa tendu liemo na ‘sike yunge malo nikimu’ ningu naa piliengi! 38 Nalo Tatane ulume telemo mele nane sike aku-sipu ulume tembo kinie ‘Yu Pulu Yemonga Malo mólo! Kolo tokomo.’ ningu piliengi liemo aku kapola ulu-tondolo telioma kanokolie ‘Sike Pulu Yemonga ulu-tondoloma.’ ningu kanangi! ‘Tata na-kinie tapú-topa molemo, na Tata-kinie tapú-topo molio.’t ningu pilingendo aku-siku nane telio ulume kanokolie ‘Sike Pulu Yemonga ulu-tondoloma.’ ningu kanaa!” nirimu.
39 Yuni aku nirimumunge enone altoko yu ka singe teringi nalo yu eno mundupe kelepa yu purumu.u
40 Aku tepalie nirimumuni, Yesusi kelepa No-Jodane lumbilipe nekendo pupe, Jono ou yemboma no linderimu koleana pupe molorumu. 41 Kanu-kinie yembo awisili yu molorumune oringi. Ongolie ningendo: “˻No-Lindeli˼ Jonone sike ˻Pulu Yemonga kongono tenderimu mele˼ lipe ora sirimu ulu-tondolo telu kepev naa terimu, nalo i yemone pe omba molopa temba mele Jonone ou nimbe sirimu aku ungume paa sike nirimu.” niringi. 42 Kanu-kinie aku koleana yembo awisilini ‘Yesusi yu sike.’ ningu tondolo-munduku pilieringi.w