Śhunꞌullá listumá cayan taquicunawan taquiycunacpä.

Caymá sumä cushicuyní.

2 Jatun arpacuna,

uchuy arpacuna licaćhaculcayñari.

Am achicyalcuycäpis licaćhacuyña.

3 Tayta Diosllay,

malcacunäćhümá altuman juluycuśhayqui.

Nasyuncunäćhümá taquicunawan alawaycuśhayqui.

4 Rasun cayniqui sïlüpïpis mas jatu-jatun caśhanpïmá alawaycuśhayqui.

Chalapacuna cayniqui janay pachäcama caśhanpïmá alawaycuśhayqui.^a

5 Tayta Diosllay,

¡janay pachäcamamá altuman juluycuśha canqui!

¡Jinantin pachäćhümá sumä cayniqui cayan!^b

6 Uyaliycälimal munayniquiwan libraycälillämay.

Cuyaśhayquicunäta salbaycälillämay.

7 Niptïmi Tayta Dios chuya carpanćhu nin:

“Llallishäpi sumä cushicuywanmi Shiquem malcaćhu allpacta laquiycuśhä.

Maynu cushicuywanmi Sucot pampacunäta aypuycuśhä.

8 Galaadwan Manases yaꞌapañamá cayalcan.

Efrainmi cascünu umäta pacaycüní.

Judami mandanäpä aclaycuśhäca.

9 Moabñatacmi ichá paꞌacunalläpä mućhca.

Edompis śhucuynïta wicapaycunalläpämi.

Filisteo läducunäpis llallilcul apalinalläpämi” nil.

10 ¿Mayanmá Edomcama puśhaycamanman?

¿Mayanmá chay sumä murälläśha malcäcama puśhaycamanman?

11 ¿Manachun am Tayta Diosllá,

yaꞌacunacta jitälälimanqui imamá?

¿Am Tayta Diosllá,

pilyänïcunactapis manañachun liwshinqui imamá?

12 Ćhïnicünïcunacta llalliycälinäpä yanapaycälillämayꞌari.

Nunacunäpa yanapäcuyninꞌa yanꞌal-yanꞌalñamá.

13 Tayta Diospa yanapayninwanꞌa sumä lulaycunactalämá lulaycuśhun.

Paymá ćhïnicünïcunacta cuncaćhu jalülunꞌa.