Ćhïnicünincunap maquinpi libraycunanpämi mañacun
Saulpa maquinpïta maćhayman David ayiyalmi “Ama camacaycuychu” nishan tünuwan taquinapä Davidpa isquirbishan taqui. Taquïcunäpa puydïninpämi.a
57
Taytallay,
llaquipaycallämay.
Diosnillay,
amllamanmá chalapacú,
llaquipaycallämay.
Sumä camacaycuyca pasanancama
laplayquip lulïllanmanmá pacacuyculläśhä.
2 Janay pachäćhu cä Tayta Diosnïtamá ayaculläśhä.
Yanapaycamäní Diosnïtamá ayaculläśhä.
3 Paymá janay pachäpi cuyacuynintawan chalapacuna cayninta caćhaycamunꞌa.
Maquinta chacchalpaycamulmá
ćhïnicünïcunapïta salbaycamanꞌa.
Selah
4 Juyu nunacunap ćhawpinćhu cunćhäśhämá cayá.
Paycuna micuypi sumä-sumä wañupacuyä liyuncunänümá cayalcan.
Quiluncunapis lansawan flïchacunanümá cayan.
Alluncunapis afiläśha ispädanümá cayan.
5 Tayta Diosllay,
¡janay pachäcama
altuman juluycuśha cay!
¡Jinantin pachäćhu sumä cayniqui cachun!b
6 Ćhïnicünïcunam trampacta ćhuläläliman
chayman palpunäpä.
Pulinäpä caśhancämanmá ućhcucunacta lulälälin.
Chayman quiquincunamá jiꞌacalpälin.
Selah
7 Tayta Diosnillay,
śhunꞌullá
sumä listumá cayan alawaycunacpä.
Śhunꞌullá listumá cayan taquicunawan taquiycunacpä.
8 ¡Śhunꞌullay,
licaćhacuyñari!
¡Jatun arpacuna,
uchuy arpacuna licaćhaculcayñari!
¡Aspi-aspiyllamá śhalcuśhä!
9 Tayta Diosllay,
malcacunäpa nasyuncunäpa ćhawpinćhümá
taquicunawan alawaycuśhayqui.
10 Tayta Diosllay,
jatu-jatun llaquipayniqui janay pachäcamamá ćhäyan.
Rasun cayniquipis sïlücamamá ćhäyan.c
11 Tayta Diosllay,
¡sïlücamamá altuman juluycuśha canqui!
¡Jinantin pachäćhümá sumä cayniqui cayan!