Tayta Diosllaman chalapaculmi mañacun
Gat malcaćhu filisteocunaca Davidta chaläläliptinmi “Calućhu cä roble lantacunäćhu ulpay cäcuna” nishan tünuwan David isquirbishan taqui. Taquïcunäpa puydïninpämi. a
56
Tayta Diosllay,
llaquipaycallämayꞌari.
Nunacunämá aticaćhayalcäman.
Imay ürañapis usuchipäman,
ñacachipämanmá.
2 Ćhïnimänïcuna walan-walanmá jalutacayalcäman.
Nunatucüśhacunaca achca-achcamá aticaćhayalcäman.
3 Manchacuyćhu cayalꞌa
amllamanmá chalapacamú.
4 Tayta Diosman chalapaculmi limalicuśhanpi alawaycú.
Tayta Diosnïman chalapaculmi imactapis mana manchacüchu.
¿Nunacunällá imanämanꞌamá?b
5 Walan-walanmá limaynïta iwiyalcan.
Mana allinta lulapämänallanpämá limanacuyalcan.
6 Wicman-cayman pacacuśhtinmá
laśhćhüpa aticayalcäman.
Wañuchipämänanpämari ashicayalcäman.
7 Tayta Diosllay,
chay malcacunäta mana allinninman tincütari uycüluy.
Piñacuyniquiwanꞌari pampaman muyüchiy.
8 Llaquicuynïcunacta tuquictamá am yaćhaycunqui.
Wiꞌinïtapis tuquictamá am lisiycunqui.
Chaycuna ¿manachun libruyquićhu ćhuläśha cayan?
9 Yanapämänayquipä mañacuptí
ćhïnicünïcuna ayiculcanꞌamá.
Tuqui-tuquictamá yaćhá Tayta Diosní yaꞌawan caśhanta.
10 Payman chalapaculmi limalicuśhanpi alawaycú.
Tayta Diosman chalapaculmá limalicuśhanpi altuman juluycú.
11 Tayta Diosman chalapaculmi
imactapis manchacuná nï canchu.
¿Nunacunällá imanämanꞌamá?
12 Tayta Diosllay,
limalicuśhäcäta lulaycuśhämi.
Sulpäta uycuynïwanmá uycunäcäta uycuśhayqui.
13 Wañuycäpïmá salbaycamälanqui.
Palpunäpïtamá libraycamälanqui.
Chaynu lulayculanqui am Tayta Diospa acchinćhu puliycunäpämá.