Tincüninman cäraycunanpämi Tayta Diosta mañacun
“Ama camacaycuychu” nishan tünuwan taquinapä Davidpa isquirbishan taqui. Taquïcunäpa puydïninpämi.
58
Am puydïcuna,
¿tincüninmanchun cäraycuyalcanqui imatá?
¿Cällanman camachun nunacunäta licaycuyalcanqui imatá?
2 Mana allin lulayllamari śhunꞌuyquićhu timpuyan.
Jinaman lluy lulaśhayquiwanpis jinantin nasyunćhu mana allincunallactamá śhalcayächinquipis.
3 Mana allin nunacunaca mamanpa patanpïtañamá mana allinman muyupäcun.
Mamanpa patanpïtañamá artishcunaman muyülälin.
4 Paycuna sumä bininuyu culibranümá cayalcan.
Upatucuycü culibranümá linlinta quillpacaycälil mana uyalïtuculcanchu.
5 Chaymi culibraca chalänin taquipäśhantapis mana uyalïtuculcanchu.
Maynu ishpisha-ishpisha taquipäca captinpis manamá uyalïtuculcanchu.
6 Tayta Diosllay,
¡quiluncunacta paquïluy!
Taytallay,
¡liyuncunäpa wäsuncunacta paquiy-pawäluy!
7 Chumäśha yacunu chincapäcuchun.
Ćhächishan flïchancunapis lluy amshüchun.
8 Pulishancunäćhu alluśh-alluśhcänu chullupäcuchun.
Śhullüśha iñachanu acchïta ama licapäcuchunchu.
9 Maynümi mancaca caśhäpa caldayninta manaläpis sintiptin,
chaynuꞌari birdilä llullulä cacuptinpis sumä piñäśha waywaca juclla apacuchun.
10 Chaynu tincüninman cutiycachisha caśhanta licalmá allin nunacunaca cushiculcanꞌa.
¡Mana allin nunacunäpa yawarninćhülämá ćhaquintapis paꞌaculcanꞌa!
11 Chayćhümi nipäcunꞌa:
“Allin nunacunaca rasunpamá tincüninman allinpä licaycuśha cañanchic.
Cay allpäćhu Tayta Dios rasunpamá tincüninman cäraycü caña” nil.