Ćhïnicüninpïta libraycunanpämi Tayta Diosta mañacun
Wañuchiyta munayninwana Davidpa wasinta Saul awaytachiptinmi “Ama camacaycuychu” nishan tünuwan taquinapä David isquirbishan. Taquïcunäpa puydïninpämi.
59
Tayta Diosllay,
ćhïnicünïcunapïta libraycallämay.
Cuntrá śhalcücunäpïta ñawillayquićhu caycachimay.
2 Mana allin luläcunäpïta libraycallämay.
Wañuchicücunäpïta salbaycallämay.
3 Tayta Diosllay,
mana allin puydïtucücunämi
wañuchipämänanpä awaytayalcäman.
Mana juchayu allin cayaptïpis wañuchiytamá munapayalcäman.
4 Masqui ima mana allinllacta nï lulayaptïpis
camacapämänanpämá wañupacuyalcan.
Śhalculculñari yanapaycamäní śhamuy.
Imanuy caśhätapis licaycallämayꞌari.
5 Israelpa Tayta Diosnin,
sumä munayniyu Tayta Diosllay,
licaćhaculculñari lluy nasyuncunäta mućhuycachiy.
Chay ipanchä mana allin nunacunäta amari llaquipaycuychu.
Selah
6 Paycuna ishyay allꞌunüpis
canishtin tutanpa cutipämulmá
malcacta muyupämun.
7 Má licay,
pushumayta shiminpïpis ätuśhtinmá
sumä nana-nanay shiminwanlä:
“¡Mayanmá uyalimäśhun!”
nipäcun.
8 Amñatacmi Tayta Diosllay,
paycunapïta asicunqui.b
Lluy nasyuncunätamá asipanqui.
9 Yaꞌañatacmi am pacaycamänïman chalapacamú.
Am Tayta Diosllämá licaycamäní canqui.
10 Llaquipaycamäní Tayta Diosmi ñawpänïta puntaycun.
Ćhïnicünïcunacta llallishätamá licaycachiman.
11 Am Tayta Diosnïmá pacaycamäní canqui.
Ñatac malcá licaćhaculcänanpä jucllaćhuꞌa chaycunacta ama wañuchiychu.
Aśhwanpa munayniquiwan chiꞌilcachil uyshulächiy.
12 Shimincuna juchaculcäśhanpïta,
limaynincuna casquiculcäśhanpïta
nunatucücunaca trampancunaman palpupäcuchun.
13 Piñacuyniquiwan camacaycüluy.
Manaña caycälinanpä mana cäman muyüchiy.
Jacobpa milayninćhu quiquin Tayta Dios mandacüca caśhanta
jinantin pachäpis yaćhapäcuchun.
Selah
14 Paycuna ishyay allꞌunüpis
canishtin tutanpa cutipämulmá
malcacta muyupämunꞌa.
15 Micuyta ashishtinmá wicta-cayta pulipäcun.
Mana maćhacuyculñatacmi walächi waꞌapäcun.
16 Yaꞌañatacmi ichá munayniquipïta altuman juluycuśhayqui.
Llaquipäcuyniquipïta wäla-wälallapi alawaycuśhayqui.
Anmá licaycamäní canqui.
Anmá llaquicuynïcunaćhüpis sigüru pacaycamäní canqui.
17 Callpanchamäní Tayta Dios amtamá taquicunawan alawaycuśhayqui.
Tayta Dios anmá sigüru pacaycamäní canqui.
Tayta Dios anmá ama-pacha niycamäní canqui.