Ćhïnicünincunapïta yanapänanpämi Tayta Diosta mañacun
Aram lädu Naharaimwan, Sobawan pilyaśhanpi, jinaman Joab śhalcamul “Caćhi pampa” nishanćhu 12,000 Edom läducunacta wañuchishanpïmi “Limalicuśhan liryu” nishan tünuwan taquicta yaćhachinanpä David isquirbila. Taquïcunäpa puydïninpämi.a
60
Tayta Diosllay,
piñacuyniquićhu unꞌälälimanquimá,
jitälälimanquimá,
atajamänïcäta julülunquimá.
Cananꞌari callpacta cutiycälichillämay.
2 Cay jinantin pachäta śhaśhächilmá quićhacacächinqui.
Wichicacuyanmari,
laꞌalaśhancunacta allichaycuyñari.
3 Malcayquita sumä ñacaycunapamá pasaycachilanqui.
Sumä shincachicü bïnuctamá upyälächimälanqui.
4 Cäsucüniquicuna flïchacunäpi ayipäcunanpä
bandiracta pallalcachishayquiwan tantiaycachiy.
5 ¡Uyaliycälimal munayniquiwan libraycälillämay!
¡Cuyaśhayquicunäta salbaycälillämay!
Selah
6 Tayta Diosmi chuya carpanćhu nin:
“Llallishäpi sumä cushicuywanmi Shiquem malcaćhu allpacta laquiycuśhä.
Maynu cushicuywanmi Sucot pampacunäta aypuycuśhä.
7 Galaadwan Manases yaꞌapañamá cayalcan,
Efrainmi cascünu umäta pacaycüní,
Judami mandanäpä aclaycuśhäca.
8 Moabñatacmi ichá paꞌacunalläpä mućhca.
Edompis śhucuynïta wicapaycunalläpämi,
Filisteo läducunäpis llallilcul apalinalläpämi” nil.
9 ¿Mayanmá sumä murälläśha malcäcama puśhaycamanman?
¿Mayanmá Edomcama puśhaycamanman?
10 ¿Manachun am Tayta Diosllá yaꞌacunacta jitälälimanqui imamá?
¿Am Tayta Diosllá pilyänïcunactapis manañachun liwshinqui imamá?b
11 Nunacunäpa yanapäcuyninꞌa yanꞌal-yanꞌalñamá.
Cay ćhïnicünïcunacta llalliycälinäpä yanapaycälillämayꞌari.
12 Tayta Diospa yanapayninwanꞌa sumä lulaycunactalämá lulaycuśhun.
Paymá ćhïnicünïcunacta cuncaćhu jalülunꞌa.c