Tayta Dios ñawillanćhu licaycunanpämi mañacun
Cuirdayu tucacuwan taquinapä David isquirbishan taqui; taquïcunäpa puydïninpämi.
61
Tayta Diosnillay,
ayacuylläta uyaliycallämay.
Mañacuylläta ćhasquiycallämay.
2 Śhunꞌullá pasaypi jucmanyäśha cayaptinmá
masqui cay allpäpa lulinćhülä cayalpis amllacta mañacamullac.
Yaꞌapïpis mas altunnin wancamanꞌari julaycallämay.
3 Amllamá sigüru caycuná canqui.
Amllamá ćhïnicünïcunapïta sumä türrinu pacaycamäní canqui.
4 Wasillayquićhümá wiña-wiñaypä cawsaycuyta munallá.
Laplayquip lulïllanćhümá sigüru cayta munallá.a
Selah
5 Am Tayta Diosllämi ima limalicuśhäcunactapis uyaliycallämanqui.
Śhutiquita altuman juluycuśhüniquicunap tücänintamá uycallämanqui.
6 Mandacücäta achca watacuna cawsaycachiy.
Milaynincuna pasaptinpis cawsaycullächunꞌari.
7 Am Tayta Diosnïpa yanapaycuyllayquiwan mandachun.
Llaquipayniquiwan rasun cayniqui ñawillayquićhu caycachillächun.
8 Chaymari śhutiquita wiña-wiñaypä alawayculläśhä.
Limalicuśhäcunactapis walan-walanmi lulayculläśhä.