Tayta Diosllam pacaycamäní
Jedutun taquinanpä David isquirbishan taqui. Taquïcunäpa puydïninpämi.
62
Tayta Diosllaćhümi almallá jawca cawsayta taliycun.
Payllamá salbaycamäní.
2 Payllamá wancanu sigüru cä salbaycamäní.
Pay pacaycamäní cayaptinꞌa manamá imaypis palpuśhächu.a
3 ¿Cay nunacta imaycamamá
cućhpachiyta amcuna munayalcämanqui?
¿Imaycamamá tunïsha murällactanu
pampaman muyuchiyta munayalcämanqui?
4 Sumä allin caynïpïmá
mana allinman palpachipämänanpä wañupacuyalcan.
Articuycällactamá cuyapäcun.
Shimillanwanꞌa allin caycunäpämá niycapäman.
Śhunꞌunćhüñatacmi ichá mana allinćhu canäpä wañupacuyalcan.
Selah
5 Tayta Diosllaćhümi jawca cawsayta taliycú.
Payllaćhümi alcayní cayan.
6 Payllamá wancanu pacaycamäní;
payllamá salbaycamäní.
Pay licaycamäní cayaptinꞌa manamá palpuśhächu.
7 Tayta Diosllämi salbaycamäní;
payllam altuman julaycamäní.
Tayta Diosllämi wancanu pacaycamäní;
payllamá licaycamäní.
8 Malcacuna,
¡payllamanꞌari imaypis chalapaculcay!
¡Śhunꞌuyquićhu lluy cäcunäta talliycul payman aśhuycapäcuy!
¡Tayta Diosllamá pacaycamäninchic!
Selah
9 Rasunpa,
nunacunaca jämaynüllamá cayalcan.
Cäniyüpis wacchapis manamá imapischu capäcun.
Ishcaynintalä jucllachaycul tupuptinchicpis
manamá imallapis llasanchu.
10 Chayurá waycacuycämanꞌa amari chalapacuychu.
Nunap ima aycantapis quitacuśhayquiwan amari nunatucuychu.
Alli cäniyüman muyulpis
illayniquiman atinïdu ama cayaychu.
11 “Sumä munayniyu Tayta Diosmi cá” nil Tayta Dios nishanta
juc cutilla uyaliycuyalꞌa
achca-achca cutiñamá yaꞌa uyalilá.
12 Taytallay,
amllamá sumä llaquipayniyu canqui.
Amllamá lluy nunacunäta
lulapäcuśhanmannu-cama uycunqui.b