Mana allin nunaca juchactam cuyan
Ishyaycunaćhua cayal David yaćhaycachishanb taquicta isquirbishanmi. Taquïcunäpa purdïninpämi.
53
Luclu nunacunaca śhunꞌunćhümi nipäcun:
“Tayta Diosꞌa manamá canchu” nil.
Lluy-lluymá mana allincällaman palpülälin,
millachicuy lulaycunactamá lulayalcan.
Allincäta lulaycü manamá jucllayllapis canchu.c
2 Janay pachäpïmi Tayta Dios
lluy nunacunäta licapayämun.
Mayanllapis allin tantiaywan
Tayta Diosta ashiycü nunacta taliycunanpä.
3 Ñatac lluymá pintïlälin.
Lluy-lluymá mana allincällaćhu cayalcan.
Allincäta lulaycü manamá jucllayllapis canchu.
Manamá licachillapäpis canchu.d
4 ¿Mana allinta luläcunaca
tantacta micücänu malcäta lacsacalpälinanpä
mana tantiayniyücamachun imatá?
Tayta Diostá manamá uchuyllapis mañaculcanchu.
5 Paycuna imaypis mana manchaśhannümá
sumä-sumä manchapäcunꞌa.
Ćhïnicünincunap tulluncunacta Tayta Dios lluy wacäluptinmari
manchacuypi sumä-sumä chucchupäcunꞌa.
Pay jitaycüluptinmá pinꞌayćhu lluy uyshulapäcunꞌa.
6 ¡Israelta salbaycünin Sionpi śhamuptin maynu allinlä canman!
Tayta Dios malcanta cutiycachimuptin
maynu-maynütalä Jacob cushicunꞌa,
maynu-maynütalä Israel cushicunꞌa.