Mana allin nunaca yanꞌalmi alawacun
Edom lädu Doeg nuna mandacü Saulman lilcul: “Ahimelecpa wasinmanmi David lila” nil willaycuśhanpïtam cay taquicta David isquirbila. Taquïcunäpa puydïninpämi.a
52
Am munayniyü-tucüśhaca
¿imapïtá mana allin lulayniquipïta alawacunqui?
¡Tayta Diospa cuyacuyninꞌa mana camacaycümá!
2 Edom lädu,
Doeg alluyqui sumä afiläśha cuchillunümá.
Mana allin lulayllapi,
pampaman muyuchiyllapïmá wañupacuyan.
3 Allincäpïtá aśhwanpa mana allincäpïmá afanacunqui.
Rasuncäpïtá aśhwanpa articuycätamá cuyanqui.
Selah
4 Artish shimi,
imaymana mana allin
limaycunallapïmá wañupacuyanqui.
5 Chaymá Tayta Dios wiña-wiñaypä camacaycüśhunqui.
Chalalculmá wasiquipïta alapacüśhunqui,
cay allpäćhu cawsäcunäpïtamá wicapäśhunqui.
Selah
6 Chayta licapäculmi allin nunacunaca äśhalayllaman camapäcunꞌa.
Chay nunacunäpïtañatacmi ichá asipäcuyninwan nipäcunꞌa:
7 “Licapäcuy,
Tayta Diosman chalapacunantá
alli cänincunaman chalapacüśha cä nunacta.
Caynu cäniyüman muyülun juccunacta pampaman muyuchishanpamari” nil.
8 Yaꞌañatacmi ichá Tayta Diospa wasinćhu
sumä ulïbus lantanu cayá.
Tayta Diospa jatun cuyacuyninmanmá
wiña-wiñaypä yaꞌa chalapacú.
9 Taytay,
caynu lulaycuśhayquipïmá
wiña-wiñaypä alawaycuśhayqui.
Am,
allin caycuśhayquipïtamá chalapacüniquicunap ñawpäninćhu śhutiquita alawaycú.