Tayta Dios pampachaycunapämi mañacun
Betsabewan juchapacuśhanpïta willacü Natan anyapäluptinmi David llaquicul cayta isquirbila. Taquïcunapa puydïninpämi.a
51
Tayta Diosllay,
mana camacaycü
sumä cuyacuyniquimannuꞌari llaquipaycallämay.
Jatun allin śhunꞌuyquimannuꞌari
mana allinnïcunacta chincaycachillay.
2 Mana allin lulaylläcunacta paꞌaycallämay.
Juchalläcunacta chuyanchaycallämay.
3 Cuntrayqui lulaśhäta tantiacümá.
Juchäcuna umäpi manamá chincaycunchu.
4 Ampa cuntrallayquimá lulällá.
Cuntrayquimá mana allinta lulällá.
Ñawiquićhümá juchacta lulällá.b
Chaymá tincüninman-cama lawćhaycuyniqui cayan.
Chaymá cäninman-cama cäraycuyniqui cayan.c
5 Mamäpa patanpïtamá juchasapa callá.
Juchasapañamá näsimuläpis.
6 Allin śhunꞌuyu canätamá am munanqui.
Yaćhayniquita pacallapmá yaćhaycachimälanqui.
7 Hisopod jaćhawan chächuycamaptiquiꞌa
chuyanchäśhañaćh cayculläśhä.e
Paꞌaycallämaptiquiꞌa laśhtapïpis mas yulä-yuläñaćh cayculläśhä.f
8 Caśhanꞌari sumä cushicuyniquita uycallämay
amshuycamäśhayqui tullulläcunapis caśhan allin caycunanpä.
9 Juchalläcunacta amañari licaycuychu.
Mana allin lulaylläcunacta chincaycachiyñari.
10 Tayta Diosllay,
chuya śhunꞌuyütañari caycachillämay.
Muśhü allin śhunꞌuyümanñari muyuycachillämay.g
11 Am caśhayquipïta amari alapacallämaychu.
Yaꞌawan cä Chuya Ispirituyquita amari cutichicullaychu.
12 Salbaycamäśhayqui cushicuynïta cutiycachillämay.
Cäsucü allin śhunꞌuyütari tacyaycachillämay.
13 Chayćha mana cäsucücunäman
yaćhachicuyniquita yaćhaycachishä.
Jinaptïćha juchasapacunaca anman cuticalcämunꞌa.
14 Salbamäní Tayta Diosllay,
nunacunacta wañuchinäpi libraycallämay.
Chayćha tincüninman-cama
licaycü caśhayquipïta shimillá alawaycunꞌa.
15 Taytay,
shimilläta quićhaycallämay.
Chayćha shimillá altuman juluycuśhunqui.
16 Cañaywan uywacunacta uycunactá,
uycuywan uycunactá am manamari munanquichu.
Chayta munaptiquiꞌa uycucmanmá.h
17 Aśhwanpa am cushicunqui
tantiacü śhunꞌuyücunaca anman uculcaptinmá.
Am Tayta Diosllay,
awniycunqui mana nunatucullal wanacü śhunꞌuyücunätamá.i
18 Munaśhayquimannuꞌari Sionta allinllacta caycachiy.
Jerusalenpa murällancunacta caśhanꞌari śhalcachiy.
19 Chayläćha tincüninman uycuśhuśhayquicunacta,
pägaycuśhuśhayquicunacta,
cañaywan uycuśhuśhayquicunactapis ćhasquiycunqui.
Chayläćha uycuna patacćhüpis malta türucunacta uycälishunquiman.