Tayta Diosmi cäraycüca
Asafa isquirbishan taqui.
50
Lluy dioscunap sumänin cäcämi,
sumä munayniyücämi,
quiquin Tayta Diosninchicmi limamun.
Jinantin pachäćhu cäcunätamá ayachimun,
inti ishpimunanpïta aśhta inti jiꞌalpunancama.
2 Sumä tuqui-tuqui Sion malcapïtamá
Tayta Dios acchiyämun.
3 Tayta Diosninchicꞌa manamá upällachu śhayämun.
Camacaycünanpämá ñawpäninta nina śhayämun.
Muyülïnintamá sumä-sumä waywa śhayämun.
4 Malcanta cäraycunanpämari janay pachäta
cay allpäta licäpa ayalcamul nin:
5 “Japächäśhá nunäcunacta juntuycamuy.
Uywacta uycamal limalicamäcunäta juntuycamuy” nil.
6 Tayta Dios tincüninman-cama
cäraycüca caśhanta janay pachämi willacun.
Selah
7 Tayta Diosmi nin:
“Cuyaśhá Israel malca,
cärayquićhu niycuśhäta uyalimay.
Yaꞌallamá Diosniqui cayá.
Yaꞌallamá Taytayqui cayá.
8 Uywacunacta imaypis ñawpänïman uycamäśhayquipïchu,
pägaycamäśhayquipïchu manamá anyapac.
9 Wäcayquicunapi maltannintachu manamá mañayac,
nïtac canćhayquipi ulu capishniquicunapi ulunnintachu mañayac.
10 Yaꞌapamari munticunäćhu lluy uywacunäpis.
Yaꞌallapatacmá ulꞌucunäćhu walangantin-walangantin uywacunäpis.
11 Yaꞌapatacmi ulꞌucunäćhu pälïcunäpis.
Yaꞌallapatacmi ćhaclacunäćhu uywacunäpis.
12 Micanämaptin amtachu manamá niycucman.
Yaꞌapamá cay jinantin allpaca lluy cänintin.
13 ¿Türup aychanchun micuná imamá?
¿Ulu capishpa yawarninchun upyaná imatá?
14 Aśhwanpa Tayta Diosta sulpäta uycuyniquiwan altuman julaycäliy.
Janay pacha Diosman limalicuśhayquita uycuy.
15 Ñacayniquicunaćhu ayacamay.
Yaꞌami juluycuśhayqui,
amñatacćha altuman julaycamanqui” nil.
16 Mana allin luläcunätañatacmi Tayta Dios nin:
“¿Imapïtá camachicuynïta ancha-anchap limanquilä canpis?
¿Imapïmá limalicuynïta limalcunquilä canpis?
17 Anyapäśhacta ćhasquicuyta manamá munanquichu.
Limapaycuśhätapis manamá imapis ucuśhunquichu.
18 Suwacunäta licälulꞌa ipantam pasacunqui.
Aśhta mansibäducunäwanlämi juntunaculcanquipis.
19 Mana allincäpá shimiqui maynu-maynülämá.
Articuypá alluyquipis sumä ishpisha-ishpishamá.
20 Taycapacuyculmá malca-masiquip cuntran limanqui.
Quiquin wawꞌi-caśhayquitamá tumpaycunquilä canpis.
21 Chaycunacta lulayaptiquipis yaꞌa upällacuyculämi.
Chaychun ¿amnu juchasapa caśhäta pinsalanqui,
imatá?
Cananñatacmi cärayquićhu niycuśhayqui,
ñawiquimanmi śhatiycuśhayqui.
22 Tayta Diosta unꞌäcuna,
cay nishätari tantiaculcay.
Yanꞌalätac sumä camacaycüluptí pipis salbaśhüniqui canmanchu.
23 Sulpäta uycamä nunacunämá altuman julaycaman.
Allin caminuman cutiycamücätamá
yaꞌa salbaycuśhä” nil.