Jinantin pachäćhu cäcuna sumäta uyalipäcuy.

2 Uyalipäcuy sumä munayniyücäpis

mana munayniyücäpis,

wacchapis rïcupis.

3 Shimïpi yalamuśhanca

sumä yaćhaywanmá yalaycamun.

Śhunꞌüpi yalamuśhan niycuśhäcämá allin tantiaypä.

4 Allin limaycunamanmari tantiaycuśhä.

Arpacta tucayalmá manalä camalaycachisha cäcunätapis willaycuśhä.

5 ¿Imapïmá mana allincuna śhamuptin manchacuśhä?

¿Imapïmá ćhïnimänïcuna lluy cunćhälälimaptinpis manchacuśhä?

6 Cänincunaman chalapacüśha cäcunäta manamá manchacuná canchu.

Alawacü rïcucunäta manamá manchacuná canchu.

7 Mayanllapis cawsayninta manamá libracunmanchu.

Manatacmi salbacunanpä Tayta Diostapis pägaycunmantacchu.

8 Nunäpa cawsayninta salbaycuy sumä-sumä ćhaniyumá.

Nunäpa cawsayninta manamá maychicawanpis lantiycuchwanchu.

9 Manamá imactapis lulaycuchwanchu

mana wañullal wiña-wiñaypä cawsaycunapä.

Wañuycämanmari lluypis ćhaycälinꞌa.

10 Yaćhaśhanchicnüpis lluymi wañucülla canchic

yaćhayniyücäpis,

luclupis,

sunsupis.

Lluy cänincunañatacmari juccunapä quïdacunꞌa.

11 Masqui ćhaclancuna śhutinćhu

limayaptinpis sipultüranmi wiñaypä wasin.

Chayćhümá wiña-wiñaypä yaćhaycunꞌa.

12 Nunacunaca maynu cäniyu cayalpis

manamari wiñaypächu.

¡Uywacunanu chincacüllamá!^a

13 Chaynümi quiquillancunaman chalapacücunaca camacapäcun.

Chaynümi quiquillanta alawacücunaca chincapäcun.

14 Uwishcäta wañuycäman atishannümá chay nunacunäta wañuyca atiyan.

Ayllïluptinmá allin nunacunäpa maquinćhüña licalipäcunꞌa.

Allin callpancuna mana caśhanman licaliptinmá sipultürällaña wasin caycunꞌa.

15 Yaꞌap cawsaynïtañatacmi ichá wañuycäpa maquinpïta

Tayta Dios libraycamanꞌa.

Paymá quiquinman puśhacamanꞌa.

16 Waquincuna cäniyüman muyupäcuptin,

wasincunapis sumä llipyayäman muyupäcuptin amari manchaculcaychu.

17 Wañuculꞌa manamá imactapis apanꞌachu.^b

Sumä cänincunapis manamá ipantachu atinꞌa.

18 Masqui cawsayal cushisha cayalpis,

masqui rïcu cayninpïta nunacunaca alawapäcuptinpis,

19 awquilluncunanu wañunan muyunca ćhämunꞌamá.

Acchïta manañamá imaypis licanꞌañachu.

20 Maynu cäniyücuna cayalcalpis

caycunacta mana tantiapäculꞌa uywacunanüllamá chincaculcanꞌa.