Tayta Diosninchic sumä alawaycunamá

malcanćhüpis,

chuya ulꞌunćhüpis.

2 Jinantin allpäpa cushicuynin tuquish ulꞌümá.

Sion ulꞌümá sumä mandacücäpä rasun malcan.^a

3 Täpaśha cä sumä sigüru Sionćhümá Tayta Dios cayan.

Pacaycüca caśhantamari lisichicun.

4 Lluy mandacücunämi juntunacaycälil

chay malcap cuntran lluy lipäcula.

5 Licälälilñatacmi äśhalayllaman camälälila.

Manchacuypïmi ayiyta allacaycälila.

6 Manchacuyca ñiticalpuptinñatacmi

ishyacuyninćhu dulurniyu walminu wiꞌwintaycaćhaculcäla.^b

7 Inti ishpimunan lädupi waywa talcamü

Tarsis^c lädu barcucunäta

camacaycüśhancänümari camacaycülun.

8 Uyaliśhanchiccätanüllamá

sumä munayniyu Tayta Diospa malcanta

canan licaycunchic.

Cay malcanta quiquin Tayta Diosmari wiña-wiñaypä tacyaycachin.

9 Tayta Diosllay,

alawana wasiquićhu cayalcalmi

llaquipäcuyniyu caśhayquipïta sumä tantiaculcá.

10 Tayta Diosllay,

śhutiqui lisisha caśhayquimannümá

jinantin pachäćhu alawaycuśha canqui.

Munayniquiwanmá tincüninman-cama licaycunqui.

11 Allin tincüninmancama licaycuśhayquipïtamá

Sion ulꞌuca cushicun.

Judapa malcancunapis paćhcaycaćhapäcunmi.

12 Sion malcacta muyumulꞌari

ayca türrincuna caśhantapis fintaycälimuy.

13 Ipa wiñaycunäta willaycälinayquipä

murällancunacta sumäta licaycälimuy.

Pacacunapä sumä cäcunätapis tuquicta licaycälimuy.

14 Cay Tayta Diosninchicmá wiña-wiñaypä Taytanchic.

Paymá imaycamapis caminaycamäśhun.