Tayta Diosmi jinantin pachäpa mandacünin
Corepa milaynincunap isquirbishan taqui; taquïcunäpa puydïninpämi.
47
¡Lluy malcacuna cushicuypi maquiquita tällapäcuy!
¡Cushicuypi apalishtin Tayta Diosta alawapäcuy!
2 Janay pachäćhu cä Tayta Dios
maynu sumä manchaymá cacullan.
Payꞌa jinantin pachäpa sumä mandäninmá.
3 Lluy malcacunätam munayninchicman ćhulaycamula.
Lluy nasyuncunätam ćhaquinchicman ćhulaycamula.
4 Paymá tücäninchic allpacta aclaycapamälanchic.
Jacobta cuyaśhanpam uycamälanchic.
Selah
5 Sumä cushicuywan curnitillacunacta tucapäcuptinmá
Tayta Dios dispächunman ishpila.
6 ¡Mandacüninchic Tayta Diosta taquicunawan alawaśhun,
altuman juluycuśhun!
¡Payta taquicunawan jatunchaśhun,
alawaycuśhun!
7 ¡Tayta Diosmá jinantin pachäpa mandacünin!
¡Taquicunawanꞌari sumä alawaycäliy!
8 Tayta Diosmá jinantin nasyuncunäpa mandacünin.
Paymá chuya dispächunćhu täcuyan.
9 Nasyuncunap puydïnincunam yaꞌanchicwan juntunacälälin
Abrahampa Tayta Diosninta alawänanchicpä.
10 Tayta Diospa maquillanćhümá cay jinantin pachäćhu munayniyücunäpis cayan.
¡Payꞌa lluypïpis mas-masninlämá!