Yanapaycunanpämi Tayta Diosta mañacun
Zif nunacunaca: “¿Yaꞌacunaćhu manachun David pacalayan imamá?” nil Saulman willaycuśhanpïtam David isquirbila cuirdayu tucacuwana taquinapä. Taquïcunäpa puydïninpämi.b
54
Tayta Diosllay,
śhutiqui-laycu salbaycallämay.
Munayniquiwan tincünïman licaycallämay.
2 Tayta Diosllay,
mañacuylläta uyaliycallämay.
Ayacuylläta uyaliycallämay.
3 Mana lisisha nunacunämá cuntrá śhalcälälin.
Juyu nunacunämá wañuchimayta munacuyalcan.
Paycuna am Tayta Diostá uchuyllapis manamá yalpalcälishunquichu.c
Selah
4 Ñatac Tayta Diosnïmá yaꞌapa yanapaycamäní.
Paymá cawsayniyüta uywaycamäní.
5 Ćhïnimänïcuna mana allin lulayta munaśhanmannu Tayta Diosmá cutiycächinꞌa.
Taytallay,
chalapacuna caśhayquimannu camacaycüluy.
6 Śhunꞌüpi yalamuśhanpïtamá uycunacta uyculläśhayqui.
Tayta Diosllay,d
allin caśhayquipïtamá śhutiquita alawaycuśhä.
7 Lluy llaquicuynïcunapïtamá julaycallämanqui.
Ćhïnimänïcuna camacaycüśha caśhantamá licaycachillämanqui.