“Tayta Diosꞌa manamá canchu” nil.

Lluy-lluymá mana allincällaman liculcan.

Millachicuy lulaycunactamá lulayalcan.

Allincäta lulaycü manamá jucllayllapis canchu.^a

2 Janay pachäpïmi Tayta Dios lluy nunacunäta licapayämun,

mayanllapis allin tantiaywan

Tayta Diosta ashiycü nunacta taliycunanpä.

3 Ñatac lluymá pintïlälin.

Lluy-lluymá mana allincällaćhu cayalcan.

Allincäta lulaycü manamá jucllayllapis canchu.

Manamá licachinallanpäpis canchu.^b

4 ¿Mana allin luläcunaca mana

tantiayniyücamachun imatá,

tantacta

micücänu malcäta millpuypa-millpuyalcänanpä?

Tayta Diostá manamá uchuyllapis mañaculcanchu.

5 Tayta Dios cäsucünincunawan cayaptinñatacmi

chay nunacunaca manchacuypi sumä-sumä chucchupäcunꞌa.

6 Masqui paycuna wacchacunäpa lulay

munaśhancunacta jalutaculcaptinpis

Tayta Diosñatacmi ichá wacchacunäta

ñawillanćhu licaycun.

7 ¡Israelpa salbaycünin Sionpi śhamuptin maynu allinlä canꞌa!

Tayta Diospa malcanta cutiycachimuptin

maynu-maynütalä Jacob cushicunꞌa,

maynu-maynütalä Israel cushicunꞌa.