16
Diospa baulninta apaspankum churarqaku Davidpa sayachisqan karpapi hinaspam Diospa qayllanpi ofrecerqaku lliw kañana animalkunatawan Dioswan allinlla kasqankumanta ofrendakunata.
2 Chay ofrendakuna ofreceyta Rey David tukuruspanmi Tayta Diosta mañakurqa llapallan runakunata bendecinanpaq.
3 Lliw runakunamanmi otaq Israelpa llapallan castankunamanmi qarimanpas-warmimanpas aypuchirqa huk rosca tantata,
llapisqa datiles sutiyoq frutamanta tortillata hinaspa llapisqa uvas pasasmanta huk pedazo tortillata.
4 Leviy castakunamantam David churarqa Tayta Diospa baulninpa ñawpaqninpi servikuqkunata,
paykunamá cuentallikurqaku Tayta Diospa tukuy ima rurasqanta yuyarichinankupaq,
graciasta qonankupaq hinaspa Israelpa yupaychasqan Tayta Diosta alabanankupaq.
5 Asaf sutiyoq runam karqa paykunapa jefen,
payman qatiq jefen karqa Zacarias.
Wakinñataqmi karqa Jeiel,
Semiramot,
Jehiel,
Matatias,
Eliab,
Benaia,
Obed-edom hinaspa Jeiel.
Paykunam taksa arpakunatawan hatun arpakunata tocarqaku,
Asafñataqmi tocarqa platillokunata.
6 Benaiawan Jahazielmi sapa punchaw tocarqaku cornetillakunata Diospa contrato baulninpa qayllanpi.
Graciasta qospa Davidpa takisqanmanta
7 Davidmi chay punchawpi Asafmanwan llamkaqmasinkunaman chayllaraq qorqa kay takita Tayta Diosman graciasta qonankupaq:
8 Tayta Diosmanyá graciasta qoychik.
Sutinmantayá mañakuychik.
Runakunamanyá rurasqankunata reqsichiychik.
9 Paymanyá alabanzakunata takiychik.
Llapallan milagronkunamantayá rimaychik.
10 Chuya sutinmantayá qamkunaqa alabakuychik.
Tayta Diosta maskaqkunaqa
sonqoykichikpiyá kusikuychik.
11 Tayta Diostayá maskaychik.
Atiynintayá maskaychik.
Tukuy tiempoyá maskaychik.
12 Rurasqan milagrokunamantayá yuyariychik.
Admirakuypaq rurasqankunamantayá yuyariychik.
Sentencia rimasqankunamantayá yuyariychik.
13 Qamkunaqa kankichik
serviqnin Abrahampa mirayninkunam.
Qamkunaqa kankichik
akllasqan Jacobpa mirayninkunam.
14 Yupaychasqanchik Tayta Diosqa payllapunim.
Tukuy kay pachapi arreglaqqa payllapunim.
15 Payqa wiña-wiñaypaqmi
yuyachkan contrato rurasqantaqa
Waranqantin miraykunapaqmi
payqa yuyachkan kamachisqankunataqa.
16 Abrahanwan rurasqan contratotaqa
manam qonqanchu.
Isaacman jurasqan contratotaqa
manam qonqanchu.
17 Jacobpaqmi decretonta segurarqa.
Israelpaqmi contratonta wiñaypaq segurarqa.
18 Abrahanmanmi Tayta Dios nirqa:
“Qanmanmi qosqayki Canaan law allpata” nispa.
“Qanmanmi qosqayki tocanciaykichik allpata” nispa.
19 Paykunaqa asllaraq kachkaptinkum,
chaypi forastero kachkaptinkum,
20 nacion-nacion purichkaptinkum,
gobiernon-gobiernon purichkaptinkum
21 Dios mana consienterqachu
pipas ñakarichinanta.
Paykunarayku qaqchaspam
nirqa reykunata:
22 “Akllasqaykunataqa amayá llachpaychikchu” nispa.
“Willakuqkunataqa amayá imanaychikchu” nispa.
23 Kay pachapi llapallan kawsaqkuna,
Tayta Diosmanyá takiychik.
Salvacionninmantayá
sapa punchaw willakuychik.
24 Ancha reqsisqa kasqanmantayá
nacionkunapi willakuychik.
Milagrokuna rurasqanmantayá
runakunaman willakuychik.
25 Tayta Diosqa mayna hatunmi.
Payqa mayna alabanapaqmi.
Lliw dioskunamantapas respetanapaqmi.
26 Yanqakunallam
llapallan runakunapa diosninqa.
Tayta Diosmi ichaqa
cielokunata unancharqa.
27 Payqa sinchillataña kanchariqmi.
Payqa santuarionpi ancha atiyniyoqmi.
Payqa santuarionpi ancha kusichiqmi.
28 Runakunapa castankuna,
Tayta Diosqa anchallaña reqsisqa
kasqanmantayá rimariychik.
Tayta Diosqa anchallaña atiyniyoq
kasqanmantayá rimariychik.
29 Tayta Diospa sutin ancha reqsisqa
kasqanmantayá rimariychik.
Payllamanñayá ofrendakunata apamuychik.
Paypa ñawpaqninmanyá asuykamuychik.
Adorana pachakunawan pachakuspayá
Tayta Diosta adoraychik.
30 Kay pachapi llapallan runakunayá
katkatataychikqa paypa qayllanpiqa.
Paymi mana suchurinanpaq
kay pachata takyachirqa.
31 Cielokunapas kusikuchunyá.
Kay pachapas kusikuchunyá.
Nacionkunapipas niychikyá:
“Tayta Diosmi gobiernachkan” nispa.
32 Lamar qochapas qaparichunyá.
Chaypi kaqkunapas qaparichunyá.
Campokunapas kusikuchunyá.
Chaypi kaqkunapas kusikuchunyá.
33 Montepi llapa sachakunapas
Tayta Diospa qayllanpiyá kusikuchun.
Kay pachapi gobiernananpaq
hamuqpa qayllanpiyá kusikuchun.
34 Allin kasqanraykuyá
Tayta Diosman graciasta qoychik.
Wiñaypaq kuyapayakuq kasqanraykuyá
Tayta Diosman graciasta qoychik.
35 Qamkunayá niychik:
“Salvaq Diosllayku,
qampuniyá salvaykullawayku.
Nacionkunamantayá huñuykuwayku
qanman graciasta qonaykupaq.
Nacionkunamantayá huñuykuwayku
kusikuyllawanña alabanaykupaq.
36 Israelpa yupaychasqan Tayta Diosqa
alabasqayá kachun.
Wiñaymanta-wiñaykamayá payqa
alabasqa kachun.”
Llapallan runakunam “Amen” nispa Tayta Diosta alabarqaku.
37 Tayta Diospa contrato baulninpa ñawpaqninpim David churarqa Asaftawan paypa ayllunkunata,
paykunataqa churarqa baulpa ñawpaqninpi sapa punchaw imam ruranankupi servikunankupaqmi.
38 Churarqataqmi Obed-edomtapas soqta chunka pusaqniyoq llamkaqmasin runakunatawan,
Jedutunpa churin Obed-edonwan Hosañataqmi karqa punkukunawan cuentallikuqkuna.
39 Churarqataqmi sacerdote Sadoctapas sacerdotemasinkunatawan Tayta Diospa karpanpi kanankupaq,
chay karpaqa karqa Gabaon Moqopim.
40 Churarqaqa Tayta Diospa altarninpi lliw kañana animalkunata ofrecenankupaqmi.
Paykunaqa sapa tempranon hinaspa sapa tardeykuqtam ofreceqku,
ofreceqkuqa Israel casta runakunaman Tayta Diospa kamachisqanpi hinam otaq Tayta Diospa yachachikuynin libropi qellqasqaman hinam.
41 Paykunawantaqmi karqa Hemanwan Jedutunpas chaynataq sutin-sutin akllasqan wakin runakunapas takinankupaq.
Paykunam takirqaku:
Wiñaypaq kuyapayakuq kasqanraykuyá
Tayta Diosman graciasta qoychik.
42 Hemanwan Jedutunmi tocaqku cornetillakunata,
platillokunata hinaspa wakin tocanakunata,
paykunaqa compañaspankum tocarqaku Diosta alabaspanku.
Jedutunpa churinkunaqa punkukunawan cuentallikuqkunam karqaku.
43 Chaymantam lliw runakunaqa sapakama wasinkuman ripukurqaku.
Davidpas palacionmanmi kutikurqa familianpaq Diospa bendicionninta mañakunanpaq.