—Qawasqaykipi hinam ñoqaqa cedromanta palaciopi yachachkani,

Diospa contrato baulninñataqmi kachkan karpallapi —nispa.

2 Chaymi Natanñataq Davidta nirqa:

—Rurayá tukuy piensasqaykiman hina.

Diosmi qanwan kachkan —nispa.

3-4 Chay tutapunim Natanta Dios rimapayarqa serviqnin Davidman kaynata nimunanpaq:

—Manam qamchu temploytaqa rurapuwanki chaypi yachanaypaq.

5 Israelpa mirayninkunata horqomusqay punchawmantapunim kunan punchawkama templopiqa mana yacharqanichu.

Ñoqaqa yachana karpallapim kayman-chayman purirqani.

6 Tukuy tiempo Israelpa llapallan mirayninkunawan purichkaspaypas runaykunata kamachinankupaq oveja michiq hina churasqay runakunamantaqa manam haykapipas mañarqanichu Cedro tablamanta templota rurapuwanankupaqqa.

7 Chaynaqa Llapallan Kamachiq ñoqa Tayta Diospa nisqaytayá serviqniy Davidman kaynata nimuy:

“Ñoqam oveja michisqaykimanta horqomurqayki Israel casta runaykunapi jefe kanaykipaq.

8 Lliw purisqaykipi yanapaspaymi llapallan qanwan peleaq enemigoykikunatapas tukururqani,

kay pachapi atiyniyoqkunata hinam reqsisqata rurarqayki.

9 Israel casta runaykunapaqpas akllaruniñam huk sitiota,

chaypim churarqani paykunataqa manaña pipas kuyuchinanpaq hinaspa ñawpaq tiempopi hina mana allin ruraqkuna manaña ñakarichinanpaq.

10 Israel casta runaykunapi jefekuna churasqay tiempomantaraq rurasqayman hinam llapallan enemigoykikunata humillachisaq.

Ñoqa Tayta Diosmi prometeki castaykikunata mirachinaypaq.

11 Machuyaruspa abueloykikuna hina wañukuptikim kikikipa churikita churasaq gobiernananpaq hinaspam takyachisaq gobiernonta.

12 Paymi ñoqapaq templota ruranqa,

ñoqañataqmi takyachisaq gobiernonta wiñaypaq.

13 Ñoqam paypaq kasaq taytan,

payñataqmi ñoqapaq kanqa churiy.

Ichaqa ñawpasuqniki Saulmanta hinaqa kuyapayakuyniytam churikimanta mana qechurusaqchu.

14 Paytaqa akllasqay castapipas chaynataq gobiernoypipas wiñaypaqmi takyachisaq,

chaynapimá gobiernonqa wiñaypaq takyanqa” nispa.

15 Tukuy chay palabrakunaman hinam chaynataq tukuy chay mosqoyninpi qawasqanta hinam Davidman Natan willarqa.

16 Chaymi Tayta Diospa kasqanman Rey David yaykuykuspan ñawpaqninpi nirqa:

—Yupaychasqay Dios Taytalláy ¿pitaq ñoqaqa kani?

¿Pitaq castaykunapas kunankama qam yanapawanaykipaqqa?

17 Diosnilláy,

chaypas asllapaq rikchakapusuptikim kay serviqnikipa castay imaynam kananmantapas rimariykunkiraq.

Yupaychasqay Dios Taytalláy,

qamqa ancha reqsisqa runatapas hinaraqmi qawaykuwarqanki.

18 Dios Taytalláy,

reqsisqa rurawasqaykimantaqa ¿imatawanraqtaq ñoqaqa nikiman?

Kay serviqnikitaqariki qanmi reqsiwanki.

19 Dios Taytalláy,

kay serviqnikiraykum piensasqaykiman hina tukuy kay admirakuypaq kaqkunata rurarunki chaynapi tukuy kay hatun rurasqaykita qawachinaykipaq.

20 Dios Taytalláy,

qam hinaqa manam pipas kanchu.

Lliw uyarisqaykupi hinapas qanmanta huk Diosqa manam kanchu.

21 Israel runaykikuna hinaqa manam kanchu kay pachapi huk nacionqa.

Dioslláy,

qanmi hamuspa librarqanki runaykikuna kananpaq chaynapi allin reqsisqa kanaykipaq.

Egipto nacionpi runakunamantam libramurqanki hinaspam paykunapaq hatun manchakuypaq kaqkunata rurarqanki,

nacionkunatapas qarqorqankim kay allpata dueñochakunankupaq.

22 Qanmi Israel casta runaykikunata churarqanki wiñaypaqña runaykikuna kanankupaq hinaspam paykunapa Diosnin karunki.

23 —Chaynaqa Dios Taytalláy,

kay serviqnikimantawan mirayniymanta rimasqaykitayá wiñaypaq takyachiy.

Chaynatayá ruray nisqaykiman hina.

24 Prometesqaykitayá takyachiy sutiki wiñaypaq hatunchasqa kananpaq chaynataq runakunapas kaynata ninankupaq:

“Llapallan Kamachiq Tayta Diosqa Israel castakunapa Diosninmi” nispa.

Kay serviqniki Davidpa castaykunapas takyachunyá qampa yanapakuynikiwan.

25 Dioslláy,

kay serviqnikimanmi niwarqanki mirayniyoqta rurawanaykipaq.

Chayraykum kay serviqnikiqa kallpanchakuni chaynata mañakamunaypaq.

26 Dios Taytalláy,

qamllam Diosqa kanki,

kay allinkunatam kay serviqnikiman prometewarqanki.

27 Kunanmá kay serviqnikipa castayta munasqaykiman hina bendeciykunki chaynapi wiñaypaqña takyananpaq.

Dios Taytalláy,

qanmi paykunataqa bendecirqanki,

chaynaqa wiñaypaqmi bendecisqa kanqaku —nispa.