Enemigonkunata David vencesqanmanta
18
Chaykunapa qepantam Filistea runakunata David venceruspan humillaykachirqa.
Paykunamantam Gat llaqtatawan llaqtachankunata qechururqa.
2 Vencerurqataqmi Moab casta tropakunatapas,
paykunapi David munaychakuruptinmi impuestota pagarqaku.
3 Rey Davidqa vencerurqataqmi Soba nacionpa reynin Hadad-ezertapas,
chay Soba nacionqa kachkan Hamat lawpim.
Paytaqa vencerurqa Eufrates Mayu lawpi allpankunata kutichikunanpaq richkaptinmi.
4 Paykunamantam David qechururqa guerrapaq waranqa carretakunata,
presocharurqataqmi qanchis waranqa sillada soldadokunatapas chaynataq iskay chunka waranqa chaki-puri soldadokunatapas.
Pachak carretallapaqña caballokunata puchuykachispanmi carreta aysaq llapallan caballokunapa ankunta kuchurachirqa.
5 Damasco llaqta lawmantam Aram nacionniyoq tropakuna hamurqaku Soba nacionpa reynin Hadad-ezerta yanapanankupaq,
Davidmi ichaqa chay Aram nacionniyoq tropakunamanta wañurachirqa iskay chunka iskayniyoq waranqa soldadokunata.
6 Davidmi soldadonkunapaq cuartelkunata churarurqa Aram nacion Damasco llaqtapi chaymi Aram nacionniyoq runakunaqa Davidta servispanku pagarqaku impuestota.
Tayta Diosmi Davidta mayman peleaq riptinpas vencechirqa.
7 Hadad-ezerpa soldadonkunapa apamusqanku qorimanta harkachikuna armankutam David qechururqa hinaspam Jerusalen llaqtaman aparqa.
8 Hadad-ezerpa munaychakusqan llaqtakunamantam otaq Tibhat llaqtamantawan Cun llaqtamantam nana-nanaq bronceta Rey David apachimurqa.
Chay broncemantam Salomon rurachirqa yaku churanapaq hatun ruyru estanqueta,
rurachirqataqmi pilarkunatawan templopi broncemanta serviciokunatapas.
9 Soba nacionpa reynin Hadad-ezerpa lliw tropankunata David vencerusqanta Hamat nacionpa reynin Toi yacharuspanmi
10 Rey Davidman kacharqa churin Adoramta,
paywanmi apachirqa qorimanta,
qollqemanta hinaspa broncemanta serviciokunata,
kacharqaqa Hadar-ezerwan Rey David guerrapi kaspan vencerusqanmanta rimaykuspa alabamunanpaqmi.
Chay Toi sutiyoq reypas Hadad-ezerwanmi guerrapi karqa.
11 Adorampa apamusqan serviciokunatam Tayta Diospaq David sapaqcharqa.
Sapaqcharqataqmi munaychakusqan llapallan nacionkunamanta qechumusqan qori-qollqe apamusqankutapas.
Sapaqcharqamá Edom nacionmanta,
Moab nacionmanta,
Amonpa mirayninmanta,
Filistea nacionmanta chaynataq Amalec casta runakunamanta qechumusqantapas.
12 Sarviapa wawan Abisaimi wañurachirqa Edom casta chunka pusaqniyoq waranqa tropakunata Kachi Qechwawan sutichasqa sitiopi.
13 Edom nacionpi soldadokunapaq cuartelkunata David churaruptinmi Edom nacionniyoq llapallan runakunaqa Davidtaña servirqaku.
Tayta Diosmi Davidta mayman peleaq riptinpas vencechirqa.
Davidpa tropan kamachiqkunamanta
14 Davidmi lliw Israel nacionpi gobiernarqa hinaspam allinta ruraspa allin arreglota rurarqa llapallan runankunapaq.
15 Sarviapa wawan Joabmi llapallan tropakunapa kamachiqnin karqa.
Ahiludpa churin Josafatñataqmi karqa imapas pasaqkunamanta qellqaq.
16 Ahitobpa churin Sadocpiwan Abiatarpa churin Ahimelecñataqmi karqa sacerdotekuna.
Savsañataqmi karqa secretario.
17 Joiadapa churin Benaiam kamachirqa Ceret castamantawan Pelet castamanta kaq reyta waqaychaq soldadokunata.
Davidpa churinkunañataqmi karqa ñawpaqninpi yanapaqninkuna.