2 Chaynapim Israel casta runakuna Davidta saqeruspanku qatikurqaku Bicripa churin Sebata.

Juda casta runakunam ichaqa reyman sayapakuspa rirqaku Jordan Mayu patanmanta Jerusalen llaqtakama.

3 Jerusalen llaqtapi palacionman David chayaruspanmi palacion cuidananpaq saqesqan chunkantin compañerankunata churarurqa sapaq wasipiña.

Paykunamanta nanachikuspanmi hina kikintaq mantienerqa,

paykunawanqa manam uywanakurqañachu.

Paykunaqa viudakuna hinam wichqasqa kawsarqaku wañunankukama.

4 Amasatam rey nirqa:

—Kunanmanta kimsa punchawmanmi Juda casta soldadokunata huñuramuspa kaypi kanki —nispa.

5 Chaymi Amasa rirqa Juda casta soldadokuna huñumuq,

ichaqa citasqan punchawmanta masta unaramuptinmi

6 Davidqa Abisaitaña nirqa:

—Bicripa churin Sebaqa Absalonmantapas aswan mas dañotaraqmi rurawachwan.

Chaynaqa soldadoykunawanyá payta qatipay,

yanqañataq murallasqa llaqtakunata tariruspa pakakuruwachwan —nispa.

7 Joabpa soldadonkunam,

reyta waqaychaq Ceret casta hinaspa Pelet casta soldadokunapiwan hinaspa lliw valeroso soldadokunapiwan Jerusalen llaqtamanta Abisaiwan lloqsispa Bicripa churin Sebata qatirqaku.

8 Gabaon llaqta law hatun rumipa hichpanpi kachkaptinkum Amasa hamurqa paykunawan tupaykuq.

Joabmi karqa soldado pachayoq,

weqawninpiñataqmi watasqa karqa vainayoq espada.

Joab ichiptinmi vainanmanta espada wichirurqa.

9 Joabmi Amasata rimaykuspan nirqa:

—¿Hawkallachu kachkanki wawqelláy?

—nispa.

Alleq makinwanmi barbanmanta hapiykurqa muchaykunanpaq.

10 Amasaqa manam cuidakurqachu Joabpa makinpi espadamanta,

Joabmi Amasata wiksanpi tuksirurqa chunchulninkunapas pampaman tallikunankama.

Chaypunilla wañuruptinmi yapamantaqa manaña tuksirqachu.

Chaymantañam Joabqa wawqen Abisaipiwan Bicripa churin Sebata qatirqaku.

11 Joabpa huk kaqnin soldadonmi Amasapa ayanpa waqtanpi sayaykuspa nirqa:

—Joabtawan Davidta kuyaqkunaqa Joabtayá qatichunku —nispa.

12 Amasam chutaykachakuchkarqa yawarninpa hawanpiraq ñanpa chawpinpi,

ñannin sapa pasaqkuna sayaykuspa qawarayasqankuta chay soldado qawaykuspanmi Amasapa ayanta suchuchirqa ñanmanta chakra ukuman hinaspam chaypi pachawan tapaykurqa.

13 Ñanmanta suchurachiptinmi runakunaqa manaña sayarqakuchu chaymi Joabwanña pasarqaku Bicripa churin Sebata qatispanku.

14 Sebam Israel casta ayllukunapa lawninta pasaruspa chayarurqa Abel-bet-maaca llaqtaman,

Bicripa llapallan castan runakunam huñunakuruspanku llaqtaman paywan kuska yaykururqaku.

15 Joabpa llapallan tropankuna Abel-bet-maaca llaqtaman chayaruspankum llaqtata muyururqaku atacanankupaq.

Llaqtaman yaykurunankupaqmi llaqtapa murallanpa qepanman allpata montorurqaku,

Joabpa llapallan tropankunam llaqta harkaq murallata tuñichiypi rirqaku.

16 Chaymi llaqtamanta allin yuyayniyoq warmi qayaykachakamurqa:

—¡Uyariwaychik,

uyariwaychik!

Joabtayá niykapamuwaychik kayman hamunanpaq.

Paywan rimaytam munani —nispa.

17 Warmiman Joab asuykuptinmi chay warmi nirqa:

—¿Qamchu kanki Joab?

—nispa.

Chaymi Joabñataq nirqa:

—Arí,

ñoqam kani —nispa.

Hinaptinmi warmiñataq nirqa:

—Uyariykuwayá kay sirvientaykipa rimarisqayta —nispa.

Hinaptinmi payñataq nirqa:

—Niyá —nispa.

18 Hinaptinmi chay warmi kaynata nirqa:

—Ñawpaq tiempopim rimaqku kaynata:

“Pipas tapukuy munaqqa Abel llaqtapi tapukuchun” nispa.

Chaynapim ima asuntotapas arreglaqku.

19 Kay llaqtapi kaqkunaqa kaniku hawkalla kawsakuq runakunam chaynataq reypa qatiqnin runakunam.

Ichaqa qanmi kay llaqtata chinkarachiypi richkanki.

¿Imanasqamá Tayta Diospa herenciantaqa tuñichiyta munanki?

—nispa.

20 Chaymi Joabñataq nirqa:

—Chaytaqa manam piensayllapas-piensanichu.

Manam tuñichisaqchu nitaq purmachisaqchu.

21 Manamá chayqa chaynachu,

Efrain orqokunapi yachaq Bicripa churin Seba sutiyoq runam Rey Davidpa contranpi hoqarikurun,

chaynaqa payllatayá qoykamuwaychik hinaptinqa kutikusaqmi kay llaqtamanta —nispa.

Chaymi warmiñataq Joabta nirqa:

—Chay runapa umanta qoruruspaykum murallapa hawanta wischuramusaqku —nispa.

22 Chay warmim rirqa yuyaysapa kayninman hina llapa runakunawan rimamuq.

Hinaptinmi paykuna Bicripa churin Sebapa umanta qoruruspanku wischuykamurqaku Joabman.

Joab cornetata tocachiptinmi runakuna llaqtamanta anchurikuspanku sapakama wasinkuman ripukurqaku.

Joabñataqmi kutirqa reypa kasqan Jerusalen llaqtaman.

23 Joabmi karqa lliw Israel nacionpi tropakunapa kamachiqnin.

Joidapa churin Benaia sutiyoq runañataqmi kamachirqa reyta waqaychaq Ceret casta hinaspa Pelet casta soldadokunata.

24 Adoramñataqmi debalde llamkaqkunapa kamachiqnin karqa,

Ahiludpa churin Josafatñataqmi karqa imapas pasaqkunamanta qellqaq,

25 Sevañataqmi karqa secretario,

Sadocwan Abiatarñataqmi karqa sacerdotekuna.

26 Jair llaqtayoq Ira sutiyoq runañataqmi karqa Davidpa sacerdoten.