—Reymi llumpayllataña waqachkan Absalonmanta —nispa.

2 Chay guerra ganasqanku punchawmi llakikuy punchawman tikrakururqa llapallan runakunapaq.

Chay punchawpimá llapallan runakuna uyarirurqaku reyqa churinmanta llakipi kasqanta.

3 Chay punchawmi llapallan soldadokuna yaykurqaku llaqtaman pakakuspalla,

yaykurqakuqa guerrapi vencerachikamuspa penqakuymanta pakan-pakanlla yaykuchkaq hinam.

4 Reyñataqmi uyanta tapakuykuspan qaparillawanña waqarqa:

5 Chaymi reypa wasinman Joab rispan nirqa:

—Kunanmi penqayman churarunki llapallan serviqnikikunata.

Paykunam librarqaku vidaykita,

churikikunapa vidanta,

warmikikunapa vidanta chaynataq compañeraykikunapa vidantapas.

6 Cheqnisuqnikikunata kuyaspam kuyasuqnikikunatañataq cheqninki.

Kunanmi qawaykachikunki tropa kamachiqkunamantapas chaynataq serviqnikikunamantapas mana imapas qokususqaykita.

Kusisqachá qamqa kawaq karqa Absalonlla kawsaptin ñoqaykuñataq llapallayku wañuptiykupas.

7 Kunanpuniyá hawaman lloqsispayki serviqnikikunata allinllata rimapayamuy,

mana chaynata ruraptikiqa manachá chullallapas kunan tutaqa qanwan puchunqachu,

chaytaqa Tayta Diosraykum jurani.

Mozo kasqaykimanta kunankama mana allinkuna pasasusqaykimantapas aswan mana allinmi kayqa karunman —nispa.

8 Chaymi rispan rey tiyarqa llaqtapa zaguan patio tiyananpi.

Reyqa zaguanpa pationpi tiyasqanta llapallan runakuna yacharuspankum llapallanku reyman presentakurqaku.

Israel castakunaqa sapakamam ripukurqakuña wasinkuman.

9 Israelpa mirayninmanta kaq llapallan ayllukunam atipanakuspanku kaynata ninakurqaku:

—Rey Davidqa librawarqanchikmi enemigonchikkunamanta,

Filistea runakunamantapas salvawarqanchikmi ichaqa Absalonwan guerrapi kasqanraykum payqa lluptirurqa.

10 Absalontam aceitewan tallispa reyninchikpaq churarqanchik.

Ichaqa payqariki guerrapim wañurun hinaptinqa ¿imanasqataq upallalla kachkanchik reyta mana kutichimuspa?

—nispa.

11 Israel casta llapallan runakunapa rimasqankuta Rey David maymi kasqanpi uyariruspanmi kacharqa sacerdote Sadocmanwan sacerdote Abiatarman Juda lawpi ancianokunata kaynata nimunankupaq:

—¿Imatataq qamkunaqa suyachkankichik palacioyman mana kutichiwanaykichikpaqa?

12 Qamkunaqa castamasiy aylluykunam kankichik ¿imatataq qamkunaqa suyachkankichik mana kutichiwaspaykichik?

—nispa.

13 Amasa sutiyoq sobrinontapas kaynatam nichimurqa:

—Qamqa castamasiy aylluymi kanki.

Joabpa rantinpim llapallan tropakuna kamachiqpaq churasqayki.

Mana chaynata cumpliptiyqa Tayta Diosyá llumpayta castigawachun —nispa.

14 Chaynata willachimuspanmi Juda lawpi llapallan runakunata Amasa convencerachirqa chaymi huk runa hinalla reyta nichimurqaku:

—Reylláy,

kutikamuyá serviqnikikunapiwan —nispa

15 Chaymi rey kutimuspan chayaramurqa Jordan Mayukama.

Juda casta runakunam rirqa Gilgal llaqtakama reyta chaskinankupaq hinaspa Jordan Mayuta pasachimunankupaq.

16 Rirqataqmi Benjaminpa mirayninmanta kaq Bahurim llaqtapi yachaq Gerapa churin Simeipas,

Juda casta runakunawanmi kallpaylla rirqa Rey Davidta chaskinankupaq.

17 Simeiwanmi rirqaku Benjamin castamanta waranqa runakuna.

Rirqataqmi Saulpa castanpa sirvienten Siba sutiyoq runapas,

payqa rirqa chunka pichqan churinkunapiwanmi chaynataq iskay chunka sirvientenkunapiwanmi.

Jordan Mayuta rey manaraq chimpamuchkaptinmi paykuna yakuman yaykurqaku

18 reypa familiankunata chimpachimunankupaq chaynapi reypa munasqanta ruranankupaq.

Jordan Mayuta rey chimpamunanpaq kachkaptinmi Gerapa churin Simei paypa ñawpaqninpi qonqoranpa pampaman kumuykurqa.

19 Hinaspam reyta nirqa:

—Señor reylláy,

Jerusalen llaqtamanta lloqsimusqayki punchawpi mana allin rurasqaymantaqa amayá huchachawaychu.

Amañataqyá chaytaqa yuyaychu.

Amañataqyá sonqoykipi waqaychaychu.

20 Kay serviqniki huchallikusqayta reqsikuspaymi kunanpas Josey casta runakunamanta puntataraq hamurqani qam señor reyniyta chaskinaypaq —nispa.

21 Chaymi Sarviapa wawan Abisai nirqa:

—Tayta Diospa churasqan aceitewan tallisqa reyta ñakasqanmantaqa ¿manachum Simeiqa wañunqa?

—nispa.

22 Davidmi nirqa:

—Sarviapa wawankuna,

kayqa manam qamkunapa asuntoykichikchu.

¿Imanasqataq qamkunaqa contraypi rikurirunkichik?

Kunanqa yachanipunim Israel nacionpi rey kasqayta,

chaynaqa ¿yaqachum kunan punchaw pipas wañunman Israel nacionpi?

—nispa.

23 Chaymi reyñataq juraspa Simeita nirqa:

—Manam wañunkichu —nispa.

24 Saulpa willkan Mefi-bosetpas rirqam reyta chaskimuq.

Rey pasakusqanmantapunim Jerusalen llaqtaman hawkalla kutimunankama chakintapas mana hampikurqachu,

manataqmi barbantapas kaptakurqachu nitaq pachantapas taqsakurqachu.

25 Reyta chaskinanpaq Jerusalen llaqtaman Mefi-boset riptinmi reyñataq nirqa:

—Mefi-boset ¿imanasqataq mana ñoqawanchu rirqanki?

—nispa.

26 Paymi nirqa:

—Señor reylláy,

sirvienteymi engañaruwarqa.

Kay serviqnikiqa wistu kasqayraykum payta nirqani:

“Asnota caronaykapuway,

sillakuykuspay reywan rinaypaq” nispa.

27 Chaynata niptiypas señor reynilláy,

sirvienteymi qampa qayllaykipi calumniaruwarqa.

Ichaqa qamqariki kanki Diospa angelnin hinam,

chaynaqa munasqaykiman hinayá ruray.

28 Taytaypa llapallan familiankunam wañunan yachakurqa qampa qayllaykipi aswanqa qanmi kay serviqnikita convidawarqanki qanwan kuska mikunaypaq.

Chaynaqa reynilláy ¿imataraqtaq masta reclamaykiman?

—nispa.

29 Reymi nirqa:

—Manañam mastaqa rimachwanñachu.

Kunanpunim kamachiki Siba sutiyoq sirvientekiwan chakrakunata partenakunaykichikpaq —nispa.

30 Chaymi Mefi-bosetñataq nirqa:

—Sibayá dueñochakuchun llapallan chakrakunataqa,

ñoqapaqqa qam señor reyniy hawkalla palacioykiman kutikamusqaykim aswan allinsu —nispa.

31 Galaad law Barsilaipas Rogelim llaqtanmantam hamurqa Jordan Mayuta reywan kuska chimparuspa paymanta despedikuykunanpaq.

32 Barzilaiqa karqa pusaq chunka watayoq yuyaqñam.

Mahanaim llaqtapi kachkaptinmi reyta Barzilai mantienerqa apu-apu kasqanrayku.

33 Reymi nirqa Barzilaita:

—Haku Jerusalen llaqtaman,

chaypim ñoqa mantienesqayki —nispa.

34 Chaymi Barzilaiñataq nirqa:

—Manañam unay watataqa kawsaymanchu Jerusalen llaqtaman qam reyniywan rinaypaqqa.

35 Pusaq chunka watayoqñam kani.

Mikusqaypa chaynataq tomasqaypa gustontapas manañam musyaniñachu allin otaq mana allin gustoyoq kasqantapas.

Manañam atinichu qaripa otaq warmipa takisqan uyariytapas.

Yanqañachá ñoqataqa nanachikuwankimanpas.

36 Kay serviqnikiqa compañasqayki Jordan Mayupa waklaw chimpankamallañam.

Chaynaqa amañayá ofrecewaychu chay tukuy niwasqaykitaqa.

37 Aswanqa ruegakuykim llaqtayman kutikunaypaq chaynapi wañukuspapas tayta-mamaypa sepulturanpa hichpanpi pampakunaypaq.

Kayqaya serviqniki Quimam,

payña qanwan riptinyá paypaq ruray imam munasqaykita —nispa.

38 Chaymi reyñataq nirqa:

—Chaynaqa Quimamyá ñoqawan richun.

Ñoqachá rurasaq paypaq imam munasqaykita,

rurasaqtaqmi paypaq imakunam mañawasqaykitapas —nispa.

39 Llapallan runakunam Jordan Mayuta chimparurqaku.

Reypas chimparuspanmi Barzilaita muchaykuspa Tayta Diospa bendicionninta paypaq mañapurqa.

Chaymi Barzilaiqa wasinman kutikurqa.

40 Reyñataqmi pasarqa Gilgal llaqtaman Quimam sutiyoq runawan kuska.

Rirqakutaqmi Juda casta llapa runakunapas chaynataq Israel castamanta lamitad runakunapas.

41 Israel casta llapallan runakuna reyman rispankum nirqaku:

—Qam reyniykutaqa ¿imanasqataq Juda casta aylluykuqa dueñochakurusunki chaynapi qamta,

familiaykikunata chaynataq qampa llapallan tropaykikunata Jordan Mayuta chimpachimunankupaqqa?

—nispa.

42 Chaymi Israel casta runakunata Juda casta runakuna nirqaku:

—Reyqariki ñoqaykupaqa aylluykum.

¿Imanasqataq qamkunaqa piñakunkichik chay rurasqaykumanta?

¿Icha reypatachu imantapas mikururqaniku otaqchum ima regalotapas chaskikururqaniku?

—nispa.

43 Chaymi Israel casta runakunañataq nirqaku:

—Chunka ayllukuna kasqaykuraykum Rey Davidqa chunka kutita pertenecewanku,

chaynaqa ¿imanasqamá despreciawankikuqa?

¿Manachu ñoqayku puntata rimanakurqaniku reyniykuta kutichimunaykupaqqa?

—nispa.

Juda casta runakunam ichaqa Israel casta runakunamantapas aswan mas piñachina kaqkunataraq rimarqaku.