—Ñoqapas qamkunawan kuskam peleaq risaq —nispa.

3 Chaymi tropakunañataq nirqa:

—Manapunim riwaqchu ñoqaykuwanqa.

Enemigonchiktaqa manachá imapas qokunqachu ñoqayku lluptiptiykupas otaq lamitad soldadokuna wañuptiykupas.

Qamqa valenki chunka waranqa soldadokuna hinam.

Aswan allinqa kanman llaqtallapi kaspayki kay llaqtamanta yanapamuwanaykikum —nispa.

4 Hinaptinmi reyñataq nirqa:

—Qamkunapa munasqaykichikman hinayá rurasaq —nispa.

Llaqta zaguan punkupa ladonpi rey sayachkaptinmi tropakuna lloqsirqaku pachak-pachakmanta,

waranqa-waranqamanta.

5 Reymi kamachirqa Joabta,

Abisaita hinaspa Itaita kaynata:

—Ñoqaraykum churiy Absalonta allinllata rurankichik —nispa.

Llapallan tropakunam uyarirqaku lliw kamachiqkunaman Absalonmanta reypa kamachisqanta.

6 Davidpa tropankunamá lloqsirqaku Israel tropakunawan peleaq.

Efrain Montepi peleaptinkum

7 Israel tropakuna vencerachikurqaku Davidpa tropankunawan.

Chay punchawpim wañururqaku iskay chunka waranqa soldadokuna.

8 Guerrapi peleaqkunam enteron chay lawpi cheqerurqaku.

Espadawan wañuqkunamantapas mastaqa montepim aswan mastaraq wañururqaku.

9 Absalonmi mulanpi sillada richkaspan Davidpa tropankunawan tupanakururqa chaymi mulan yaykururqa kallmasapa hatun encina sachapa ukunman.

Chay sachapi chukchan arwikuruptinmi Absalonqa sachamanta warkukururqa hinaptinmi mulanñataq pasakurqa.

10 Payta huk runa rikuruspanmi willarqa Joabman:

—Absalontam rikuramuni encina sachapi warkurayachkaqta —nispa.

11 Joabñataqmi nirqa chay willaqnin runata:

—¡Rikuchkaspaykiqa pampaman wichinankamachiki wañurachiwaq karqa!

Ñoqam qoykiman karqa pachak gramo qollqetawan weqaw watanata —nispa.

12 Hinaptinmi chay runañataq Joabta nirqa:

—Chunka kilo qollqetaña qowaptikipas manam imanaymanchu karqa reypa churintaqa.

Reymi kamachisurqankichik qamta,

Abisaita hinaspa Itaita:

“Churiy Absalontaqa amam imanankichikchu” nispa.

Chaytaqa ñoqaykupas uyarirqanikum.

13 Chaynaqariki vidaypa contranpich rurayman karqa.

Reypaqqa manam imapas pakasqaqa kanchu.

Qampas manam yanapawankimanchu karqa —nispa.

14 Hinaptinmi Joabñataq nirqa:

—Qanwanqa yanqañam tiempota pierdeni —nispa.

Chaynata niruspanmi kimsa lanzawan Absalonta corazonninpi clavarurqa encina sachapi warkurayachkaqta.

15 Joabpa arman apaq chunka mozokunapas Absalonpa muyuriqninpi churakuspankum wañupaykachirqaku.

16 Cornetata Joab tocachiptinmi soldadonkunaqa manaña qatikacharqakuchu Israel casta runakunataqa.

Chaynatamá Joab tropankunata harkarurqa.

17 Absalonpa cuerpontañataqmi wischuykurqaku montepi hatun uchkuman hinaspam hawanman montorurqaku achka rumikunata.

Israel casta soldadokunañataqmi sapakama ayqekurqaku wasinkuman.

18 Absalonmi kawsachkasparaq rurachirqa huk monumentota “Reypa Wayqon” nisqanku sitiopi.

Paymi nirqa:

—Manam ñoqapaqa kanchu churiypas sutiy yuyarisqa kananpaq —nispa.

Chay monumentotam suticharqa kikinpa sutinwan.

Chaymi “Absalonpa Monumenton” nispa sutichanku kunan tiempokama.

19 Sadocpa churin Ahimaasmi Joabta nirqa:

—Ama hina kaspayá kachaykuway kallpanaypaq,

reymanyá willaramusaq imaynatam enemigonkunamanta Tayta Diospa librasqanmanta —nispa.

20 Chaymi Joab nirqa:

—Kunanqa manaraqmi willamuwaqchu,

huk punchawñam willaspaqa-willamunki.

Reypa churin wañusqanraykum mana willamuwaqchu —nispa.

21 Ichaqa Joabmi nirqa Cus nacionniyoq huk soldadota:

—Qam rispayki willamuy reyman imam rikusqaykita —nispa.

Hinaptinmi chay Cus nacionniyoq soldadoqa Joabpa ñawpaqninpi kumukuykurqa,

chaymantañam kallparqa.

22 Sadocpa churin Ahimaasñataqmi huktawan Joabta nirqa:

—Ima kaptinpas ñoqapas kallpasaq Cus nacionniyoq soldadopa qepanta —nispa.

Joabmi nirqa:

—Churilláy ¿imapaqtaq kallpawaq?

Willamusqaykimantaqa manam premiota chaskiwaqchu —nispa.

23 Chaymi Ahimaas nirqa:

—Ima kaptinpas kallpasaq —nispa.

Hinaptinmi Joab nirqa:

—Kallpayá —nispa.

Chaymi Ahimaas pampan kaq ñanninta kallpaspan Cus nacionniyoq soldadota llallirurqa.

24 Davidmi tiyachkarqa llaqtapa zaguanninpa iskay punkupa chawpinpi.

Llaqta cuidaqñataqmi seqarurqa zaguanpa alton pampaman.

Chaymanta qawarispanmi rikururqa huk runa sapallan kallpamuchkaqta.

25 Llaqta cuidaqmi qaparispan reyman willarqa.

Hinaptinmi reyñataq nirqa:

—Sapallan hamuspaqa allin noticiatam apamuchkan —nispa.

Chay kallpaq runa astawan hichpamuptinmi

26 Llaqta cuidaqñataq rikururqa huk runatapas kallpamuchkaqta hinaspam qayarqa punku cuidaqman:

—Huk runapas sapallanmi kallpamuchkan —nispa.

Chaymi rey nirqa:

—Chay runapas allin noticiatach apamuchkan —nispa.

27 Llaqta cuidaqmi nirqa:

—Punta kallpamuqpa kallpamusqanmi rikchakun Sadocpa churin Ahimaaspa kallpamusqanman —nispa.

Chaymi rey nirqa:

—Chay runaqa allin runam.

Allin noticiatachá apamuchkan —nispa.

28 Ahimaas chayaruchkaspanñam qayarikuq hina reyta rimaykurqa,

reypa ñawpaqninpi qonqoranpa pampaman kumukuykuspanmi nirqa:

—Yupaychasqanchik Tayta Diosyá alabasqa kachun.

Paymi makiykuman churaykamurqa qam Señor reyniypa contranpi hoqarikuqkunata —nispa.

29 Chaymi reyñataq tapurqa:

—¿Allinllachu kachkan churiy Absalon?

—nispa.

Hinaptinmi Ahimaasñataq nirqa:

—Joab kachamuwachkaptinmi rikurqani achkallaña montonasqa runakunata ichaqa manam yacharqanichu imam pasasqanta —nispa.

30 Chaymi reyñataq nirqa:

—Suchurispa chay lawpi sayay —nispa.

Hinaptinmi Ahimaas chaynata rurarqa.

31 Chay ratollapim Cus nacionniyoq soldado chayaramuspan nirqa:

—Señor Reylláy,

chaskiy kay allin noticiakunata.

Kunanmi Tayta Dios allin arreglota ruraykapusunki qampa contraykipi llapallan hoqarikuqkunamanta librasuspayki —nispa.

32 Reymi tapurqa Cus nacionniyoq soldadota:

—¿Allinllachu kachkan churiy Absalonqa?

—nispa.

Hinaptinmi Cus nacionniyoq soldadoñataq nirqa:

—Chay runa hinayá kachun qam señor reyniypa enemigoykikunaqa chaynataq daño rurasunaykipaq contraykipi llapallan hoqarikuqkunapas —nispa.

33 Chaymi rey hukmanyaruspan zaguanpa altonpi cuartoman waqastin seqarqa.

Waqastin rispanmi nirqa: