Ahitofelpa consejasqanta Husai yanqachasqanmanta
17
Ahitofelmi nirqa Absalonta:
—Chunka iskayniyoq waranqa soldadokunata akllaykuspaymi kunan tutapuni Davidta qatisaq.
2 Qonqayllamanta chayaruspaymi pisipasqa mana kallpayoq kachkaptin mancharirachisaq.
Paywan kaq llapallan runakuna ayqekuptinmi sapallantaña reyta wañurachisaq.
3 Chaynapim llapallan runakunata kutichimusaq qanman,
kutimunqaqa maskasqayki taytayki Davidman llapallan runakuna kutimusqanta hinam.
Paykuna kutikamuptinqa llapallan runakunam hawkallaña kanqaku —nispa.
4 Ahitofelpa consejasqanmi allinllaña rikchakarapurqa Absalonpaq chaynataq Israel casta llapallan ancianokunapaqpas.
5 Chaymi Absalonñataq nirqa:
—Qayamuychikyá Arqui casta Husai sutiyoq runatapas paypa consejontawan uyarinanchikpaq —nispa.
6 Absalonpa kasqanman Husai chayaramuptinmi Ahitofelpa consejasqanta Absalon willaspan nirqa:
—¿Ahitofelpa consejasqanman hinachu rurasunchik icha manachu?
Qamqa ¿imaninkitaq?
—nispa.
7 Chaymi Husai nirqa:
—Kunan kutipaq Ahitofelpa consejasusqaykiqa manam valenchu.
8 Yachankimiki taytaykipas chaynataq runankunapas valeroso soldadokuna kasqankutaqa.
Kunanqa ¡mayna piñasqachiki kachkanku purunpi china ukumarimanta wawankunata qechuruptinku piñasqa kachkaq hina.
Chaymantapas taytaykiqa guerrapi peleay yachaq runam.
Manam tutaqa puñunmanchu runankunawanqa.
9 Payqa seguroch kunanpunipas huk kaqnin machaypi otaq huklaw sitiopi pakakuchkan.
Sichum soldadoykikuna peleasqankupi puntata wañuruptinqa pipas uyarispam qaparinqa:
“Absalon qatiq soldadokunam achkallaña wañurunku” nispa.
10 Chayna kaptinqa maynaña guerrapi peleaq qaripas leon hinaña valeroso kachkaspanpas llumpaytach hukmanyarunqa.
Llapallan Israel castankunam yachanku taytaykiqa guerrapi peleaq runa kasqanta chaynataq paywan kaqkunapas valeroso soldadokuna kasqankuta.
11 Chaynaqa kaytam consejayki:
Huñuruyá Dan llaqtamanta qallarispa Beerseba llaqtakama lliw Israel nacionpi yachaq soldadokunata.
Paykunaqa kachkanku lamar qochapa patanpi aqo hinañam.
Paykunatam qampuni pusanki guerrapi peleanankupaq.
12 Maymi tarisqanchikpim atacasunchik,
allpapa hawanman sulla tiyamuchkaq hinam paykunataqa atacasunchik.
Chaynata ruraptinchikqa manañam kawsanqachu paypas nitaq huk soldadollanpas.
13 Huk kaqnin llaqtapi pakakuruptinpas lliw Israel castakunam apasunchik waskakunata hinaspam chaywan llaqtapa ruminkunatapas wayqokama astarusunchik,
chulla rumipas mana puchunankamam chaynataqa rurasunchik —nispa.
14 Chaymi Absalonwan lliw Israel castakuna nirqaku:
—Ahitofelpa consejasqanmantapas aswan allinqa Arqui casta Husaipa consejasqanmi —nispa.
Tayta Diosmi kamachirqa Ahitofelpa consejasqan allin kachkaptinpas yanqachasqa kananpaq chaynapi Absalonman desgracia chayananpaq.
15 Husaimi willarqa sacerdote Sadocmanwan sacerdote Abiatarman imaynam Absalonman chaynataq Israel casta ancianokunaman Ahitofelpa consejasqanta,
willarqataqmi kikinpa imaynam concejasqantapas.
16 Husaiqa nirqataqmi:
—Kunanpuniyá Davidman kaynata willachimuychik:
“Kunan tutaqa amam qepankichu chunniq vadopiqa aswanqa chimpay Jordan Mayuta chaynapi qamtapas chaynataq qanwan lliw kaqkunatapas ama wañuchisunaykichikpaq” nispa.
17 Jonatanwan Ahimaas sutiyoq runañataqmi kachkarqaku Rogel Pukyupa patanpi,
llaqtapi runakuna rikurunankumanta manchakuspankum mana yaykurqakuchu Jerusalen llaqtamanqa.
Paykunamanqa huk sirvientam willamunan karqa chaynapi paykunañataq Rey Davidman willamunankupaq.
18 Paykunata huk mozo rikuruspanmi Absalonman willaykamurqa.
Paykunam ichaqa iskayninku apurawman kallpaspa Bahurim llaqtapi huk kaqninpa wasinman chayarurqaku.
Chay runapa pationpi pozoman yaykuruptinkum
19 chay runapa warminñataq pozota taparuspa chaypa hawanman trillasqa kawsayta mastarurqa chaynapim mana pipas yacharqachu.
20 Absalonpa serviqninkuna chayaruspankum wasipi yachaq warmita tapurqaku:
—¿Maypitaq kachkanku Ahimaaswan Jonatanqa?
—nispa.
Hinaptinmi warmiñataq nirqa:
—Ñachá mayuchataña chimparunku —nispa.
Maskaqkuna rispankum mana tarimusqankurayku kutikurqaku Jerusalen llaqtaman.
21 Chay maskaqkuna kutiruptillankum Ahimaaswan Jonatan pozomanta lloqsiruspa rirqaku Rey Davidman willaq.
Paykunamá nirqaku:
—Apurawman mayuta chimpaychik.
Ahitofelmi consejarun kayna-waknata qamkunapa contraykichikpi —nispa.
22 Hinaptinmi Davidqa llapallan runankunapiwan chimparurqaku Jordan Mayuta.
Manaraqpas achikyamuchkaptinmi llapallanku Jordan Mayuta chimparurqaku,
manam chullallapas puchurqachu kaylaw chimpapiqa.
23 Ahitofelñataqmi paypa consejasqanman hina mana ruraptinku asnonta caronaykuspa ripukurqa llaqtanpi wasinman.
Llapa imanta allicharuspanñataqmi warkukuruspan wañururqa chaymi abuelonpa sepulturanpi pamparurqaku.
Mahanaim llaqtapi Davidpa kasqanmanta
24 Mahanaim llaqtaman David chayaruptinmi Absalonpas Israel casta llapallan soldadokunawan Jordan Mayuta chimparurqaku.
25 Llapallan tropakunapa kamachiqnin Joabpa rantinpim Absalon churarurqa Amasa sutiyoq runataña.
Chay runaqa karqa Israel nacionpi yachaq Itra sutiyoq runapa churinmi.
Itram servinakurqa Nahaspa wawan Abigailwan otaq Sarviapa ñañanwan.
Sarviaqa karqa Joabpa mamanmi.
26 Absalonmi Israel castakunawan campamentonkuta sayachirqaku Galaad law allpapi.
27 David Mahanaim llaqtaman chayaruptinmi payta chaskirqa Nahaspa churin Sobi.
Payqa karqa Raba llaqtamanta kaq Amonpa mirayninmi.
Chaskirqataqmi Amielpa churin Maquirpas.
Payqa karqa Galaad lawpi Rogelim llaqtamanta kaqmi.
28 Davidpaqwan runankunapaqmi apamurqaku camakunata,
tazonkunata,
allpa mankakunata,
trigota,
cebadata,
harinata,
hamkata,
habasta,
lentejata,
29 mielta,
llukllupata,
ovejakunata hinaspa vacapa lechenmanta quesota.
Mikuykunatamá apamurqaku Davidwan runankuna mikunankupaq.
Paykunaqa apamurqaku:
“Chunniqpi llapa runakunaqa yarqasqa,
pisipasqa hinaspa yakunayasqach kachkanku” nispa piensasqankuraykum.