Sibawan David rimasqanmanta
16
Moqopa puntanmanta tumpa waklawnintaña David richkaptinmi Mefi-bosetpa sirvienten Siba taripaykamurqa monturayoq iskay asnokunawan.
Apamurqamá asnokunapi iskay pachak tantata,
pachak racimo uvas pasasta,
higos pasasmanta pachak tortillakunata chaynataq huk odre vinotapas.
2 Reymi tapurqa Sibata:
—¿Imataq kaykunaqa?
—nispa.
Hinaptinmi Sibañataq nirqa:
—Asnokunam reypa familiankuna sillakunanpaq,
tantawan pasaskunañataqmi soldadokuna mikunanpaq,
vinoñataqmi chunniqpi pisipaqkuna tomanankupaq —nispa.
3 Hinaptinmi rey tapurqa:
—¿Maypitaq kachkan patronnikipa willkanqa?
—nispa.
Chaymi Sibañataq nirqa:
—Payqa Jerusalen llaqtapim qeparamun,
payqa piensachkan:
“Israel nacionpi abueloypa gobiernasqantam kunan kutichipuwanqaku” nispanmi.
4 Chaymi reyñataq Sibata nirqa:
—Kunanqa qampaqñayá kachun Mefi-bosetpa llapa ima kapuqninkunapas —nispa.
Chaymi reypa qayllanpi qonqorakuykuspa Siba nirqa:
—Señor reylláy,
siempreyá favoreceway —nispa.
5 Bahurim llaqtachakama Rey David chayaruptinmi Saulpa castan Gerapa churin Simei sutiyoq runa lloqsiramurqa reyta ñakastin.
6 Rumiwanmi chamqarqa Davidta chaynataq llapallan serviqninkunatapas.
Reymi ichaqa rirqa runankunapa chaynataq waqaychaqnin soldadokunapa chawpinta.
7 Simei sutiyoq runa ñakaspanmi nirqa:
—Runamasin wañuchiq mana allin ruraq runa ¡pasay kaymanta!
8 Tayta Diosmi pagapusuchkanki Saulpa castankuna wañuchisqaykimanta,
chaynataqa rurarqanki rantinpi qamña gobiernanaykipaqmi.
Kunanmi ichaqa gobiernoykita Tayta Dios qoykun churiki Absalonmanña.
Kay desgraciam hayparamusunki runa wañuchiq kasqaykimanta —nispa.
9 Chaymi reyta Sarviapa wawan Abisai nirqa:
—¿Imanasqamá kay wañusqa allqo hina runaqa qam señor reyniytaqa ñakasunki?
Dejaykuwayá kunkanta kuchuramunaypaq —nispa.
10 Reymi ichaqa nirqa:
—Sarviapa wawankuna,
kayqa manam qamkunapa asuntoykichikchu.
Wak runa chaynata ñakawananpaqqa Tayta Dioschiki nirqa:
“Ñakay Davidta” nispa.
Hinaptinqa ¿pitaq ninman:
“¿Imapaqtaq chaynata ruranki?”
nispa?
11 Abisaitawan llapallan serviqninkunatam David nirqa:
—Kikiypa churiypunim maskawachkan wañuchiwananpaq hinaptinqa razonñachiki kay Benjamin casta runaqa.
Hinayá ñakawachunku,
Tayta Dioschá chaynata kamachirqa.
12 Ichapas Tayta Dios qawarimuwanqa ñakarisqayta hinaspa kunan ñakawasqanmanta kutichipuwanqa allinta —nispa.
13 Davidwan serviqninkuna ñanta riptinkum Simeipas rirqa Davidpa chimpan waqtanta ñakastin,
rumikunata chamqamustin chaynataq polvota maqchimustin.
14 Reymi llapallan runankunapiwan rispanku chayarurqaku pisipasqallaña maymi risqankuman hinaspam chaypi samarurqaku.
Jerusalen llaqtaman Absalonpa yaykusqanmanta
15 Absalonñataqmi yaykururqa Jerusalen llaqtaman llapallan Israel casta runakunapa compañasqan,
Ahitofelpas paywantaqmi yaykurqa.
16 Davidpa amistadnin Arqui casta Husai sutiyoq runapas Absalonpa kasqanman chayaruspanmi qaparirqa:
—¡Kawsachun rey!
¡Kawsachun rey!
—nispa.
17 Hinaptinmi Absalonñataq nirqa:
—¿Kaychu amistadniki Davidpaq kuyakuyniki?
¿Imanasqataq mana paywanchu rirqanki?
—nispa.
18 Chaymi Husaiñataq nirqa:
—Manam riyta atinichu.
Ñoqaqa qatisaq Tayta Diospapas,
kay runakunapapas chaynataq Israel casta llapallan runakunapapas akllasqan reytam,
paywantaqmi yachasaqpas.
19 Chaywanpas pitapas servispayqa-servisaq amistadniypa churintam.
Imaynam taytaykita servirqani chaynatam qamtapas servisqayki —nispa.
20 Hinaptinmi Ahitofelta Absalon nirqa:
—Consejawaychikyá imam rurananchikpaq —nispa.
21 Chaymi Absalonta Ahitofel nirqa:
—Palacio cuidanankupaq taytaykipa dejasqan compañerankunawan puñuy hinaptinmi lliw Israel casta runakuna yachanqaku taytaykiwan cheqninakusqaykita chaynapim kallpanchakunqaku qanwan kaq llapallan runakuna -nispa.