Davidpa contranpi Absalon hoqarikusqanmanta
15
Tiempopa risqanman hinam Absalon armakururqa guerrapaq carretata,
caballokunata chaynataq pichqa chunka runakunatapas ñawpaqninta kallpanankupaq.
2 Absalonmi tempranolla hatarispa llaqtaman yaykuna zaguan ñanpa patanpi sayaq.
Pipas reyman quejakuq hamuqta Absalon qayaspanmi tapuq:
—¿Maylaw llaqtamantataq hamuchkanki?
—nispa.
—Niwasqayki asuntoykiqa razonpunipas ancha allinmi ichaqa manam pipas kanchu reypa rantinpi atiendesunaykipaq.
4 ¡Amalaya ñoqata churaykuwanmanku kay nacionpi juez kanaypaq!
hinaptinqa llapallan quejayoqkuna otaq asuntoyoqkuna hamuwaptinkuch allin arreglota rurayman —nispa.
5 Chaymi pipas Absalonpa ñawpaqninman qonqorakuykunanpaq asuykuptinqa pay abrazaykuspan muchaykuq.
6 Chaynatam ruraq llapallan Israel castakunawan otaq reyman allin arreglo rurananpaq hamuqkunawan.
Chaynatamá Israel runakunapa sonqonta Absalon suwarurqa.
7 Tawa wata pasaruptinmi reyta Absalon nirqa:
—Ama hina kaspayá kachaykuway Hebron llaqtaman rispay Tayta Diosman prometesqayta cumplinaypaq.
8 Aram law Gesur nacionpi kachkaspayraqmi prometekurqani:
“Sichu Tayta Dios Jerusalen llaqtaman kutichiwaptinqa ñoqam payta servisaq” nispay.
9 Chaymi rey nirqa:
—Hawkallayá pasakuy —nispa.
Hinaptinmi Absalon pasarqa Hebron llaqtaman.
10 Absalonmi kacharqa chaki-purilla willakuqkunata llapallan Israel ayllukunaman kaynata nimunankupaq:
—Cornetapa waqasqanta uyarispaykichikmi ninkichik:
“Absalonmi gobiernachkanña Hebron llaqtapi” nispa.
11 Jerusalen llaqtamantam Absalonwan kuska rirqa iskay pachak qayachisqan runakuna.
Paykunaqa rirqaku mana imatapas yachastinmi chayraykum mana huchayoqchu karqaku.
12 Animalkunata wañuchispa Diosman ofrecechkaspanmi Absalon qayachimurqa Davidpa consejaqnin Ahitofel sutiyoq runata,
paytaqa qayachimurqa Gilo llaqtamantam.
Reypa contranpi kaqkunam aswanta mirarurqa chaynapim Absalon qatiq runakunapas astawan yapakururqa.
Jerusalenmanta David ayqekusqanmanta
13 Davidman willakuq rispanmi nirqa:
—Llapallan Israel castakunam Absalonwanña kachkanku —nispa.
14 Chaymi David kamachirqa Jerusalen llaqtapi paywan kuska kaq serviqninkunata:
—Kunanpuni ayqekusunchik,
Absalonmantaqa manam lluptiyta atichwanchu.
Utqayman lluptikusunchik,
yanqañataqmi utqayman hayparamuwaspanchik atacaruwachwanchik hinaspam llaqtapi runakunatapas guerrawan wañurachinmanku —nispa.
15 Chaymi reypa serviqninkuna payta nirqaku:
—Ñoqaykuqa listom kachkaniku tukuy imapas niwasqaykiku ruranaykupaq —nispa.
16 Chaymi rey lloqsirqa palacionpi llapallan kaqkunawan kuska.
Reyqa saqerurqa chunka compañerallantañam palaciota cuidanankupaq.
17 Reymá lloqsirqa llapallan runankunawan kuska hinaspam sayaykurqaku llaqtamanta karupiña kaq wasipi.
18 Llapallan serviqninkunam paypa waqtanta rirqaku.
Rirqakumá reyta waqaychaq Ceret casta chaynataq Pelet casta soldadokunapas.
Rirqakutaqmi paypa ñawpaqninta Gat llaqtamanta qatimuqnin soqta pachak soldadokunapas.
19 Reymi nirqa Gat llaqtayoq Itai sutiyoq runata:
—¿Imapaqtaq qamqa rinki ñoqaykuwan?
Kutispaykiyá kamuy chay huk reywan.
Qamqa kanki forasterom llaqtaykimanta qarqomusqa.
20 Qayna punchaw chayaramuq hinallaraqmi qamqa kachkanki.
Chaynaqa ¿imapaqtaq ñoqaykuwan rinaykipaq nisqayki?
¿Ñoqapas atisqaymanchá maymanpas risaq?
Qamqa kutikuspayá castaykikunatapas kutichiytaq.
Tayta Diosyá cheqaptapuni favorecesunki —nispa.
21 Chaymi Itaiñataq reyta nirqa:
—Kawsaq Tayta Diosrayku chaynataq qam reyniyrayku juraspam nini:
“Wañunay otaq kawsanay kaptinpas qam señor reywanmi kasaq” —nispa.
22 Hinaptinmi David nirqa Itaita:
—Chaynaqa haku pasasunchik —nispa.
Chaymi Gat llaqtayoq Itai pasarqa llapallan tropantin hinaspa familiantin.
23 Runakuna pasanankamam chay lugarpi llapallan runakuna qaparispa waqarqaku.
Llapallanmi pasarurqaku Cedron Wayqota reywan kuska.
Llapallankumá pasarqaku chunniqman riq ñanninta.
24 Sacerdote Sadocpas llapallan Leviy castakunawanmi rirqa Diospa contrato baulninta apaspanku,
chay baultam saqerqaku sacerdote Abiatarpa ladonpi llaqtamanta llapallan runakuna lloqsiyta tukunankukama.
25 Reyñataqmi nirqa Sadocta:
—Kutichiy llaqtaman Diospa baulninta.
Tayta Dios favorecewaspaqa kutichimuwanqach hinaptinchá qawasaq baulta chaynataq yachanan karpatapas.
26 Sichu pay niwanqa:
“Manañam munaykichu” nispa hinaptinqa ñoqawanyá rurachun imam munasqanta —nispa.
27 Reyqa nirqataqmi sacerdote Sadocta:
—¿Manachum qawachkanki?
Qamqa hawkallayá llaqtaman kutikuy Abiatarwan kuska.
Kutichuntaqyá Ahimaas sutiyoq churikipas chaynataq Abiatarpa churin Jonatanpas.
28 Ñoqam kachkasaq Jordan Mayupa chunniq vadonpi noticiata willachimuwanaykichikkama —nispa.
29 Chaymi Sadocwan Abiatar kutichirqaku Diospa baulninta Jerusalen llaqtaman hinaspam chaypi karqaku.
30 Davidmi seqarqa Olivos sutiyoq moqo cuestata waqastin,
qala chakilla chaynataq umanpas tapasqa.
Paywan seqaq runakunapas waqastinmi rirqaku umanku tapasqa.
31 Davidmanmi willarqaku:
“Ahitofelqa kachkan contraykipi Absalonwan hoqarikuqkunawan kuskam” nispa.
Hinaptinmi David nirqa:
—Dios Taytalláy,
Ahitofelpa consejasqanta yanqachay —nispa.
32 Davidmi chayarurqa Diosta ñawpaq tiempopi adorasqanku moqopa puntanman,
chaypim Arqui castamanta kaq Husai sutiyoq runa lloqsiramurqa reywan tupaykuq,
pachanpas llikipasqa chaynataq umanpas allpallaña.
33 Chaymi David nirqa:
—Ñoqawan rispaykiqa sasachakuytam qowankiman.
34 Jerusalen llaqtaman kutispayá Absalonta nimuy:
“Reynilláy,
ñoqam kasaq serviqniki,
taytaykipa serviqnin kasqayman hinam qampa serviqnikiña kasaq” nispa.
Chaynata ruraspaykim yanqachanki Ahitofelpa consejonta.
35 Chaypim kachkanku sacerdote Sadocwan sacerdote Abiatarpas,
chaynaqa palaciopi llapa ima uyarisqaykitam willanki Sadocmanwan Abiatarman.
36 Chaypim kachkan Sadocpa churin Ahimaaspas chaynataq Abiatarpa churin Jonatanpas.
Paykunawanmi willachimuwanki tukuy imakunapas uyarisqaykichikta —nispa.
37 Jerusalen llaqtaman Absalon yaykuykuchkaptinmi Davidpa amigon Husai Jerusalen llaqtaman chayarurqa.