—Ruegakuykim luto pachawan churakuspayki llakipi kachkaq hina rikchakunaykita,

aceitewanpas ama untakuspaykim rikurirunki wañukuqmanta unayña lutokuchkaq hina.

3 Reyman yaykuspaykim yachachisqayta hina rimanki —nispa.

Joabmi yachachirqa warmita imakunam ninanta.

4 Tecoa llaqtayoq warmiqa reypa kasqanman chayaruspanmi qonqoranpa pampaman kumuykuspa nirqa:

—¡Reynilláy,

yanapaykullawayá!

—nispa.

5 Chaymi reyñataq nirqa:

—¿Imanantaq?

—nispa.

Hinaptinmi chay warmi nirqa:

—Cheqaptapunim ñoqaqa viuda kani,

qosaymi wañukunña.

6 Ñoqapam kapuwarqa iskay qari wawaykuna.

Paykunam campopi peleaptinku mana pipas amachaqninku kaptin wawqenta huknin wañurachirqa.

7 Chaymi ñoqapa contraypi llapallan aylluykuna hatariramuspa niwachkanku:

“Wawqen wañuchiq wawaykita makiykuman churamuy wawqen wañuchisqanmanta wañuchinaykupaq chaynapi herencia chaskinantapas amaña chaskinanpaq” nispa.

Chaynaqa reynilláy,

huknin wawaytachiki nina sansa hina kachkaqta chinkarachinqaku,

hinaptinchá qosaypa sutinpas nitaq mirayninpas manaña kanqañachu kay allpapiqa —nispa.

8 Hinaptinmi reyñataq chay warmita nirqa:

—Kutiy wasikiman.

Kamachisaqmi qampa favornikipi —nispa.

9 Tecoa llaqtayoq warmim nirqa reyta:

—Señor reylláy,

taytaypa castankunayá culpayoqqa kasaqku ichaqa qamqa mana culpayoqmi kanki gobiernoykipi kaqkunapiwan —nispa.

10 Reyñataqmi nirqa:

—Contraykipi rimaqtaqa pusamuwayá chaynapim pipas manaña imanasunkichu —nispa.

11 Chaymi warmi nirqa:

—Ruegakuykim reylláy,

yupaychasqayki Tayta Diosta mañakunaykipaq chaynapi wañuqmanta reclamaqpas amaña wawallayta chinkarachinanpaq.

Chaynapich wawallayta manaña wañuchinqakuchu —nispa.

Chaymi reyñataq nirqa:

—Kawsaq Tayta Diosraykum jurani,

wawaykitaqa manam pipas imananqachu —nispa.

12 Chay warmiqa nirqataqmi:

—Ruegakuykim señor reylláy,

kayllataña niykunaypaq —nispa.

Chaymi reyñataq nirqa:

—Niwayá —nispa.

13 Chaymi warmi nirqa:

—Chaynatapuniqa ¿imanasqamá piensachkanki Diospa runankunapa contranpi?

Chaynakunata rimaspaykiqa kikillaykim culpayoq kanki,

churikita qarqoruspaykim mana kutichimunkichu.

14 Cheqappunipas wañuqllam kanchik.

Pampaman yaku tallirusqa hina mana hoqariy atinam kanchik.

Nitaqmi Diospas qechunchu runapa vidantaqa.

Payqa qarqosqa runa mana karunchakunanpaqmi tukuyta ruran.

15 Kunanqa hamurqani kaykuna niqnikim,

Señor reylláy,

runakuna mancharichiwasqanraykum,

piensarqani:

“Kunanyá reyta nimusaq,

icharaqpas ruranman nisqayta” nispa.

16 Qam uyariwaspaykiqa libraruwankim ñoqatawan wawayta Diospa qowasqanku herenciaykumanta chinkarachiy munaq runamanta.

17 Señor reylláy,

ñoqam piensarqani sonqollayta tiyaykachinaykimanta,

qamqariki Diospa angelnin hinam kanki allinta otaq mana allintapas sumaqta tanteaq.

Yupaychasqayki Tayta Diosyá qanwan kachun —nispa.

18 Reymi chay warmita nirqa:

—Amamá pakaykuwankichu ima tapusqaytapas —nispa.

Hinaptinmi warmiñataq nirqa:

—Niwayá,

Señor reylláy —nispa.

19 Reymi tapurqa:

—Tukuy kaykuna nisqaykiqa ¿manachu Joabpa nisusqayki?

—nispa.

Chaymi Warmiñataq nirqa:

—Señor reylláy,

vidayraykum jurani,

manam llullakusaqchu qam señor reyniypa imapas tapuwasqaykitaqa.

Serviqniki Joab kamachiwaspanmi yachachiwarqa tukuy chay imakunapas qanman nisqaykunataqa.

20 Serviqniki Joabmi chayta rurarqa imam pasakuqkunata cambiananpaq.

Ichaqa qam reyniyqa ancha yachayniyoqmi kanki Diospa angelnin hina nacionpi tukuy pasaqkunamanta yachaq —nispa.

21 Hinaptinmi reyñataq Joabta nirqa:

—Kay asuntotaqa arreglaruniñam.

Rispaykiyá kutichimuy Absalon mozota —nispa.

22 Joabmi qonqoranpa pampakama kumuykuspan Tayta Diospa bendicionninta mañapurqa hinaspam nirqa:

—Señor reylláy,

kunanmi kay serviqniki yacharuni favorecewasqaykita,

qamqariki nisqaytam rurachkanki —nispa.

23 Gesur nacionman Joab rispanmi Absalonta pusamurqa Jerusalen llaqtaman.

24 Ichaqa reymi nirqa:

—Absalonqa wasinmanyá richun ama rikuwananpaq —nispa.

Chaymi Absalon wasinman rispa reyta mana rikurqachu.

25 Absalon hina buenmozo kasqanmanta alabasqa runaqa manam pipas karqachu Israel lliw nacionpiqa.

Paymi karqa chaki plantanmanta uma puyukninkama sumaqllaña.

26 Chukchantam rutuchikuq sapa wata tukuyta.

Chukchan wiñaruspanmi llumpayta fastidiaq.

Rutuchikusqan chukchanmi llasaq iskay kilo masninta reypa pesanman hina.

27 Absalonpam karqa kimsa qari churinkuna,

karqataqmi huk warmi churinpas Tamar sutiyoq.

Chay churin Tamarqa karqa ancha buenamozam.

28 Absalonmi yacharqa Jerusalen llaqtapi iskay wata reyta mana rikuspa.

29 Absalonmi qayachimurqa Joabta reyman kachananpaq ichaqa Joabmi mana hamuyta munarqachu.

Yapatawanmi qayachimurqa Joabta,

chaywanpas manam hamuyta munarqachu.

30 Chaymi servientenkunata Absalon nirqa:

—Ñoqapa chakraypa waqtanpi Joabpa chakranta qawamuychik.

Cebada tarpusqam kachkan.

Rispaykichikyá kañaykamuychik —nispa.

Chaymi Absalonpa sirvientenkuna Joabpa chakranta kañaykamurqaku.

31 Chay ratollam Absalonpa wasinta Joab rispa nirqa:

—¿Imanasqataq sirvientekikuna chakrayta kañaykurqaku?

—nispa.

32 Chaymi Absalonñataq nirqa:

—Ñoqam qayachimurqayki reyman kachanaypaq,

paytayá nimuy:

“¿Imapaqtaq Gesur nacionmanta hamurqani?

Allinchá kanman karqa hinapi kamuyniy” nispa.

Ñoqaqa kunanpunim reyta qawamusaq,

huchayoq kaptiyqa wañuchiwachunyá —nispa.

33 Joabmi rirqa reyman willamuq hinaptinmi rey qayachimurqa Absalonta.

Absalon reypa kasqanman chayaruspanmi paypa qayllanpi qonqoranpa pampaman kumuykurqa.

Reyñataqmi muchaykurqa Absalonta.