Panillanta Amnon abusasqanmanta
13
Chaykuna pasaruptinmi Davidpa churin Amnon enamorakururqa panin Tamarmanta.
Tamarqa karqa Davidpa churin Absalonpa legitimo paninmi,
paymi karqa ancha buenamoza.
2 Chaymi panin Tamarmanta Amnon ancha llakisqa kaspa onqorurqa.
Tamarqa doncella kasqanraykum Amnonqa ima ruraruytapas mana atirqachu.
3 Ichaqa Amnonpa amigonmi karqa Jonadab.
Paymi karqa Davidpa wawqen Simea sutiyoq runapa churin.
Jonadabqa ancha sacre runam karqa.
4 Chaymi Amnonta nirqa:
—Reypa churin ¿imanasqataq puncha-punchaw kaynatañaqa hukmanyachkanki?
¿Manachu willaykuwankiman?
—nispa.
Chaymi Amnonñataq nirqa:
—Wawqey Absalonpa panin Tamartam kuyaruni —nispa.
5 Chaymi Jonadab nirqa:
—Camaykiman usturuspa onqoq tukuruy.
Taytayki watukusuqniki hamuptinmi ninki:
“Ruegakuykim paniy Tamar hamuspan mikuyta ñawpaqniypi rurapuwananpaq chaynapi serviwaptin mikunaypaq” nispa.
6 Amnonmá ustururqa camanman hinaspam onqoq tukururqa.
Amnonta watukuq rey hamuptinmi Amnon nirqa:
—Ruegakuykim paniy Tamar hamuspa iskay tortillakunata ñawpaqniypi rurapuwananpaq chaynapi serviwaptin mikunaypaq —nispa.
7 Palaciopi kachkaptinmi Tamarta David nichimurqa:
—Ama hina kaspaykiyá riy turiki Amnonpa wasinta hinaspayá mikuyta ruraykapamuy —nispa.
8 Tamarmi turin Amnonpa wasinman rispa camanpi usturayachkaqta tarirurqa.
Masata qaqospanmi tortillata ruraspa ñawpaqninpi freirqa.
9 Hinaspam sartenmanta horqospa tortillakunata servirqa.
Amnonmi ichaqa mana mikuyta munaspan nirqa:
—Kaymanta llapallan runakuna lloqsichun —nispa.
—Puñunay cuartoman mikuyta apamuspayki serviway mikunaypaq —nispa.
Chaymi Tamar rurasqan tortillakunata apaykurqa turin Amnonpa puñunan cuartonman.
11 Mikuyta ñawpaqninman asuykachiptinmi Tamarta hapiruspa Amnon nirqa:
—Panilláy,
hamuy puñukusunchik —nispa.
12 Payñataqmi nirqa:
—¡Manam turíy!,
ama abusawaychu.
Israel nacionpiqa manam kaynataqa ruranmankuchu.
Ama kay penqaytaqa ruraychu.
13 Ñoqaqa ¿maymantaq riyman penqakuyniywanqa?
Chaynataqchá qampas Israel nacionpi mana penqakuq runa hina qawasqa kawaq.
Ruegakuykim kunan reyta rimapayaykamunaykipaq,
payqa manam negasunkichu qanwan casarakunaytaqa.
14 Amnonmi ichaqa Tamarpa nisqan kasukuyta mana munaspan aswan kallpasapa kasqanrayku abusarurqa.
15 Aswanqa Amnonmi payta cheqnipakururqa ancha-anchata.
Kuyasqanmantapas aswanraq cheqnipakuruspanmi nirqa:
—Hatarispaykiyá pasakuy —nispa.
16 Chaymi Tamar nirqa:
—Amayá chaynachu kachun turilláy.
Abusawasqaykimantapas aswan mana allinmi kanman kay wischuwaynikiqa —nispa.
—Hawaman qarqoy kay warmita hinaspa punkuta sumaqta wichqay lloqsiruptin —nispa.
18 Sirvienten hawaman wischuruptinmi punkuta sumaqta wichqarurqa.
Tamarpa pachanmi karqa qoysu suma-sumaq adornasqa.
Chaynatam pachakuqku reypa doncella churinkuna.
19 Tamarmi uchpata umanman maqchikuykuspan suma-sumaq adornasqa qoysu pachantapas llikiparurqa hinaspam makinta umanman churakuykuspa qaparispa waqastin pasakurqa.
20 Chaymi turin Absalon nirqa:
—Panilláy ¿turiki Amnonchu qanwan karurqa?
Kunanqa upallayñayá,
payqariki turikim.
Amayá llumpaytaqa llakikuychu kay asuntomantaqa —nispa.
Tamarmi llakisqallaña turin Absalonpa wasinpi yacharqa.
21 Tukuy chay pasaqkunamanta Rey David yacharuspanmi sinchita piñakururqa.
Ichaqa churin Amnontaqa manam qaqcharqachu piwi churin kaptin kuyasqanrayku.
22 Absalonpas wawqen Amnontaqa manam imatapas nirqachu chay rurasqanmanta ichaqa cheqnirqam Amnonta panin Tamarta abusasqanmanta.
Amnonta Absalon vengakusqanmanta
23 Iskay wataña pasaruptinmi Absalonpa runankuna Efrain llaqtapa hichpan Baal-hazor lawpi ovejankunata rutuchkarqaku.
Absalonñataqmi convidarqa reypa llapallan churinkunata.
24 Absalonmi reyman hamuspan nirqa:
—Runaykunam rutuchkanku ovejaykunata chaynaqa ruegakuykim serviqnikikunawan rinaykipaq —nispa.
25 Chaymi reyñataq nirqa:
—Manam churilláy,
manam llapallaykuqa riymankuchu,
llumpaytam gastachikikuman —nispa.
Absalon llumpayta hikutaptinpas reyqa manam munarqachu paywan riyta ichaqa Diospa bendicionnintam Absalonpaq mañapurqa.
26 Absalonmi nirqa:
—Manaña llapallaykichik riyta munaptikichikqa ruegakuykim wawqey Amnon ñoqaykuwan rinanpaq —nispa.
Hinaptinmi reyñataq nirqa:
—¿Imapaqtaq Amnonqa qanwan rinman?
—nispa.
27 Absalon hikutasqanraykum Amnonta rey kachaykurqa paywan rinanpaq,
kachaykurqataqmi llapallan churinkunatapas.
Absalonmi reypa mikunanpaq hina convidota rurachirqa.
28 Absalonmi kamachirqa serviqninkunata kaynata:
—Ama hina kaspam ñoqata qawawankichik.
Amnon vinowan tumpa sinkaña kachkaptinmi nisqaykichik:
“Amnonta wañuchiychik” nispa.
Hinaptinmi payta wañuchinkichik.
Amam manchakunkichikchu,
ñoqam kamachichkaykichik.
Chaynaqa kallpanchakuspayá qarinchakuychik —nispa.
29 Absalonpa serviqninkunam kamachisqanman hina wañuchirqaku Amnonta chaymi reypa llapallan churinkuna lluptikurqaku mulankuman sapakama sillakuykuspa.
30 Paykuna ñanllapiraq kachkaptinkum Davidman willaykurqaku:
Absalonmi wañurachin llapallan churikikunata,
manam pipas puchunchu —nispa.
31 Davidmi hatarispan pachanta llikiparuspan pampaman kuchpakuykurqa llumpay llakisqa kasqanrayku.
Chaypi sayaq llapallan serviqninkunapas pachankutam llikipakururqaku.
32 Davidpa wawqen Simeapa churin Jonadabmi ichaqa Davidta nirqa:
—Reynilláy,
amayá piensaychu mozo churikikunata wañurachisqankumantaqa.
Amnonllam wañusqaqa kachkan Absalonpa kamachisqanman hina.
Panin Tamarta abusasqan punchawmantaraqmi Absalonqa piensarurqa Amnon wañurachiyta.
33 Chaynaqa señor reynilláy,
amayá piensaychu llapallan churikikuna wañurusqanmantaqa.
Amnonllam wañurunqa —nispa.
34 Absalonñataqmi lluptikururqa.
Llaqta cuidaq runa qawarispanmi rikururqa Horonaim llaqtaman riq ñanninta,
orqolawpa waqtanta achkallaña runakuna bajamuchkaqta.
Chaymi llaqta cuidaq runa reypa kasqanman pasaspan nirqa:
Horonaim llaqtaman riq ñannintam orqo lawpa waqtanta achkallaña runakuna uraykamuchkan —nispa.
35 Jonadabmi reyta nirqa:
—Waqaya hamuchkanku churikikunaqa ñoqapa piensasqayman hina —nispa.
36 Jonadab rimayta tukuykuchkaptinmi reypa churinkunaqa chayaykamurqaku hinaspam qaparispanku waqarqaku.
Reypas llapallan serviqninkunawanmi sinchita waqarqaku.
37 Absalonñataqmi lluptikuspa ripukurqa Gesur nacionpa reynin Talmaipaman,
Talmaiqa karqa Amiudpa churinmi.
Davidñataqmi waqarqa churin Amnonmanta sapa punchaw.
38 Absalonmá lluptirurqa Gesur nacionman hinaspam chaypi yacharqa kimsa wata.
39 Churin Amnonpa wañusqanmanta Rey Davidpa sonqon tiyaruptinmi tukuy sonqonwan Absalonta rikuykuyta munarqa.