—Huk llaqtapis iskay runakuna kasqa,

hukninsi kasqa apu,

hukninñataq wakcha.

2 Apupas kasqa achkallaña ovejankunawan vacankuna.

3 Aswanqa chay wakchapas kasqa rantisqan chulla ovejachallan,

chay ovejachantas kikinpuni uywakusqa.

Chay ovejachas wiñasqa paywan chaynataq churinkunawan kuska,

kikinpa mikunanmantas chay ovejachaqa mikuqpas.

Tomanan vasomanta tomaspansi puñuqpas oqllayninpi.

Chay ovejachaqa warmi churin hinas kasqa.

4 Huk punchaw apu runapa wasinman huk viajero chayaruptinsi apuqa ovejankunamantapas nitaq vacankunamantapas nakayta mana munasqachu samapakuqman mikuchinanpaq,

chay wakcha runapa ovejachantaraq qechuramuspansi samapakuqninpaq mikuyta rurachisqa —nispa.

5 Chayta David uyariruspanmi chayna ruraq runapa contranpi sinchita piñakuruspan Natanta nirqa:

—Juranim kawsaq Tayta Diosrayku,

chayna ruraq runaqa wañunanpunim.

6 Chay ovejachapa rantinpipas sayachipuchunyá tawa ovejachakunata,

mana kuyapayarikuspa chayna rurasqanrayku —nispa.

7 Chaymi Davidta Natan nirqa:

—Qanmi kanki chay runaqa chaymi Israelpa yupaychasqan Tayta Dios kaynata nin:

“Ñoqam aceitewan tallichispay Israel nacionpi gobiernanaykipaq nombrarqayki,

librarqaykitaqmi Saulpa makinmantapas.

8 Munaychakusuqniki Saulpa familiantapas chaynataq warminkunatapas makikimanmi churamurqani.

Gobiernachirqaykitaqmi Israel casta runakunapipas chaynataq Juda casta runakunapipas.

Chaykunapas asllaraq kaptinqa mastaraqmi yapaykiman karqa.

9 ¿Imanasqamá ñoqa Tayta Diospa kamachikusqayta despreciaspaykiqa ñawpaqniypi mana allinta rurarqanki?

Het casta Uriasta wañurachispaykim warmintapas warmikipaqraq hapikuykunki.

Qam kamachiptikimá Uriasta Amonpa mirayninkuna guerrapi wañurachirqa.

10 Despreciawaspayki Het casta Uriaspa warminta warmikipaq hapikuykusqaykiraykum miraynikikunapi mana faltanqachu espadawan wañuchisqakuna.

11 Chaynaqa ñoqa Tayta Diosmá kaynata nini:

Desgraciatam kikikipa familiallaykimanta apamusaq,

qawachkaptikim warmikikunata qechusqayki hinaspaymi qoykusaq huk kaqnin familiaykimanña hinaptinmi warmikikunawan punchawpipuni puñunqa.

12 Qamqa pakasqapim rurarqanki,

ñoqañataqmi lliw Israel runakunapa qawasqanta punchaw rurasaq” nispa.

13 Chaymi Natanta David nirqa:

—Huchallikurunim Tayta Diospa contranpi —nispa.

Hinaptinmi Natanñataq nirqa:

—Tayta Diosqa pampachaykunmi huchaykikunataqa,

manam wañunkichu.

14 Chaywanpas mana allin rurasqaykiwan Tayta Diosta despreciasqaykiraykum naceq churikiqa wañunqapuni —nispa.

15 Natan wasinman kutiruptinmi Uriaspa viudanpi Davidpa churin wawata Tayta Dios onqorachirqa hinaptinmi pasaypaq wañunayaqña rikurirurqa.

16 Chaymi Diosta David mañakuspan ayunarqa,

qala pampapi siriykuspanmi sapa tuta achikyarqa.

17 Hinaptinmi palacionpi ancianokuna paypa kasqanman rirqaku pampamanta hatarichinankupaq.

Paymi ichaqa mana hatariyta munarqachu,

paykunawan mikuytapas manam munarqachu.

18 Qanchis kaq punchawpim wawa wañururqa chaymi Davidman wawapa wañurusqanmanta willaykuyta manchakuspanku ninakurqaku:

—Wawa kawsachkaptinraq rimapayaptinchikpas manam uyariwarqanchikchu.

Chaynaqa wawapa wañurusqanmantaqa ¿imaynataq willachwanchik?

Imatapas rurakurunqachiki —nispa.

19 Aswanqa Davidmi serviqninkunapa upallallamanta rimanakusqankuta uyarispan wawapa wañurusqanta musyarurqa chaymi tapurqa:

—¿Wañurunchu wawa?

—nispa.

Hinaptinmi paykuna nirqa:

—Arí,

wañurunmi —nispa.

20 Chaymi Davidqa qala pampamanta hatarispan bañakurqa,

aceitewan llusikuspantaqmi pachantapas mudakurqa hinaspam Tayta Diospa karpanman yaykuspa adorarqa.

Chaymantam wasinman kutiramuspan mikuyta mañakurqa chaymi qoykuptinku mikurqa.

21 Hinaptinmi serviqninkuna nirqaku:

—¿Imataq kay rurasqaykiqa?

Wawa kawsaptinraqqa ayunaspam waqarqanki.

Pay wañuruptinñataqmi hatarispayki mikunki —nispa.

22 Chaymi Davidñataq nirqa:

—Wawa kawsaptinraqqa ayunaspaymi waqarqani:

“Ichapas Dios llakipayariwaspan wawata kawsachinmanraq” nispay.

23 Ichaqa kunan wañuruchkaptinqa ¿imapaqñataq ayunasaq?

¿Atiymanchu kawsarachiyta?

Ñoqam paypa kasqanman risaq,

paymi ichaqa manaña ñoqaman kutimunqachu —nispa.

24 Davidmi warmin Betsabeyta consuelarqa,

huktawan paywan puñuptinmi wachakurqa huk qari wawata.

Paytam David suticharqa Salomonwan.

Tayta Diosmi chay wawata kuyaspan

25 willakuqnin Natanta kacharqa Davidman chaynapi chay wawata Tayta Diosrayku Jedidiaswan sutichananpaq.

26 Joabmi atacarqa Amonpa mirayninkunapa Raba llaqtanta.

“Reypa Llaqtan” sitiota dueñochakuruspanmi

27 Davidman kacharqa willakuqkunata kaynata nimunankupaq:

—Raba llaqtata atacaspaymi yakupa kasqan barriota dueñochakuruni.

28 Kunanyá huñuy wakin tropaykikunata hinaspa llaqtata atacaspa dueñochakuy,

mana chayqa llaqtata dueñochakuruptiymi sutiywan sutichasqa karunman —nispa.

29 Chaymi David lliw tropankunata huñuruspan Raba llaqtapa contranpi peleaq rirqa hinaspam venceruspa dueñochakururqa.

30 Chay nacionpi reypam karqa alhaja rumikunawan adornasqa qorimanta coronan,

chay coronata horqoruspankum Davidpa umanman churarqaku.

Chay coronapa llasayninmi karqa kimsa chunka kimsayoq kilo.

Davidmi llaqtamanta horqorqa chaypi kaq nana-nanaq imapas kaqkunata.

31 Horqomurqataqmi llaqtapi puchuq runakunatapas,

paykunatam llamkachirqa sierrakunawan,

trillanapaq fierromanta maquinakunawan hinaspa fierromanta hachakunawan,

llamkachirqataqmi ladrillo hornokunapipas.

Chaynatamá llamkachirqa Amonpa mirayninkunapa llapallan llaqtankunapi kaq runakunatapas.

Chaymantam Davidqa kutikamurqa llapallan tropankunawan Jerusalen llaqtaman.