Raba llaqtata David vencesqanmanta
20
Para tiempo pasaruptinmi reykunapa guerraman lloqsinanku tiempopi tropankunata pusaspan Joab rirqa Amonpa mirayninkunapa allpan purmachiq.
Raba llaqtata muyuruspanmi atacarurqa purmachinankama.
Davidñataqmi kachkarqa Jerusalen llaqtapi.
2 Chay nacionpi reypam karqa alhaja rumikunawan adornasqa qorimanta coronan,
chay coronata horqoruspankum Davidpa umanman churarqaku.
Chay coronapa llasayninmi karqa kimsa chunka kimsayoq kilo.
Davidmi llaqtamanta horqorqa chaypi kaq nana-nanaq imapas kaqkunata.
3 Horqomurqataqmi llaqtapi puchuq runakunatapas,
paykunatam llamkachirqa sierrakunawan,
trillanapaq fierromanta maquinakunawan hinaspa fierromanta hachakunawan.
Chaynatamá llamkachirqa Amonpa mirayninkunapa llapallan llaqtakunapi runakunata.
Chaymantam Davidqa kutikamurqa llapallan tropankunawan Jerusalen llaqtaman.
Hatunkaray runakunawan peleasqankumanta
4 Chaykuna pasaruptinmi Gezer llaqtapi guerra karurqa Filistea casta runakunawan.
Chay tiempopim Husa castamanta kaq Sibecai wañurachirqa hatunkaray runakunapa castan Sipai sutiyoq runata chaynapim Filistea casta runakuna humillachisqa karqaku.
5 Mosoqmantam karqa guerra Filistea runakunawan chaymi Jairpa churin Elhanan wañurachirqa Gat llaqtayoq Goliatpa wawqen Lahmi sutiyoq runata.
Paypa lanzanpa kaspinmi karqa telarpa rodillon hina llumpay rakusu.
6 Huktawanmi karqa guerra Gat llaqtapi,
chay guerrapim karqa huk hatunkaray runa.
Paypa makinkunam karqa soqta dedoyoqkama,
hina chaynallataqmi karqa chakinkunapas.
Paypas hatunkaray runakunapa castanmi karqa.
7 Paymi insultarqa Israel soldadokunata chaymi Davidpa wawqen Simeapa churin Jonatan wañurachirqa.
8 Chay tawankum karqaku Gat llaqtayoq Refa sutiyoq runapa miraynin.
Paykunatamá wañurachirqa Davidpiwan soldadonkuna.