—Nahaspa churin Hanuntaqa kuyapayarisaqyá imaynam taytanpas ñoqawan rurasqanta hina —nispa.

Taytanpa wañukusqanmanta Hanunta consuelananpaqmi serviqninkunata David kacharqa.

Davidpa serviqninkuna Amonpa mirayninkunapa allpanman chayaruptinmi

3 Amonpa mirayninkunapa jefenkuna Hanunta nirqaku:

—¿Creenkichu taytaykita kuyasqanrayku consuelasunaykipaq Davidqa serviqninkunata kachamusqanta?

¿Manachu chay runakunataqa kachamusuchkanki nacionta wateqaspa puchukarachinankupaq?

—nispa.

4 Chay Rey Hanunmi runankunata kamachirqa Davidpa serviqninkunata presochanankupaq hinaspa barbankutapas huklaw uyallanta siksirunankupaq chaynataq pachankutapas siki patankama qorurunankupaq.

Reypa kamachisqanman hina ruraruspankum kachaykurqaku.

5 Chay pasakusqanmanta Davidman willaykuptinkum paykunaman taripachirqa anchallaña penqasqa kasqankurayku,

paykunatam nichimurqa:

—Jerico llaqtapiyá kaychik barbaykichik kasqallan wiñamunankama hinaptinñam kutimunkichik —nispa.

6 Davidpa cheqnisqanta yacharuspankum Hanunwan Amonpa mirayninkuna apachirqaku kimsa chunka kimsayoq waranqa kilo qollqeta,

chaytaqa apachirqaku guerrapaq carretakunatawan sillakuq soldadokunata contratamunankupaqmi.

Chaykunataqa apachirqaku Mesopotamia law Aram nacionmanta,

Aram-maaca nacionmanta hinaspa Soba nacionmanta contratamunankupaqmi.

7 Contratamurqakutaqmi guerrapaq kimsa chunka iskayniyoq waranqa carretankunatawan tropantin Maaca nacionpa reynintapas.

Paykunam Mediba llaqtapa chimpanman chayaruspanku campamentonkuta sayachirqaku.

Amonpa mirayninkunapas llaqtankumanta lloqsiramuspankum huñunakaramurqaku guerraman rinankupaq.

8 Chayta David yacharuspanmi Joabta kacharqa llapallan valeroso soldadonkunatawan.

9 Amonpa miraynin soldadokunam peleanankupaq lloqsispanku tropa-tropa kinrayninman churakururqaku llaqtapa zaguannin punkupa waqtanpi.

Hamuq reykunañataqmi campopi sapaqlla churakururqaku.

10 Chaymi qepanpi hinaspa ñawpaqninpi tropakuna kasqanta Joab qawaykuspan Israel soldadokunamanta aswan allinninta akllarurqa hinaspam Aram nacionniyoq tropakunawan peleananpaq churarurqa.

11 Puchuq tropakunatañataqmi wawqen Abisaiman qoykurqa chaynapi Amonpa miraynin tropakunawan peleananpaq.

12 Joabmi wawqenta nirqa:

—Aram nacionniyoq tropakuna ganamuwaptinqa hamunkim yanapawaqniy.

Amonpa miraynin tropakuna ganasuptikiñataqmi hamusaq yanapaqniki.

13 Kallpanchakuptikiyá tukuy kallpanchikwan peleasunchik nacionninchikrayku chaynataq Diosninchikpa llaqtankunarayku.

¡Tayta Diosyá munasqanta rurachun!

—nispa.

14 Soldadonkunawan Aram nacionniyoq tropakunata Joab atacaptinmi paykunañataq lluptikurqaku.

15 Aram nacionniyoq soldadokunapa lluptisqanta Amonpa miraynin soldadokuna qawaykuspankum paykunapas Joabpa wawqen Abisaimanta lluptikurqakutaq hinaspam llaqtaman yaykururqaku,

Joabñataqmi kutikurqa Jerusalen llaqtaman.

16 Aram nacionniyoq tropakuna Israelpa tropankunawan vencesqa kasqankuta qawakuykuspankum runakunata kacharqaku Eufrates Mayupa waklaw chimpanpi kaq Aram nacionniyoq tropakunaman hinaptinmi paykunata pusamurqaku.

Paykunataqa pusamurqa Hadad-ezerpa llapallan tropankuna kamachiqmi.

17 Davidman chayta willaykuptinkum Israel llapallan tropakunata huñuruspa Jordan Mayuta chimparurqa,

Aram nacionniyoq tropakunawan peleanankupaqmi chimpa-chimpa churakururqaku.

Paykunapa chimpanpi David churakuruptinmi Aram nacionniyoq tropakuna peleayta qallaykurqaku.

18 Aram nacionniyoq tropakunam ichaqa Israel tropakunamanta ayqekurqaku,

Davidpa tropankunam wañurachirqa tawa chunka waranqa chaki-puri soldadokunatawan qanchis waranqa carreta manejaq soldadokunata.

Davidqa wañurachirqataqmi Aram nacionniyoq llapallan tropakuna kamachiq Sofac sutiyoq runatapas.

19 Hadad-ezerpa llapallan yanapaqninkunam Israel tropakunapa vencerusqanta qawakuykuspanku Davidwan hawkayayman yaykururqaku hinaspam paytaña servirqaku.

Chaymantapunim Aram nacionniyoq runakunaqa manchakururqaku Amonpa mirayninkuna yanapayta.