—Nahaspa churin Hanuntaqa kuyapayarisaqyá imaynam taytanpas ñoqawan rurasqanta hina —nispa.

Taytanpa wañukusqanmanta Hanunta consuelananpaqmi serviqninkunata David kacharqa.

Davidpa serviqninkuna Amonpa mirayninkunapa allpanman chayaruptinmi

3 Amonpa mirayninkunapa jefenkuna reyninku Hanunta nirqaku:

—¿Creenkichu taytaykita kuyasqanrayku consuelasunaykipaq Davidqa serviqninkunata kachamusqanta?

¿Manachu serviqninkunataqa kachamusuchkanki llaqtata wateqaspa puchukarachinankupaq?

—nispa.

4 Chay Rey Hanunmi runankunata kamachirqa Davidpa serviqninkunata presochanankupaq hinaspa barbankutapas huklaw uyallanta siksirunankupaq chaynataq pachankutapas siki patankama qorurunankupaq.

Reypa kamachisqanman hina ruraruspankum kachaykurqaku.

5 Davidman willaykuptinkum paykunaman taripachirqa anchallaña penqasqa kasqankurayku,

paykunatam nichimurqa:

—Jerico llaqtapiyá kaychik barbaykichik kasqallan wiñamunankama hinaptinñam kutimunkichik —nispa.

6 Amonpa mirayninkunam Davidpa cheqnisqanta yacharuspanku,

Aram nacionpi kaq Bet-rehob lawmanta hinaspa Soba lawmanta pagaspa pusachimurqaku iskay chunka waranqa soldadokunata,

pusachimurqakutaqmi Maaca nacion reypa waranqa soldadonkunatapas chaynataq Tob lawmanta chunka iskayniyoq waranqa soldadokunatapas.

7 Chayta David yacharuspanmi Joabta kacharqa llapallan valeroso soldadonkunatawan.

8 Amonpa miraynin soldadokunam peleanankupaq lloqsispanku tropa-tropa kinrayninman churakururqaku llaqtapa zaguannin punkupa waqtanpi.

Soba lawmanta hinaspa Rehob lawmanta Aram nacionniyoq soldadokunam ichaqa Tob lawmanta hinaspa Maaca lawmanta soldadokunapiwan churakururqaku campopi sapaqlla.

9 Chaymi qepanpi hinaspa ñawpaqninpi tropakuna kasqanta Joab qawaykuspan Israel soldadokunamanta aswan allinninta akllarurqa hinaspam Aram nacionniyoq tropakunawan peleananpaq churarurqa.

10 Puchuq tropakunatañataqmi wawqen Abisaiman qoykurqa chaynapi Amonpa miraynin tropakunawan peleananpaq.

11 Joabmi wawqenta nirqa:

—Aram nacionniyoq tropakuna ganamuwaptinqa hamunkim yanapawaqniy.

Amonpa miraynin tropakuna ganamusuptikiñataqmi hamusaq yanapaqniki.

12 Kallpanchakuptikiyá tukuy kallpanchikwan peleasunchik nacionninchikrayku chaynataq Diosninchikpa llaqtankunarayku.

¡Tayta Diosyá munasqanta rurachun!

—nispa.

13 Soldadonkunawan Aram nacionniyoq tropakunata Joab atacaptinmi paykunañataq lluptikurqaku.

14 Aram nacionniyoq soldadokunapa lluptisqanta Amonpa miraynin soldadokuna qawaykuspanmi paykunapas Abisaimanta lluptikurqaku hinaspam llaqtaman yaykururqaku.

Amonpa miraynin soldadokunapa contranpi peleasqanmanta Joab kutimuspanmi chayaramurqa Jerusalen llaqtaman.

15 Aram nacionniyoq tropakuna Israelpa tropankunawan vencesqa kasqankuta qawakuykuspankum kasqallan huñunakururqaku.

16 Hadad-ezermi qayachimurqa Eufrates Mayupa waklaw chimpanpi kaq Aram nacionniyoq tropakunata hinaptinmi paykuna hamurqaku Helam llaqta lawkama.

Hadad-ezerpa llapallan tropankuna kamachiq Sobacmi paykunata kamachirqa.

17 Davidman chayta willaykuptinkum Israel llapallan tropakunata huñuruspa Jordan Mayuta chimparurqa Helam llaqtaman chayanankama.

Chaypim Aram nacionniyoq tropakuna Davidpa tropankunawan peleanankupaq kinrayninman churakuruspanku pelearqaku.

18 Aram nacionniyoq tropakunam ichaqa Israel tropakunamanta ayqekurqaku,

Davidpa tropankunam wañurachirqa qanchis pachak carretawan peleaq soldadokunata,

wañurachirqakutaqmi tawa chunka waranqa silladakunatapas.

Aram nacionniyoq llapallan tropakuna kamachiq Sobacpas herido karuspanmi chaypi wañururqa.

19 Hadad-ezerpa llapallan yanapaqnin reykunam Israel tropakunapa vencerusqanta qawakuykuspanku Israel nacionwan hawkayayman yaykururqaku hinaspam paykunataña servirqaku.

Chaymantapunim Aram nacionniyoq runakunaqa manchakururqaku Amonpa mirayninkuna yanapayta.