—¿Saulpa castanmanta pillapas puchurqachu payta Jonatanrayku favorecenaypaq?

—nispa.

2 Saulpa familianpam karqa sirvienten Siba sutiyoq.

Paytam Davidpa kasqanman qayachimurqaku.

Siba hamuruptinmi rey tapurqa:

—¿Qamchu Siba kanki?

—nispa.

Chaymi Sibañataq nirqa:

—Arí,

ñoqam kani —nispa.

3 Hinaptinmi rey tapurqa:

—¿Saulpa castanmanta kachkanraqchu pipas Diosrayku favorecenaypaq?

—nispa.

Chaymi Siba nirqa:

—Kachkanraqmi Jonatanpa churin,

payqa iskay chakin suchuyasqam kallan —nispa.

4 Chaymi rey tapurqa:

—¿Payqa maypitaq kachkan?

—nispa.

Hinaptinmi Sibañataq nirqa:

—Payqa Amielpa churin Maquirpa wasinpim kachkan Lodebar llaqtapi —nispa.

5 Hinaptinmi Rey David payta pusachimurqa Lodebar llaqtapi yachaq Amielpa churin Maquirpa wasinmanta.

6 Saulpa willkan otaq Jonatanpa churin Mefi-bosetmi Davidpa kasqanman chayaramuspan paypa qayllanpi qonqoranpa pampaman kumuykurqa.

Chaymi Davidñataq nirqa:

—¡Mefi-boset!

—nispa.

Chaymi payñataq nirqa:

—Ñoqam kani —nispa.

7 Hinaptinmi Davidñataq nirqa:

—Ama manchakuychu.

Ñoqam taytayki Jonatanrayku qamta favorecespa abueloyki Saulpa llapallan allpanta kutichipusqayki,

qamñataqmi tukuy tiempo ñoqawan kuska mikunki —nispa.

8 Mefi-bosetmi kumuykuspa nirqa:

—¿Pitaq ñoqaqa kallani?

¿Manachu ñoqaqa kani wañusqa allqo hina mana valeq?

—nispa.

9 Saulpa ñawpaq sirvienten Sibata rey qayachimuspanmi nirqa:

—Saulpa chaynataq llapallan castankunapa kapuqninkunatam lliwta qoykuni patronniki Saulpa willkan Mefi-bosetman.

10 Qanmi llamkapunki chakrankunata churikikunawan hinaspa sirvientekikunawan,

cosechankichikmá patronnikipa familiankuna mantienekunanpaq.

Patronnikipa willkan Mefi-bosetmi ichaqa mikunqa ñoqawan kuska tukuy tiempo —nispa.

Sibapa churinkunam karqa chunka pichqayoq,

sirvientenkunañataqmi karqa iskay chunka.

11 Sibam reyta nirqa:

—Qam Señor Reypa tukuy kamachiwasqaykita hinam ñoqaqa rurasaq —nispa.

Mefi-bosetmi reypa churin hina reywan kuska mikurqa.

12 Mefi-bosetpam huk taksa churin karqa Micaia sutiyoq.

Sibapa wasinpi llapallan yachaqkunam Mefi-bosetpa sirvienten karqaku.

13 Mefi-bosetmi ichaqa yacharqa Jerusalen llaqtapi reywan kuska mikusqanrayku.

Payqariki karqa iskaynin chakin suchuyasqam.