Betsabey sutiyoq warmiwan David huchallikusqanmanta
11
Mosoq wata chayaramuptinmi reykunapa guerraman lloqsinanku tiempopi David kacharqa Joabta,
serviqninkunata hinaspa llapallan Israel tropakunata.
Paykunam Amonpa miraynin tropakunata venceruspa Raba llaqtapa muyuriqninpi campamentonkuta churarurqaku peleanankupaq.
Davidmi ichaqa Jerusalen llaqtapi qeparurqa.
2 Davidmi tarde law horata camanmanta hatariruspa palacionpa qatanpi paseakuchkaspa bañakuchkaq warmita rikururqa,
chay warmim karqa buenamozallaña.
3 Chay warmi pim kasqanta tapumunankupaq David kachaptinmi nirqaku:
—Chay warmiqa Eliampa churin Betsabeymi,
Het casta runa Uriaspa warminmi —nispa.
4 Chaymi David kacharqa runankunata chay warmita pusamunankupaq,
hamuruptinmi David paywan puñururqa hinaptinmi Betsabeyqa wasinman kutikurqa.
Payqa chayraqmi yawarpakuyninmanta chuyanchasqa kachkarqa.
5 Chay warmim wiksayakuruspan Davidman willachimurqa:
—Wiksayakurunim —nispa.
6 Chaymi Joabman David nichimurqa:
—Het casta Uriasta kachamuway —nispa.
Chaymi Joab chaynata rurarqa.
7 Urias payman hamuruptinñataqmi David tapurqa Joabpa imaynam kasqanmanta,
tropakunapa imaynam kasqanmanta chaynataq guerra imaynam kasqanmantapas.
8 Chaymantam Uriasta David nirqa:
—Wasikiman rispayá samarimuy —nispa.
Reypa palacionmanta Urias lloqsiruptillanmi kikinpa mikunanmanta rey apachirqa regalota.
9 Uriasmi ichaqa wasinman mana rispa palaciopa punkunpi puñurqa reypa llapallan serviqninkunawan.
10 Urias wasinman mana risqanmanta Davidman willaykuptinkum David tapurqa:
—Viajasqaykimanta kutiramuchkaspaqa ¿imanasqamá manaqa rirqankichu wasikimanqa?
—nispa.
11 Chaymi Uriasñataq nirqa:
—Diospa baulninpas,
Israel tropakunapas,
Juda tropakunapas karpallapim kachkanku,
kamachiwaqniy Joabpas hinaspa serviqninkunapas campollapim puñuchkanku ¿hinaptinchu ñoqañataq wasiyman yaykusaq mikukuq,
tomakuq hinaspa warmiywan puñukuq?
Qampa vidaykiraykum jurani,
manapunim chaytaqa ruraymanchu —nispa.
12 Davidmi nirqa:
—Kunanpas kaypiraqyá kariy.
Paqarinñam aviasqayki —nispa.
Chaymi Urias qeparurqa Jerusalen llaqtapi paqarinnintinkama.
13 David convidaspanmi mikuchirqa hinaspa tomachirqa sinkanankama.
Tutayaruptinñam Uriasqa reypa serviqninkunawan kuska puñuq rirqa ichaqa manam rirqachu wasinmanqa.
14 Paqarinnintinmi David qellqarqa cartata Joabman hinaspam apachirqa kikin Uriaswan.
15 Cartapim nirqa:
Uriasta churaruy llumpay peleaq tropakunapa puntanman hinaspa paymanta suchurikuychik chaynapi heridasqa wañunanpaq.
16 Chaymi llaqtata Joab atacaspa Uriasta churarurqa valeroso soldadokunapa kasqan sitioman.
17 Chaymi llaqta defiendeq soldadokuna lloqsiramurqaku Joabwan peleanankupaq.
Davidpa tropankunamantam wakin soldadokuna wañururqa,
wañururqataqmi Het casta runa Uriaspas.
18 Hinaptinmi Joab willachirqa Davidman guerrapi tukuy ima pasasqanmanta.
19 Willakuqtam kunarqa kaynata:
—Guerramanta tukuy imata reyman willaruptikiqa
20 ichapas piñakuspan tapusunkiman:
“¿Imanasqataq peleaspaqa llumpayta llaqtaman anchuykurqankichik?
¿Manachu yacharqankichik murallamanta flechamusunaykichikta?
21 ¿Pitaq wañurachirqa Jerobaalpa churin Abimelecta?
¿Manachu molino maray pakisqata chamqaramurqa huk warmi Tebes llaqtapa murallanmanta?”
nispa.
Chaynata niptinqa qanmi ninki:
“Serviqniki Het casta runa Uriaspas wañurunmi” nispa.
22 Willakuq pasaspanmi Davidpa kasqanman chayaruspa Joabpa tukuy nimusqanta Davidman willarqa.
23 Kaynatamá willarqa:
—Contraykupi campoman lloqsimuq soldadokunam ñoqaykumantapas aswan mas kallpayoq karqaku,
chaywanpas kutirirachirqanikum llaqtapa zaguan punkunkama.
24 Aswanqa flechaqkuna serviqnikikunapa contranpi murallamanta flechamuptinkum wakin serviqnikikunapas wañururqaku,
wañururqataqmi Het casta serviqniki Uriaspas —nispa.
25 Chaymi willakuqta David nirqa:
—Kallpanchaspayá Joabta nimuy:
“Ama llakikuychu chaymantaqa,
guerrapiqa pipas wañunmi.
Aswanqa llaqtatayá aswan masta atacay chinkachinaykichikkama” nispa.
26 Uriaspa warminmi qosanpa wañurusqanta yacharuspan llumpayta waqallarqa.
27 Lutokusqan tiempo pasaruptinñataqmi David kacharqa Uriaspa viudanta palacionman pusamunankupaq.
Chaymi payqa warminña kaspan wachakurqa Davidpa qari churinta.
Aswanqa Davidpa chay rurarusqanmi Tayta Diosta mana agradarqachu.