—Israel llapallan runakunapa kasqanman rispayá Beerseba llaqtamanta Dan llaqtakama runakunata yupamuychik chaynapi guerrapaq hina kaqkunaqa haykam kasqanta yachanaypaq —nispa.

3 Joabmi ichaqa reyta nirqa:

—Tayta Diosyá mirachichun kay nacionpi runakunataqa kunan kasqanmantapas pachak kuti mastaraq.

Reynilláy ¿manachum paykunaqa llapallankupas serviqnikikuna?

Reynilláy ¿imapaqtaq runakuna yupachiyta munachkanki chaynapi Israel nacionta huchallichinaykipaq?

—nispa.

4 Ichaqa reypa kamachisqanmi Joabpa nisqanmantapas cumplinapuni karqa.

Joab tukuy Israel nacionpi puriramuspanmi kutimurqa Jerusalen llaqtaman.

5 Joabmi reyman willarqa guerrapaq hina runakunaqa haykam kasqanta.

Enteron Israel lawpim karqa chunka hukniyoq pachak waranqa runakuna,

Juda lawpiñataqmi karqa tawa pachak qanchis chunka waranqa runakuna.

6 Leviy ayllutawan Benjamin ayllutam ichaqa mana yuparqakuchu.

Joabpa qawasqanman hinaqa reypa kamachikusqanqa manam allinchu karqa.

7 Diospaqpas reypa kamachikusqanqa manam allinchu karqa,

chayraykum castigarqa Israel nacionta.

8 Chaymi David kaynata mañakurqa:

—Dios Taytalláy,

hatuntam huchallikuruni kaykunata ruraspay,

kunanmi ruegakuyki kay serviqnikita mana allin rurasqaymanta pampachaykuwanaykipaq,

ñoqaqa loco hinam chaykunata ruraruni —nispa.

9 Chaymi Davidpa tapukunan Gad sutiyoq runata Tayta Dios nirqa:

10 —Davidman rispaykiyá ñoqa Tayta Diospa nisqayta nimuy:

“Kimsa ruranaykunamantayá akllakuykuy hukllata chaynapi chay akllakusqaykiman hina qamta castiganaypaq” nispa.

11 Gad rispamá Tayta Diospa nisqanta Davidman kaynata willamurqa:

—¿Mayqantataq akllakunki,

12 nacionpi kimsa wata muchuy kanantachu icha kimsa killa enemigoykikunapa guerrawan qatikachasqa kaspa vencesqa kaytachu otaq kimsa punchawpuni peste onqoywan tukuy nacionpi castigasqa kaytachu?

Chay peste onqoywanmi ñoqapa angelniy tukuy Israel nacionpi runakunata wañuchinqa.

Chaynaqa allintayá tanteaykuy kachamuwaqniyman willamunaypaq.

13 Hinaptinmi Davidñataq nirqa:

—Hatun sasachakuypim rikuriruni.

Tayta Diospa makinman wichiykuymi aswan allinqa runakunapa makinman wichiykuymantaqa.

Tayta Diospa kuyapayakuyninqa ancha hatunmi —nispa.

14 Peste onqoyta Israel castakunaman Tayta Dios kachaykamuptinmi wañururqa qanchis chunka waranqa runakuna.

15 Tayta Diosmi angelta kacharqa Jerusalen llaqtapi runakunata wañurachinanpaq.

Runakunata angel wañuchichkaptinmi Tayta Dios qawariykuspan llakipayarikurqa chay castigo apachimusqanmanta chaymi wañuchiq angelta nirqa:

—Chayllapaqñam,

amaña masta wañuchiychu —nispa.

Tayta Diospa angelninmi kachkarqa Jebus casta Ornan sutiyoq runapa eranpi.

16 David qawarispanmi Tayta Diospa angelninta rikururqa kay pachapa altonpi kachkaqta.

Angelqa Jerusalen llaqtapa contranpim wañuchinanpaq hinalla espadanta haywarayachkarqa,

chaymi Davidñataq ancianokunapiwan luto pachawan pachakuruspanku qonqoranpa pampaman kumuykurqaku.

17 Diostam David nirqa:

—Runakuna yupasqa kananpaqqa ñoqam kamachirqani,

ñoqam huchallikuruniqa,

ñoqamá mana allintaqa ruraruni.

Kay runakunaqa ovejakuna hina kaspam mana imatapas rurarqakuchu.

Yupaychasqay Dios Taytalláy,

ruegakuykim ñoqatawan taytaypa castankunata castiganaykipaq ichaqa amayá runaykikunataqa castigaychu —nispa.

18 Tayta Diospa angelninmi Davidman nimunanpaq Gadta kamachirqa chaynapi David rispan Jebus casta Ornan sutiyoq runapa eranpi Tayta Diospaq altarta hatarichimunanpaq.

19 Chaynapim Tayta Diospa sutinpi Gadpa willasqanman hina David rirqa.

20 Qepanta Ornan qawariykuspanmi angelta rikururqa hinaptinmi paywan kaq tawantin churinkuna pakakururqaku.

Ornanqa trigotam trillakuchkarqa.

21 Ornan qawarispanmi rikururqa David payman hamuchkaqta chaymi eramanta rispa qonqoranpa pampaman kumuykurqa Davidpa qayllanpi.

22 Chaymi Ornanta David nirqa:

—Qoykuway kay eraykita chaynapi Tayta Diospaq kaypi altarta ruranaypaq.

Cabal precionpiyá rantikuruway chaynapi runakunamanta peste onqoy chinkananpaq —nispa.

23 Hinaptinmi Ornanñataq nirqa:

—Reynilláy,

kay erataqa qoykim tanteasqaykiman hina ruranaykipaq.

Bueyeskunatapas qoykim wañuchispa kañanaykipaq,

yantapaqpas qoykitaqmi trillana carretakunata,

trigotapas qoykitaqmi kawsaykunamanta ofrendapaq.

¡Chaynaqa tukuy kaykunatamá qam reyman qoyki!

—nispa.

24 Chaymi Rey Davidñataq nirqa:

—Manapunim chaynaqa kanmanchu,

ñoqaqa cabal precionwanmi rantisqayki.

Mana qollqeypa chanin lliw kañana ofrendataqa manam Tayta Diosmanqa ofreceymanchu.

Manam qampa kaqtaqa qechuykimanchu —nispa.

25 Chaynapimá Davidqa chay sitiopaq Ornanman qorqa yaqa qanchis kilo qorita.

26 Chaypim Tayta Diospaq David hatarichirqa altarta hinaspam lliw kañana ofrendakunata ofrecerqa,

ofrecerqataqmi Dioswan allinlla kasqanmanta ofrendakunatapas.

Chaymantam Davidqa Tayta Diosta mañakurqa,

hinaptinmi Tayta Diosñataq uyariykuspan hanaq pachamanta kachaykurqa ninata lliw kañana ofrendakuna altarpa hawanman.

27 Chaymantam Tayta Diosqa angelta kamachirqa espadanta vainanman kutiykachinanpaq.

28 Jebus casta Ornanpa eranpi Tayta Diospa uyariykusqanta David qawaykuspanmi animalkunata kañapurqa.

29 Chunniqpiraq Moisespa rurachisqan Tayta Diospa yachanan karpaqa Gabaon Moqopiraqmi kachkarqa,

chaypitaqmi kachkarqa animal kañananku altarpas.

30 Davidmi chay Gabaon lawman mana riyta atirqachu Diosta tapukamunanpaq,

Tayta Diospa angelninpa espadanta rikurusqanraykum payqa mancharisqallaña kachkarqa.