—Kaypim kanqa yupaychasqanchik Tayta Diospa templonqa,

kaypitaqmi kanqa Israel casta runakunapa lliwta kañananku altarpas —nispa.

2 Israel nacionpi llapallan forasterokunata Rey David huñurachispanmi wakinninta kamachirqa rumikunata labranankupaq chaynapi Diospa templonta rurachinanpaq.

3 Davidqa alistachirqataqmi achkallaña fierrokunatapas chaykunawan zaguan punkukunata clavanankupaq,

alistachirqataqmi hapinaq fierrokunatapas chaynataq manaña pesay atina broncetapas.

4 Alistachirqataqmi manaña yupay atina cedro qerukunatapas.

Chayna achkallaña cedro qerukunataqa Sidon hinaspa Tiro llaqtayoq runakunam Davidman apamurqaku.

5 Davidmi kaynata tantearqa:

—Churiy Salomonqa warmallaraqmi,

Tayta Diospa templon rurachisqayqa llapanmanta hatun allin reqsisqam kanqa,

llapallan nacionkunapipas sumaqllañam kanqa.

Chaynaqa chay templo rurasqa kananpaqmi tukuy imata alistasaq —nispa.

Chayraykum Davidqa manaraq wañukuchkaspan tukuy imata achkanpi alistarqa.

6 Chaymantam Davidqa churin Salomonta qayarachispan kamachirqa Israelpa yupaychasqan Tayta Diospaq templota rurachipunanpaq.

7 Churin Salomontamá kaynata nirqa:

—Churilláy,

ñoqam munarqani yupaychasqanchik Tayta Diospaq templo rurachiyta.

8 Ichaqa Tayta Diosmi niwarqa:

“Qamqa achka runakunatam wañuchirqanki,

hatun guerrakunatam rurarqanki.

Qamqa manamá temploytaqa rurachiwaqchu ñoqapa qayllaypi achka runakunata wañuchisqaykirayku.

9 Qampam churiki kanqa hawkalla kawsakuq.

Ñoqam muyuriqninpi enemigonkunamanta hawkayachisaq chayraykum paypa sutinqa kanqa Salomon.

Ñoqam paypa gobiernasqan tiempopi Israel nacionta hawkayachisaq mana pipas imanananpaq.

10 Paymi ñoqapaq templota ruranqa.

Paymi ñoqapa churiy kanqa,

ñoqañataqmi paypa taytan kasaq,

gobiernontam Israel nacionpi wiñaypaq takyachisaq” nispa.

11 Churilláy,

chaynaqa Tayta Dios kunan yanapasuspaykiyá favorecesunki.

Paypa nisusqaykiman hinam yupaychasqanchik Tayta Diospaq templota rurachinki.

12 Tayta Diosyá yuyaytawan entiendeyta qosunki Israel nacionpi gobiernanaykipaq chaynapim yupaychasqanchik Tayta Diospa yachachikuyninkunata kasukunki.

13 Israel nacionpaqmi Tayta Dios decretokunatawan,

reglamentokunata Moisesman kamachirqa,

chayman hina ruraspaykiqa favorecesqam kanki.

Chaynaqa qarinchakuspayá ama manchakuychu hinaspapas amataqyá hukmanyaychu.

14 Kayqayá hatun afanwan Tayta Diospa templonpaq alistaruni kimsa waranqa kimsa pachaknin tonelada qorita,

kimsa chunka kimsayoq waranqa tonelada qollqeta,

alistarunitaqmi achka-achka manaña pesay atina broncetapas hinaspa fierrotapas.

Huñurqanitaqmi qerukunatapas chaynataq rumikunatapas,

chaykunamanmi qampas yapanki.

15 Qanwanmi kachkan achka llamkaqkuna,

rumi labraqkuna,

albañilkuna,

carpinterokuna hinaspa tukuy rikchaq ruraq maestrokuna.

16 Qoripi,

qollqepi,

broncepi hinaspa fierropi llamkaqkunaqa mana yupay atinam kachkanku.

Chaynaqa llamkaymanyá churakuy.

Tayta Diosyá yanapasunki —nispa.

17 Davidqa kamachirqataqmi Israel nacionpi kaq llapa jefekunatapas churin Salomonta yanapanankupaq,

paykunatam nirqa:

18 —Yupaychasqanchik Tayta Diosqa qamkunatam yanapasuchkankichik.

Payqa tukuy hinastinpim hawkayayta qoykusunkichik.

Paymi qoykuwan kay nacionpi llapallan runakunata paykunapi munaychakunaypaq.

Paykunaqa Tayta Diospa hinaspa runankunapa munaychakusqanñam kachkanku.

19 Yupaychasqanchik Tayta Diostayá maskaychik tukuy sonqoykichikwan hinaspa tukuy vidaykichikwan,

hatarichiychikyá yupaychasqanchik Tayta Diospa santuarionta.

Chaymanmi paypa contrato baulnintawan paypaq sapaqchasqa serviciokunata apamunkichik —nispa.