—Chay Leviy casta runakunamantam iskay chunka tawayoq waranqa runakuna kanqa Tayta Diospa templonpi nanachikuqkuna,

soqta waranqañataqmi kanqa jefekuna hinaspa juezkuna.

Tawa waranqa runakunañataqmi zaguan punkukunawan cuentallikunqaku,

tawa waranqa runakunañataqmi Tayta Diosta alabanqaku chaypaq rurachisqay tocanakunata tocaspanku —nispa.

6 Leviy castakunatam kimsaman David rakinarurqa,

paykunam karqa Gerson castakuna,

Coat castakuna hinaspa Merari castakuna.

7 Gersonpa mirayninkunamantam karqa Laadanwan Simei.

8 Laadanpa kimsa churinkunam karqa piwi kaq Jehiel,

qatiqnin Zetam hinaspa Joel.

9 Simeipa kimsa churinkunam karqa Semolit,

Haziel hinaspa Haran.

Paykunam karqa Laadanpa castankunapi jefekuna.

10 Simeipa tawa churinkunam karqa Jahat,

Ziza,

Jeus hinaspa Beria.

11 Piwi kaqmi karqa Jahat,

qatiqninñataq Ziza.

Jeuspawan Beriapa churinkunam ichaqa mana achkachu karqa,

chayraykum paykunaqa yupasqa karqaku chulla familiallaña imam ruranankupi.

12 Coatpa tawa churinkunam karqa Amram,

Izhar,

Hebron hinaspa Uziel.

13 Amrampa churinkunam karqa Aaron hinaspa Moises.

Aaronmi churinkunapiwan rakisqa karqa Tayta Diosllapaqña ofrendakunata wiñaypaq sapaqchanankupaq,

paykunaqa rakisqa karqa Tayta Diospa qayllanpi inciensota kañanankupaqmi hinaspa payllataña servispa paypa bendicionninta wiñaypaq mañakunankupaqmi.

14 Diospa runan Moisespas chaynataq mirayninkunapas sutichasqa karqa Leviy ayllupa sutinwanmi.

15 Moisespa churinkunam karqa Gersonwan Eliezer.

16 Gersonpa churinmi karqa Sebuel.

Paymi karqa jefe.

17 Eliezerpa churinmi karqa Rehabias.

Paymi karqa jefe.

Eliezerpaqa manañam karqachu churinkuna.

Rehabiaspa churinkunam ichaqa karqa achkallaña.

18 Izharpa churinmi karqa Selomit.

Paymi karqa jefe.

19 Hebronpa piwi kaq churinmi karqa Jeraias,

paymi karqa jefe.

Jeriaspa sullkanmi karqa Amarias,

Amariaspa sullkanñataqmi karqa Jahaziel,

Jahazielpa sullkanñataqmi karqa Jecaman.

20 Uzielpa piwi kaq churinmi karqa Micaias,

paymi karqa jefe.

Micaiaspa sullkanmi karqa Isaias.

21 Meraripa churinkunam karqa Mahliwan Musi.

Mahlipa churinkunam karqa Eliazarwan Cis.

22 Eliazarmi wañukurqa mana qari churiyoq.

Warmi churinkunalla kaptinmi ayllun Cispa qari churinkuna paykunawan casarakurqaku.

23 Musipa kimsa churinkunam karqa Mahli,

Edar hinaspa Jeremot.

24 Paykunam karqaku Leviypa mirayninkuna,

paykunaqa castanku runakunapa jefenkuna kaspankum sapakama yupasqa karqaku,

Tayta Diospa templonpim iskay chunka watayoqmanta hanayman servikurqaku.

25 Davidmi nirqa:

—Israelpa yupaychasqan Tayta Diosmi hawkayayta qoykun Israel runankunaman,

paymi Jerusalen llaqtapi yachanqa wiñaypaq.

26 Chaynaqa Leviy casta runakunaqa manañam apakachanqakuñachu Tayta Diospa yachanan karpataqa nitaq llapan servicionkunatapas —nispa.

27 Davidpa qepa kamachisqanman hinamá Leviy castakunapa mirayninta yuparurqaku iskay chunka watayoqmanta hanayman.

28 Leviy castakunapa rurananmi karqa Aaronpa mirayninkunata Tayta Diospa templonpi yanapay.

Yanapanankumá karqa patiokunapi,

cuartokunapi,

Diospaq sapaqchasqa kaqkuna limpiaypi hinaspa Diospa templonpi tukuy ima ruraypi.

29 Paykunamá cuentallikurqaku Diospa qayllanpi monton patanasqa tantakunawan,

kawsaykunamanta rurasqa harinawan,

mana qonchuyoq tortillakunawan,

sartenpi freisqa kaqkunawan hinaspa masarasqa kaqkunawan.

Cuentallikurqakutaqmi sayaynin tupuna kaqkunawanpas chaynataq llasaynin pesana kaqkunawanpas.

30 Paykunaqa sapa tempranonmi hinaspa sapa tardenmi templopi sayananku karqa Tayta Diosman graciasta qospanku alabanankupaq.

31 Paykunaqa sayanankum karqa samana punchawkunapi sacerdotekuna animalta wañuchispa Tayta Diospaq lliwta kañaptinkupas chaynataq mosoq killapi hinaspa fiestakunapi kañaptinkupas.

Reglamentoman hinam paykunaqa haykam kasqankuman hina tukuy tiempopi Tayta Diospa qayllanpi mana faltakuspa kananku karqa.

32 Paykunamá cuentallikurqaku Diosman asuykuna karpawanpas chaynataq santuariowanpas,

Diospa templonpim rurarqaku castanku Aaronpa mirayninkunapa kamachisqanman hina.