Guerrapi peleananpaq qarikunata David yupachisqanmanta
24
Tayta Diosmi Israel castakunapa contranpi yapatawan piñakururqa chaymi Davidta umacharqa Israel casta runakunatapas chaynataq Juda casta runakunatapas yupachinanpaq.
2 Hinaptinmi chaypi compañaqnin llapallan tropankunapa kamachiqnin Joabta nirqa:
—Israel llapallan ayllukunapa kasqanman rispayá Dan llaqtamanta Beerseba llaqtakama runakunata yupamuy chaynapi guerrapaq hina kaqkunaqa haykam kasqanta yachanaypaq —nispa.
3 Joabmi ichaqa reyta nirqa:
—Yupaychasqanchik Tayta Diosyá mirachichun kay nacionpi runakunataqa kunan kasqanmantapas pachak kuti mastaraq chaynapi qam señor reyniy qawanaykipaq.
Reynilláy ¿imapaqtaq yupachiytaqa munachkanki?
—nispa.
4 Ichaqa reypa kamachisqanmi Joabpa nisqanmantapas chaynataq tropakuna kamachiqkunapa nisqanmantapas cumplinapuni karqa.
Joabwan tropakunapa kamachiqninmi reypa qayllanmanta lloqsirqaku Israel nacionpi guerrapaq runakunata yupamunankupaq.
5 Jordan Mayuta chimparuspankum qallarirqaku Aroer llaqtamanta chaynataq qechwapa chawpinpi llaqtamanta.
Chaymantam pasarqaku Gad ayllupa allpanta Jazer llaqtaman.
6 Chaymantam pasarqaku Galaad lawman.
Pasarqakutaqmi Het casta runakunapa allpantapas Cades llaqtakama.
Dan-jaan llaqtaman chayaruspankum muyurimurqaku Sidon llaqtakama.
7 Chaymantam rirqaku Tiro murallasqa llaqtaman,
rirqakutaqmi Hiv hinaspa Canaan casta runakunapa llapallan llaqtankunamanpas.
Hinaspam chayarurqaku Juda ayllu runakunapa allpan Neguev law Beerseba llaqtakama.
8 Isqon killa iskay chunka punchawnin lliw Israel nacionta muyuyta tukuramuspankum kutimurqaku Jerusalen llaqtaman.
9 Joabmi reyman qorqa guerrapaq hina runakunaqa haykam kasqanta.
Israel lawpim karqa pusaq pachak waranqa soldadokuna,
Juda lawpiñataqmi karqa pichqa pachak waranqa soldadokuna.
10 Runakuna yupachiyta David tukuruspanmi sonqonpi pesakuspan Tayta Diosta nirqa:
—Dios Taytalláy,
hatuntam huchallikuruni kaykunata ruraspay,
kunanmi ruegakuyki kay serviqnikita mana allin rurasqaymanta pampachaykuwanaykipaq,
ñoqaqa loco hinam chaykunata ruraruni —nispa.
11 Tutapayta David hatarichkaptinmi Davidpa tapukunan runata otaq Diosmanta willakuq Gad sutiyoq runata Tayta Dios nirqa:
12 —Davidman rispaykiyá ñoqa Tayta Diospa nisqayta nimuy:
“Kimsa ruranaykunamantayá akllakuykuy hukllata chaynapi chay akllakusqaykiman hina qamta castiganaypaq” nispa.
13 Chay willakuq Gad rispamá Davidman willamurqa:
—¿Mayqantataq akllakunki,
nacionpi qanchis wata muchuy kanantachu otaq kimsa killa enemigoykikunapa qatikachasqan kaytachu otaq nacionpi kimsa punchawpuni peste onqoy kanantachu?
Chaynaqa allintayá tanteaykuy kachamuwaqniyman willamunaypaq —nispa.
14 Hinaptinmi Davidñataq nirqa:
—Hatun sasachakuypim rikuriruni.
Tayta Diospa makinman wichiykuymi aswan allinqa runakunapa makinman wichiykuymantaqa.
Tayta Diospa kuyapayakuyninqa hatu-hatunmi —nispa.
15 Tayta Diosmi kachaykamurqa peste onqoyta Israel castakunaman chay tempranomanta señalasqan punchawkama.
Hinaptinmi Dan llaqtamanta Beerseba llaqtakama otaq Israel lliw nacionpi wañururqaku qanchis chunka waranqa runakuna.
16 Jerusalen llaqtapi runakunata angel wañurachinanpaq kachkaptinmi Tayta Dios llakipayarikurqa chay castigo apachimusqanmanta chaymi wañuchiq angelta nirqa:
—Chayllapaqñam,
amaña masta wañuchiychu —nispa.
Tayta Diospa angelninmi kachkarqa Jebus casta Arauna sutiyoq runapa eranpi.
17 Wañuchiq angelta rikuruspanmi David nirqa Tayta Diosta:
—Ñoqam hatu-hatunta huchallikuruni,
ñoqamriki mana allintaqa ruraruni.
Kay runakunaqa ovejakuna hina kaspam mana imatapas rurarqakuchu.
Ruegakuykim ñoqatawan taytaypa castankunata castiganaykipaq —nispa.
Altarta David rurachisqanmanta
18 Chay punchawmi Gad rirqa Davidman hinaspam nirqa:
—Jebus casta Arauna sutiyoq runapa eranman rispaykiyá hatarichimuy altarta Tayta Diospaq —nispa.
19 Chaynapimá Davidqa rirqa Tayta Dios kamachiptin Gadpa willasqanman hina.
20 Arauna karumanta qawachkaspam reytawan serviqninkunata paypa kasqanman hamuchkaqta rikururqa chaymi taripaykuspan reypa ñawpaqninpi qonqoranpa pampaman kumuykurqa.
21 Hinaspam nirqa:
—Señor reynilláy ¿imaynanpitaq kay serviqnikitaqa watukaykamuwanki —nispa.
Hinaptinmi Davidñataq nirqa:
—Kay erayki rantiqmi hamurqani Tayta Diospaq altarta kaypi ruranaypaq chaynapi runakuna wañuchiq peste onqoy taninanpaq —nispa.
22 Chaymi Araunañataq nirqa:
—Reynilláy,
kayqaya eraqa,
munasqaykiman hinayá animalkunata wañuchispa kañay.
Kayqaya bueyeskunapas wañuchispa lliwchanta kañanaykipaq,
yantapaqpas kachkanmi trillanakunawan bueyeskunapa yugonkuna.
23 Reylláy,
tukuy kaykunatam qam reyman qoyki.
¡Yupaychasqayki Tayta Diosyá favorecesunki!
—nispa.
24 Chaymi reyñataq nirqa:
—Amayá chaynachu kachun ichaqa precionwanmi rantisqayki.
Yupaychasqay Tayta Diosmanqa manam ofreceymanchu lliw kañapunay kaqkunataqa mana imaniraqllapas cuestawasqantaqa —nispa.
Davidmi rantirurqa eratawan bueyeskunata medio kilo masnin qollqewan.
25 Chaypim David altarta hatarichirqa Tayta Diospaq.
Animalkunatam wañuchirqa lliwta kañapunanpaq chaynataq Dioswan allinlla kasqanmanta ofrecenanpaq.
Nacionpa favorninpi ruegakusqanta Tayta Dios uyariykuptinmi peste onqoy Israel nacionpi tanirurqa.