Wañukunallanpaqña Davidpa rimarisqan
23
Wañukunallanpaqña rimarispanmi David kaynata nirqa:
Isaipa churin Davidmi rimarini.
Alto-altopi Diospa hatunchasqan runam rimarini.
Rey kanaypaq Jacobpa Diosninpa nombrasqanmi nini,
Israel nacionpi miskillaña takiqmi nini:
2 Tayta Diospa Espiritunmi ñoqantakama rimarirqa.
Tayta Diospa palabrallanmi simillaypipas tarikurqa.
3 Israelpapas yupaychallasqan Diosnillanmiki rimawarqa.
Israelpapas harkaykullaqnin Diosnillanmiki niykuwarqa:
“Allinneqta rurallaspa runakuna gobiernaqqa,
ñoqa Diosta respetaspa runakuna gobiernaqqa
4 achikyaykamuptin intipa kanchariynin hinam,
puyupapas mana tapaykusqan kanchaq inti hinam,
pararuptin allpamanta pasto ikllimuchkaq hinam.”
5 Chaynamiki mirayniytapas Diosllayqariki takyachirqa.
Wiñaypaqmi contratotaña ñoqallaywanqa ruraykurqa.
Chaykunatam ordenninpiraq allichasqata churaykurqa,
chaykunata cumplinanpaqmi waqaychaykuspa churaykurqa.
Paymi planta ikllichimuq hina
salvacionnillayta cumplinqa.
Paymi planta ikllichimuq hina
tukuy munasqayta cumplinqa.
6 Mana allin ruraqkunaqa wischusqa kichkam kallanqaku.
Paykunaqa pipapas mana hapiykunanñam kallanqaku.
7 Hapiykuyta munaqqariki fierrotaraqmi hapiykunqa.
Hapiykuyta munaqqariki lanzataraqmi hapiykunqa.
Paykunaqa chayllapipunim pasaypaqtaña ruparunqa.
Davidpa tropankunapi valeroso jefekunamanta
8 Davidpa valeroso soldadonkunamá karqa:
Hacmon casta Is-boset,
paymi karqa kimsa valeroso soldadokunapa jefen.
Paymi huk kutipi lanzanwan wañurachirqa pusaq pachak soldadokunata.
9 Paymanmi qatirqa Ahoa castamanta kaq Dodo sutiyoq runapa churin Eleazar,
paymi karqa kimsa valerosokunapa huknin.
Paymi Davidwan kuska karqa Filistea soldadokunata desafiaspanku.
Filistea soldadokuna chaypi huñunakuruptinkum Israel soldadokuna lluptikururqaku.
10 Eleazarmi ichaqa sayaykuspa wañurachirqa Filistea soldadokunata makinpas utinankama hinaptinmi espadanpas makinman laqakururqa.
Chay punchawpim Tayta Dios allinsuta vencerachirqa chaymi Israel soldadokunaqa Eleazarpa kasqanman kutirirqaku wañuqkunapa llapa imankupas hoqarikuqllaña.
11 Eleazarman qatiqñataqmi karqa Agepa churin Sama.
Payqa karqa orqo lawkunapi yachaqmi.
Filistea tropakunam huñunakurqaku Lehi lawpi.
Chaypim karqa lentejayoq chakra.
Chaymantam Israel soldadokuna Filistea tropakunamanta lluptirqaku.
12 Chay chakrapa chawpinpi Sama sutiyoq runa sayaykuspanmi defienderqa hinaspam vencerurqa Filistea tropakunata.
Chaypim Tayta Dios allinsuta vencerachirqa.
13 Kimsa chunka valeroso jefekunamantam kimsan valeroso soldadokuna cosecha tiempopi rirqaku Davidman Adulam machaypi kachkaptin.
Filistea soldadokunamantam wakinnin tropapa campamenton kachkarqa Refaim Qechwapi.
14 Filistea tropakunapa cuartelnin Belen llaqtapi kachkaptinmá Davidñataq kachkarqa amparakuna sitiopi.
15 Chaypim David ganasllawanña nirqa:
—¡Piraq tomaykachiwanman Belen llaqta zaguanpa waqtanpi pozomanta yakuta!
—nispa.
16 Chay kimsan valeroso jefekunam Filistea tropakunapa campamentonman yaykuruspanku Belen llaqta zaguanpa waqtanpi pozomanta yakuta horqorurqaku hinaspam Davidman apamurqaku.
Davidmi ichaqa mana munarqachu chay yaku tomayta,
Tayta Diospaq ofrendata hina tallispanmi
17 nirqa:
—¡Dios Taytalláy ¿tomaymanraqchu kay runakunapa yawarninpa chanin yakuta otaq wañuyman wischukuspanku apamuwasqanku yakuta?!
¡Chaytaqa amayá piensayllapas-piensasaqchu!
—nispa.
Chaynata nispanmi mana munarqachu tomayta.
Chay kimsan valeroso jefekunamá chaykunata rurarqaku.
18 Sarviapa wawan,
Joabpa wawqen Abisaimi karqa kimsa chunka valeroso jefekunapa kamachiqnin.
Paymi huk kutipi lanzanwan kimsa pachak soldadokunata wañurachirqa.
Paypas reqsisqam karqa chay kimsan jefekuna hina.
19 Abisaimi chay kimsan valeroso jefekunamanta aswan reqsisqa karqa chaymi paykunapa jefen karqa.
Ichaqa manam igualarqachu chay kimsa valeroso jefekunapa rurasqanmanqa.
20 Cabseel llaqtamanta Joidapa churin Benaia sutiyoq runapas valeroso kaspanmi achka hatun ruraykunata rurarqa.
Paymi wañurachirqa Moab nacionniyoq iskay alli-allin valeroso soldadokunata.
Huk punchawpas lastachkaptinmi uchkuman yaykuruspan chaypi wañurachirqa leonta.
21 Wañurachirqataqmi Egipto nacionniyoq hatunkaray runatapas.
Chay Egipto nacionniyoq runam lanzawan armasqa kachkarqa.
Benaiam ichaqa pelearqa huk kaspillawan hinaspam chay Egipto nacionniyoq runamanta lanzanta qechuruspa chaywan wañurachirqa.
22 Chaynaqa chay Joidapa churin Benaia sutiyoq runapas chay rurasqanwanmi sinchi reqsisqa karqa kimsan valeroso jefekuna hina.
23 Kimsa chunka jefekunamantapas ancha reqsisqamá karqa,
chawanpas manam igualarqachu chay kimsa valeroso jefekunapa rurasqanmanqa.
Benaiatam David churarurqa waqaychaqnin soldadokunapa jefenña kananpaq.
24 Kimsa chunka valeroso jefekunamanta wakinmi kaykuna:
Joabpa wawqen Asael,
Belen llaqtayoq Dodopa churin Elhanan,
25 Harod lawmanta Sama chaynataq Elica,
26 Bet-pelet llaqtayoq Heles,
Tecoa llaqtayoq Iquespa churin Ira,
27 Anatot llaqtayoq Abiezer,
Husah casta Mebunai,
28 Ahoa casta Salmon,
Netofa llaqtayoq Maharai,
29 Netofa llaqtayoq Baanapa churin Heled,
Benjamin allpapi Gabaa llaqtayoq Ribaipa churin Itai,
30 Piraton llaqtayoq Benaia,
Gaas Wayqopi yachaq Hidai,
31 Bet-araba lawpi yachaq Abi-albon,
Bahurim llaqtayoq Azmavet,
32 Saalbim llaqtayoq Eliaba,
Jasenpa churin Jonatanwan
33 orqokuna lawmanta Sama hinaspa Sararpa churin Ahiam,
34 Maaca lawmanta Ahasbaipa churin Elifelet,
Gilo llaqtayoq Ahitofelpa churin Eliam,
35 Carmel llaqtayoq Hezrai,
Arab llaqtachamanta Paarai,
36 Zoba nacionniyoq Natanpa churin Igal,
Gad ayllumanta Bani,
37 Amon nacionniyoq Selec,
Beerot llaqtayoq Naharai,
paymi karqa Sarviapa wawan Joab sutiyoq runapa arman apaq,
38 Jatir llaqtayoq Irawan Gareb
39 hinaspa Het casta runa Urias.
Llapallankum karqaku kimsa chunka qanchisniyoq valeroso jefekuna.