Enemigonkunata venceruspa Davidpa takisqan
(Sal 18)
22
Davidmi kay takipa palabrankunata rimarirqa Tayta Diosman.
Payqa rimarirqa llapallan enemigonkunamantawan Saulmanta Tayta Dios libraykuptinmi.
2 Kaynatamá David nirqa:
Dios Taytalláy,
qamqa ñoqapaqmi qaqa hina kapuwanki.
Qamqa pakakuna wasi hinam kapuwanki.
Qamqa ñoqallaytamiki libraykullawanki.
3 Diosnilláy,
amparakuykunay hatun rumim kapuwanki.
Qampunitaqmiki ñoqataqa harkawanki.
Atiynikiwanmi ñoqataqa salvawanki.
Qamllam ñoqataqa altoneqpi pakawanki.
Qamqa lluptikunay wasi hinam kapuwanki.
Qamqariki ñoqallaypa salvaqniymi kanki.
Daño ruraqkunamantam libraykullawanki.
4 Tayta Diostamiki qayakusaq ñoqallayqa.
Payllapunimriki sumaq alabana Diosqa.
Payllam enemigoymanta salvaykuqnillayqa.
5 Wañuymi yakupapas olankuna hina wichqarullawan.
Kallpachkaq lloqlla hinam mana allinkuna vencerullawan.
6 Waskawan watasqata hinam sepultura wichqarullawan.
Imapas toqlla hapiruchkaq hinam wañuy hapirullawan.
7 Sasachakuyllapi kaspam Tayta Diosta qayakullani.
Yanapaykuwananpaqmi Diosnillayman qaparillani.
Payllamriki templonmanta uyarirqa qayakusqayta.
Payllamriki uyariykun ñoqallaypa qaparisqayta.
8 Chaynataqmi kay pachapas kuyurispan katkatatarqa.
Cielokunapa tiyananpas lliwchataqmi kuyurirurqa.
Paypa piñakuyninwanmi llumpaysuta katkatatarqa.
9 Paypa senqanmantataqmi qosnikuna waspirirurqa.
Paypa siminmantataqmi rupaq nina lloqsirirurqa.
Chaynataqmi lloqsimuspan nina sansa ratarirurqa.
10 Tela llikiq hinam alto cielomanta uraykamurqa.
Tutay-tutay puyum chaki pampanpipas rikurirurqa.
11 Querubinpa hawanpiraq sillakuspam pawarikurqa.
Wayrapapas raprallanpim payqariki pawarikurqa.
12 Kikin pakakunanpaqmi tutayayta churaykullarqa.
Payqa muyuriqninpipas harkaqnintam churaykullarqa.
Yakupapas yanayasqan puyutamya churaykullarqa.
13 Kancharichkaq ñawpaqnintam rupaq sansa ruparirurqa.
14 Tayta Diosmi cielomanta toqyachirqa truenokunata.
Alto-altopiraq Diosmi uyarichin qaparisqanta.
15 Flechanwanpas flechamuspam cheqechirqa enemigonta.
Achka-achka llipyanwanmi vencerurqa paykunataqa.
16 Dios Taytalláy,
simikimanta lloqsimuq qaqchakuynikiwanmi
lamar qochapa uku-uku kaynin rikuriramurqa.
Senqaykimanta lloqsimuq samaynillaykiwanmi
kay pachapapas cimientollankuna qalakurullarqa.
17 Diosmi ñoqallayta altomanta haywarimuwarqa.
Achka-achka yaku chawpinmantam horqoykullawarqa.
18 Llumpay atiyniyoq enemigoymantam librawarqa.
Llapachallan cheqniwaqniykunamantam librawarqa.
Paykunaqa ñoqamanta aswan kallpayoqmi karqa.
19 Ñakarichkaptiymi paykunaqa pawaykullawarqa.
Tayta Diosllamriki ñoqataqa yanapaykuwarqa.
20 Kichki-kichki lugarmantam payqa horqoykullawarqa.
Ñoqarayku kusikuspam payqa libraykullawarqa.
21 Allinta kawsakusqayraykum Tayta Diosqa premiaykullawan.
Allinta rurallasqayraykum allinwanraq pagaykullawan.
22 Diosniypa mana munallasqantaqa manam rurarqanichu.
Diosniypa contranpiqa manam hukmantaqa kawsarqanichu.
23 Ñoqaqa siemprepunim yuyachkani paypa leyninkunata.
Ñoqaqa manam karunchakuykurqanichu decretonmanta.
24 Diosniypa qayllanpiqa mana huchayoqmi kawsachkarqani,
pasaypaq mana allin ruraymantam waqaychakullarqani.
25 Allinta kawsakusqayraykum Tayta Diosqa pagaykullawan.
Qayllanpi allintaña rurallasqayraykum pagaykullawan.
26 Dios Taytalláy,
confiakusuqnikiwanqa confiakunapaqmi reqsichikunki.
Mana huchallikuqwanqa mana huchayoqmi reqsichikunki.
27 Chuyanchasqa runawanqa chuyapunitaqmi reqsichikunki.
Atoq hina runawanqa qampas sacretaqmi reqsichikunki.
28 Qamqariki salvaykunkim humillakuykullaq runakunata.
Qawaspaykim penqachinki hatun tukuqllaña runakunata.
29 Dios Taytalláy,
tutaykuruptiypas qanmi achkiykuwasparaq kanchariwanki.
30 Achkallaña tropamanpas pawaykunaypaqmi yanapawanki.
Paykunapa murallanta seqarunaypaqmi yanapawanki.
31 Tayta Diospa kawsasqanqa mana chikallanpas pantayniyoqmi.
Tayta Diospa prometekusqanqa mana chikan pantachikuqmi.
Paypi amparakuq llapan runakunataqa harkaykullanmi.
32 Tayta Diosllam Diosqariki,
manam hukqa kanchu.
Payllam harkawaqninchikqa,
hukqa manam kanchu.
33 Diosmi ñoqataqariki kallpanchaykullawan.
Mana pantaruqtam payqariki kawsachiwan.
34 Payqa luwichupa chakintapas hinaraqmi ruran chakillayta.
Payqa altoneqpi sayaptiypas takyaykachillanmi chakillayta.
35 Ñoqataqa paymi yachachiwan guerrapiña peleamunaypaqpas.
Kallpanchallawanmi broncemanta arcowanraq flechamunaypaqpas.
36 Qanmi harkachikunawan hina salvawanki.
Kuyakuywan yachachispam hatunchallawanki.
37 Lluchkanaymantapas ñannillaytam kicharqanki.
38 Enemigoykunatapas qatispaymi hayparqani tukunaypaq.
Tukurunaykamam manariki kutimurqanichu samanaypaq.
39 Puchukachirqanim mana sayariytawanpas atinankukama.
Maqapamurqanim mana sayariytawanpas atinankukama.
Paykunaqa wichiykurqam ñoqallaypa sayasqayraq pampakama.
40 Qanmi ñoqataqa guerrapipas peleanaypaq kallpanchawarqanki.
Ladoypipas qonqorananpaqmi enemigollayta churarqanki.
41 Ñoqallaypa enemigoykunam muyurirusparaq ayqekurqa.
Chaynam cheqniwaqniykunatapas wañurachillaptiy tukururqa.
42 Qayakuptinkupas manam yanaparqakuchu.
Tayta Diospas manamriki contestarqataqchu.
43 Pampa allpa polvotapas hinam ñuturqani.
Ñanpi mitutapas hinam saruparurqani.
Ñanpi mitutapas hinam ñutuparurqani.
44 Qanmi runakunapapas maqawananmanta libraykuwarqanki.
Nacionkunatapas kamachiqnin kanaypaqmi waqaychawarqanki.
Mana reqsisqaypas runakunawanmi qamqa servichiwarqanki.
45 Paykunaqariki uyariykuwaspam chayllapuni kasuwanku.
Forasterokunam kumukuykusparaq chaylla asuykullawanku.
46 Llapachallan forasterokunam pasaypaqta hukmanyarurqaku.
Pakakusqankumantapas katkatatastinmi lloqsiykullarqaku.
47 Wiñaypaqñayá kawsakuchun Tayta Diosqa.
Alabasqayá kachun harkaykuwaqniyqa.
Hatunchasqayá kachun salvaq Diosnillayqa.
Qaqa hinamá harkawaqniy Diosnillayqa.
48 Ñoqaraykumá vengakunpas Diosnillayqa.
Llapa runakunatapas chakillaymanmi churaykuwan.
49 Enemigollaymantapas payllataqmiki libraykuwan.
Contraypipas hatariqpa hawanpiraqmi churaykuwan.
Payllataqmi tukuy daño ruraqmantapas libraykuwan.
50 Dios Taytalláy,
chayraykumriki nacionkunapipas graciastaraq qollasqayki.
Chayraykumriki sutikimantapas qampaq takipullasqayki.
51 Akllakusqayki reytam sinchi sumaqtaraq venceykachiwanki.
Nombraykuwaspa aceitewan talliwasqaykitam kuyawanki.
Ñoqallaytawan llapan mirayniytam wiñaypaqña kuyallanki.