Venceruspa Davidpa takisqanmanta
Takiqkunapa maestronpaq, Tayta Diospa serviqnin Davidpa takisqan. Paymi kay takipa palabrankunata rimarirqa Tayta Diosman. Payqa rimarirqa llapallan enemigonkunamantawan Saulmanta Tayta Dios libraykuptinmi. Kaynatamá David nirqa:
18
Dios Taytalláy,
qamqa kallpanchaqniymi kapuwanki,
chaymi qamtaqariki kuyakuyki.
2 Dios Taytalláy,
qamqa ñoqapaqmi qaqa hina kapuwanki.
Qamqa pakakuna wasi hinam kapuwanki.
Qamqa ñoqallaytamiki libraykullawanki.
Diosnilláy,
amparakuykunay hatun rumim kapuwanki.
Qampunitaqmiki ñoqataqa harkawanki.
Atiynikiwanmi ñoqataqa salvawanki.
Qamllam ñoqataqa altoneqpi pakawanki.
3 Tayta Diostamriki qayakusaq ñoqallayqa.
Payllapunimriki sumaq alabana Diosqa.
Payllam enemigoymanta salvaykuqnillayqa.
4 Wañuymi waskawanpas watasqata hina wankurullawan.
Kallpachkaq lloqlla hinam mana allinkuna vencerullawan.
5 Waskawan watasqata hinam sepultura wichqarullawan.
Imapas toqlla hapiruchkaq hinam wañuy hapirullawan.
6 Sasachakuyllapi kaspam Tayta Diosta qayakullani.
Yanapaykuwananpaqmi Diosnillayman qaparillani.
Payllamriki templonmanta uyarirqa qayakusqayta.
Payllamriki uyariykun ñoqallaypa qaparisqayta.
7 Chaynataqmi kay pachapas kuyurispan katkatatarqa.
Orqokuna tiyananpas lliwchataqmi kuyurirurqa.
Paypa piñakuyninwanmi llumpaysuta katkatatarqa.
8 Paypa senqanmantataqmi qosnikuna waspirirurqa.
Paypa siminmantataqmi rupaq nina lloqsirirurqa.
Chaynataqmi lloqsimuspan nina sansa ratarirurqa.
9 Tela llikiq hinam alto cielomanta uraykamurqa.
Tutay-tutay puyum chaki pampanpipas rikurirurqa.
10 Querubinpa hawanpiraq sillakuspam pawarikurqa.
Wayrapapas raprallanpim payqariki pawarikurqa.
11 Kikin pakakunanpaqmi tutayayta churaykullarqa.
Payqa muyuriqninpipas harkaqnintam churaykullarqa.
Yakupapas yanayasqan puyutamya churaykullarqa.
12 Kancharichkaq ñawpaqnintam puyunkuna pasakullarqa.
Chaymantapas runtu param llipyaywanraq lloqsirullarqa.
13 Tayta Diosmi cielomanta toqyachirqa truenokunata.
Alto-altopiraq Diosmi uyarichin qaparisqanta.
Runtu parawanpas sinchi llipyakunam lloqsimullarqa.
14 Flechanwanpas flechamuspam cheqechirqa enemigonta.
Achka-achka llipyanwanmi vencerurqa paykunataqa.
15 Dios Taytalláy,
simikimanta lloqsimuq qaqchakuynikiwanmi
lamar qochapa uku-uku kaynin rikuriramurqa.
Senqaykimanta lloqsimuq samaynillaykiwanmi
kay pachapapas cimientollankuna qalakurullarqa.
16 Diosmi ñoqallayta altomanta haywarimuwarqa.
Achka-achka yaku chawpinmantam horqoykullawarqa.
17 Llumpay atiyniyoq enemigoymantam
librawarqa.
Llapachallan cheqniwaqniykunamantam
librawarqa.
Paykunaqa ñoqamanta aswan
kallpayoqmi karqa.
18 Ñakarichkaptiymi paykunaqa
pawaykullawarqa.
Tayta Diosllamriki ñoqataqa
yanapaykuwarqa.
19 Kichki-kichki lugarmantam
payqa horqoykullawarqa.
Ñoqarayku kusikuspam payqa
libraykullawarqa.
20 Allinta kawsakusqayraykum Tayta Diosqa premiaykullawan.
Allinta rurallasqayraykum allinwanraq pagaykullawan.
21 Diosniypa mana munallasqantaqa manam rurarqanichu.
Diosniypa contranpiqa manam hukmantaqa kawsarqanichu.
22 Ñoqaqa siemprepunim yuyachkani paypa leyninkunata.
Ñoqaqa manam karunchakuykurqanichu decretonmanta.
23 Diosniypa qayllanpiqa mana huchayoqmi kawsallarqani.
Pasaypaq mana allin ruraymantam waqaychakullarqani.
24 Allinta kawsakusqayraykum Tayta Diosqa pagaykullawan.
Qayllanpi allintaña rurallasqayraykum pagaykullawan.
25 Dios Taytalláy,
confiakusuqnikiwanqa confiakunapaqmi reqsichikunki.
Mana huchallikuqwanqa mana huchayoqmi reqsichikunki.
26 Chuyanchasqa runawanqa chuyapunitaqmi reqsichikunki.
Atoq hina runawanqa qampas sacretaqmi reqsichikunki.
27 Qamqariki salvaykunkim humillakuykullaq runakunata.
Humillaykunkiñataqmi hatun tukuqllaña runakunata.
28 Yupaychasqay Dios Taytalláy,
tutaykuruptiypas qanmi achkiykuwasparaq kanchariwanki.
29 Achkallaña tropamanpas pawaykunaypaqmi yanapawanki.
Paykunapa murallanta seqarunaypaqmi yanapawanki.
30 Tayta Diospa kawsasqanqa mana chikallanpas pantayniyoqmi.
Tayta Diospa prometekusqanqa mana chikan pantachikuqmi.
Paypi amparakuq llapan runakunataqa harkaykullanmi.
31 Tayta Diosllam Diosqariki,
manam hukqa kanchu.
Payllam harkawaqninchikqa,
hukqa manam kanchu.
32 Diosmi ñoqataqariki kallpanchaykullawan.
Mana pantaruqtam payqariki kawsachiwan.
33 Payqa luwichupa chakintapas
hinaraqmi ruran chakillayta.
Payqa altoneqpi sayaptiypas
takyaykachillanmi chakillayta.
34 Ñoqataqa paymi yachachiwan
guerrapiña peleamunaypaqpas.
Kallpanchallawanmi broncemanta
arcowanraq flechamunaypaqpas.
35 Qanmi harkachikunawan hina salvawanki.
Qanmi alliq makikiwan takyaykachiwanki.
Kuyakuywan yachachispam hatunchallawanki.
36 Lluchkanaymantapas ñannillaytam kicharqanki.
37 Enemigoykunatapas qatispaymi hayparqani peleanaypaq.
Tukurunaykamam manariki kutimurqanichu samanaypaq.
38 Maqapamurqanim mana sayariytawanpas atinankukama.
Paykunaqa wichiykurqam ñoqallaypa sayasqayraq pampakama.
39 Qanmi ñoqataqa guerrapipas peleanaypaq kallpanchawarqanki.
Ladoypipas qonqorananpaqmi enemigollayta churarqanki.
40 Ñoqallaypa enemigoykunam muyurirusparaq ayqekurqa.
Chaynam cheqniwaqniykunatapas wañurachillaptiy tukururqa.
41 Qayakuptinkupas manam yanaparqakuchu.
Tayta Diospas manamriki contestarqataqchu.
42 Wayrachisqa polvotapas hinam ñuturqani.
Ñanpi mitutapas hinam wischurullarqani.
43 Qanmi runakunapapas maqawananmanta libraykuwarqanki.
Nacionkunapapas kamachiqnin kanaypaqmi churaykuwarqanki.
Mana reqsisqaypas runakunawanmi qamqa servichiwarqanki.
44 Paykunaqariki uyariykuwaspam chayllapuni kasuwanku.
Forasterokunam kumukuykusparaq chaylla asuykullawanku.
45 Llapachallan forasterokunam pasaypaqta hukmanyarurqaku.
Pakakusqankumantapas katkatatastinmi lloqsiykullarqaku.
46 Wiñaypaqñayá kawsakuchun Tayta Diosqa.
Alabasqayá kachun harkaykuwaqniyqa.
Hatunchasqayá kachun salvaq Diosnillayqa.
47 Ñoqaraykumá vengakunpas Diosnillayqa.
Llapa runakunatapas chakillaymanmi churaykuwan.
48 Enemigollaymantapas payllataqmiki libraykuwan.
Contraypipas hatariqpa hawanpiraqmi churaykuwan.
Payllataqmi tukuy daño ruraqmantapas libraykuwan.
49 Dios Taytalláy,
chayraykumriki nacionkunapipas
graciastaraq qollasqayki.
Chayraykumriki sutikimantapas
qampaq takipullasqayki.
50 Akllakusqayki reytam
sinchi sumaqtaraq venceykachiwanki.
Nombraykuwaspa aceitewan
talliwasqaykitam kuyawanki.
Ñoqallaytawan llapan mirayniytam
wiñaypaqña kuyallanki.