Unanchasqanwan atiyninta Dios reqsichikusqanmanta
Takiqkunapa maestronpaq, Davidpa Diosman takisqan
19
Diospa atiynillanmantam
cielokuna willawanchik.
Rurallasqanmantam
chaypi kaqkunapas rimawanchik.
2 Sapa punchawpunim
chaykunaqa rimapayawanchik.
Tutan-tutanraqmi
Diosmantapas reqsiykachiwanchik.
3 Ima rimay palabralla
mana uyarikuptinpas
nitaq paypa voznin
manapuni uyarikuptinpas
4 voznillanmi lliw mundopa
hawankama mastakurun.
Palabranmi kay pachapa
cantonkama chayaykurun.
Diosmi cielopi intipa yachananta ruraykurun.
5 Chay intiqa rikchakunpas
kusikuywan kallpaq runamanmi.
6 Payqariki cielokunapapas
cantonmantam lloqsiykamun.
Payqariki cielokunapapas cantonkamam puririmun.
Manapunim imañapas pakakunchu rupayninmantaqa.
7 Tayta Diospa tukuy yachachikuyninqa
mana imaniraqllapas fallayoqmi.
Paypa sumaqllaña yachachikuyninqa
runatapas astawanraq kallpanchaqmi.
Tayta Diospa kamachikuyninkunaqa
mayna sumaqllaña confiakunapaqmi.
Paypa sumaq kamachikuyninkunaqa
mana yachallaqman yachay qoykuqraqmi.
8 Tayta Diospa lliw encargasqankunaqa
mana imaniraqllapas pantaykuqmi.
Paypa llapachallan encargaykusqanqa
runakunapas sonqon kusiykachillaqmi.
Tayta Diospa kamachikusqankunaqa
mana imaniraqllapas faltayoqmi.
Paypa sumaq kamachikusqankunaqa
runakunapapas ñawin kanchaykuqmi.
9 Tayta Diosta
respetananchikpaq qosqan
kamachikuyninqa chuyay-chuyaymi.
Tayta Diosta
respetanaykichikpaq qosqan
kamachikuyninqa wiña-wiñaypaqmi.
Paypa decretonkunaqa cheqappunim.
Paypa decretonkunaqa allinpunim.
10 Tukuy chaykunaqa
qorimantapas aswan munanaraqmi.
Chaykunaqa qori puromantapas
aswan munanaraqmi.
Tukuy chaykunaqa lliw mielmantapas
aswan miskisuraqmi.
Tukuy chaykunaqa panalnillanpi
hina miskisuraqmi.
11 Chay kamachikuynikiqa
serviqllaykitapas anyaykullawanmi.
Chaykunata waqaychaqkunaqa
kallasaqku hatun premioyoqmi.
12 ¿Yaqaraqchum pipas musyakunman
imapipas pantarusqanmanta?
Pampachaykullaway llapachallan
pakaykusqa huchaykunamanta.
13 Waqaychaykullaway qampa contraykipi
ama hoqarikunaypaq.
Amapuni permiteychu chaykunaqa
munaychakullawananpaq.
Chaynapiqa pasaypaqpas
manapuni huchayoqñam kawsakusaq.
Chaynapiqa contraykipi
hoqarikuymantam libre kawsakusaq.
14 Dios Taytalláy,
qamqariki kanki rumi hina amparaykuqniymi.
Qamqariki kanki tukuymanta libraykuqnillaymi.
Rimasqaykunapas qampa agradoykipaqtaq kachun.
Piensasqaykunapas qampa agradoykipaqtaq kachun.