Enemigokunata vencenapaq mañakuymanta
Takiqkunapa maestronpaq, Davidpa Diosman takisqan
20
Tayta Diospunitaqyá
contestasunki llakikusqayki punchawpiqa.
Jacobpapas Diosninyá
defiendesunki imamantapas allintaqa.
2 Santuarionmantayá
payqa yanapamusunki.
Sion Moqomantayá
payqa kallpanchamusunki.
3 Payqa yuyarichunyá
qampa llapallan ofrendallaykikunamanta.
Payqa chaskiykuchunyá
paypaq kañasqa ofrendallasqaykikunata.
(Samariy)
4 Qoykusunkitaqyá imam munallasqaykita.
Cumpliykachichunyá tanteallasqaykita.
5 Qamlla venceptikimá
ñoqallaykuqa kusikusaqku llapallayku.
Hoqarillasuntaqmá
banderatapas Diosnillanchikpa sutillanpi.
Tayta Diospunitaqyá
tukuy imapas mañasqaykita qollasunki.
6 Tayta Diosqa vencechinmi
sapaqchakusqan reynillantaqa.
Mana iskayrayallaspam
yachanipuni tukuy chaytaqa.
Payqariki hanaq pacha
santuarionmantam contestamunqa.
Enemigonkunamantam
alleq makinwan salvaykullanqa.
7 Wakin runakunam hapipakunku
guerrapaq carretakunaman.
Wakin runakunam hapipakunku
guerrapaq caballokunaman.
Ñoqanchikqariki hapipakunchik
Taytanchik Diosnillanchikmanmi.
8 Paykunaqa wichiykullan
moqollankupas doblakuptinmi.
Ñoqanchikqariki aswan
sayanparaqmi takyallachkanchik.
Ñoqanchikqariki mana
kuyuriqpunim sayallachkanchik.
9 Dios Taytallayku,
Vencenanpaqyá
reyniykuta yanapaykuy qampuni.
Qayakusqayku punchawpiyá
contestaykuwayku qampuni.