uyariykuyá mana engañopaq kaq asuntollayta.

Entiendeykuyá qaparillawanña qayakullasqayta.

Uyariykuyá qamta simillaywan qayakullasqayta.

Simillaywanmá rimachkani cheqap mañakuyniytaqa.

2 Qamllamantayá hamullachun favorniypi arregloqa.

Qawariykuyá munallasqaykiman hina kawsaqtaqa.

3 Sonqoytaqariki suma-sumaqtamya qawaykunki.

Qawaykuwanaykipaqmi qamqa tutan hamurqanki.

Ninawanpas pruebaq hinam qamqa pruebaykuwarqanki.

Qamqa manam ima huchatapas tariwarqankichu.

Piensasqaywan rimasqayqa manam contranakullanchu.

4 Runapapas ruraynillanmantam asurikurqani.

Manam runa wañurachiq hinaraqchu kawsarqani.

Ñoqallayqa kamachisqaykiman hinam rurarqani.

5 Qampa ñannikipim purirqani mana pantaykuspa.

Chakiykunam purillarqa manapuni urmaykuspa.

6 Diosnilláy,

qayakamusqaytayá uyariykuway.

Kumuykamullaspayá chaskiykullaway.

Rimarillasqaytayá chaskiykullaway.

7 Qawaykachiwayá admirakuypaq kuyapayakuynikita.

Salvaykullankimá atiynikipi amparakullaqkunata.

Kikikipunimá salvaykullanki contrakuqninkunamanta.

8 Kikikipuniyá cuidaykullaway ñawi ruruykita hina.

Pakaykullawayá raprallanwanraq wallpa pakaykuchkaq hina.

9 Cuidaykullawayá mana allinlla rurawaqniykunamanta.

Pakaykullawayá chinkarunaypaq muyuwaqniykunamanta.

10 Paykunaqa engreidollaña runakunam kanku.

Paykunaqa orgullollawanña rimakuqmi kanku.

11 Paykunaqa contraykupi hamuruspam muyuwachkan.

Pampamanraq wikapaykuwananpaqmi qawawachkan.

12 Llumpay llikiparuy munaq leonmanraqmi rikchakunku.

Maypiñapas pakakuchkaq leonmanraqmi rikchakunku.

13 Dios Taytalláy,

kikikipuniyá hatariykuy paykunapa contrallanpiqa.

Kikikipuniyá pampamanraq qonqorachiy paykunataqa.

Espadaykiwanyá libraykuway mana allin runamantaqa.

14 Dios Taytalláy,

atiynikiwanyá libraykuway mana allin runamantapas.

Libraykullawayá kay pachapi kapuqniyoq runamantapas.

Favornikiwanmá wiksankuta mikuywanraq huntaykachinki.

Puchuqwanñataqmá churintapas,

willkantapas saksaykachinki.

15 Uyallaykitamá qawaykusaq allintaña kawsasqayrayku.

Kusikullasaqmá rikcharispay qamllataña qawasqayrayku.