Akllasqa herenciamanta
Mictam sutiyoq takitam David takin.
16
Diosnilláy,
ñoqallayta waqaychaykullaway.
Qamllamanmi amparakullani.
2 Dios Taytalláy,
qamtam ñoqallayqa nillarqayki:
“Qanmiriki Señorniyqa kanki.
Allin kapuqniyqa qamllam kanki.”
3 Kay pachapi chuya kaqkunaqa
¡mayna sumaq runakunam kanku!
¡Sonqoytapas kusichiqmi kanku!
4 Aswan ñakarichun taytachata
qatillayta munaq kaqkunaqa.
Ñoqallayqa manam tallisaqchu
tukuy yawar ofrendankutaqa.
Manam ñoqallayqa rimasaqchu
taytachakunapa sutintaqa.
5 Dios Taytalláy,
qowarqankim tocawaqniytaqa.
Qowarqankim favornikitaqa.
Takyachinkim kapuqnillaytaqa.
6 Chakra tupuykapullawasqanmi
tocaruwan allin sitiopiraq.
Herenciaypas kapullawachkanmi
sumaq kuyayllapaq sitiopiraq.
7 Ñoqallayta consejaykuwaqniy
Tayta Diosnillaytam alabasaq.
Tutankunapipas corregispam
ñoqataqa sonqochaykullawan.
8 Siemprem yuyallasaq Diosniytaqa.
Alleq lawnillaypim kachkan payqa.
Manam urmasaqchu ñoqallayqa.
9 Sonqoywanmi kusikullachkani.
Simiywanmi kusikullachkani.
Confiakuspam cuerpoy samaykunqa.
10 Cuerpoytaqariki manapunim
sepulturapiqa saqenkichu.
Sapaqchasqaykipa cuerpontaqa
manataqmi ismurachinkichu.
11 Ñoqataqa reqsiykachiwankim
imaynatam sumaq kawsakuyta.
Qayllaykipim kusikuyllawanña
tukuy sonqollayta huntaykunki.
Alleq lawnikipi kallaspayqa
siemprem tarillani kusikuyta.